Read efik LEVITICUS 3 Bible Online

LEVITICUS 3 - efik bible

LEVITICUS 3

¹NDIEN edieke enɔ esie edide uwa emem edieke osiode enye ke otu enaŋ edi, edide ayara, onyuŋ edide uman, yak enye ada se mibiomoke ndo edi ke iso Jehovah.

²Ndien enye ada ubɔk esie odori ke ibuot enɔ esie, onyuŋ owot enye ekpere enyin-usuŋ efe esop: ndien yak nditɔ Aaron, mme oku, esime iyip esie ke itie-uwa ekanade ekuk.

³Ndien enye edida ubak uwa emem edi ɔfɔp ɔnɔ Jehovah: kpa ikpɔŋ emi ofuhɔde ke ŋkpɔ esit idibi, ye ofuri ikpɔŋ emi adianade nsia, ye ekput mbiba,

⁴ye ikpɔŋ emi adianade mmɔ, emi edianade isin, ye caul emi adianade esit; yak owo osio enye efep ekpere ekput.

⁵Ndien nditɔ Aaron efɔp enye ke itie-uwa ke enyɔŋ edifɔp uwa, emi odorode ke ifia, emi odude ke ikaŋ, edinem utebe, enɔ Jehovah.

⁶Ndien edieke enɔ esie eke enye adade ɔnɔ Jehovah ke uwa emem, otode ke ŋkpri ufene, edide ayara, onyuŋ edide uman, yak enye ada se mibiomoke ndo edi.

⁷Edieke enye adade eyen erɔŋ ke enɔ esie edi, yak enye ada enye edi ke iso Jehovah.

⁸Ndien enye ada ubɔk esie odori enɔ esie ke ibuot, onyuŋ owot enye ke iso efe esop: ndien nditɔ Aaron esime iyip esie ke itie-uwa ekanade ekuk.

⁹Ndien enye edida ubak uwa emem edi ɔfɔp ɔnɔ Jehovah, ikpɔŋ esie, ye ofuri isim esie, yak owo osio enye efep ke ɔtɔ emi osobode ye asakedem, ye ikpɔŋ emi ɔfuhɔde ke ŋkpɔ esit idibi, ye ofuri ikpɔŋ emi adianade nsia,

¹⁰ye ekput mbiba, ye ikpɔŋ emi adianade mmɔ, emi adianade isin, ye caul emi adianade esit, yak owo osio enye efep ekpere ekput.

¹¹Ndien oku edifɔp enye ke itie-uwa: udia eke efɔpde enɔ Jehovah.

¹²Ndien edieke enɔ esie edide ebot, yak eda enye edi ke iso Jehovah.

¹³Onyuŋ ada ubɔk esie odori enye ke ibuot, ndien owot enye ke iso efe esop: ndien nditɔ Aaron esime iyip esie ke itie-uwa ekanade ekuk.

¹⁴Ndien yak enye osio enɔ esie ke esit eke ɔfɔpde ɔnɔ Jehovah; kpa ikpɔŋ emi ɔfuhɔde ke ŋkpɔ esit idibi, ye ofuri ikpɔŋ emi adianade nsia, ye ekput mbiba,

¹⁵ye ikpɔŋ emi adianade mmɔ, emi adianade isin, ye caul emi adianade esit; yak owo osio enye efep ekpere ekput.

¹⁶Ndien oku ɔfɔp mmɔ ke itie-uwa; udia eke efɔpde ke ikaŋ, edinem utebe, kpa ofuri ikpɔŋ, enɔ Jehovah.

¹⁷Emi edidi nsinsi ewuhɔ ke ofuri emana mbufo, ke kpukpru ebiet eke mbufo eduŋde: mbufo ekuta baba ikpɔŋ, ekunyuŋ edia iyip.