Read efik LEVITICUS 4 Bible Online

LEVITICUS 4 - efik bible

LEVITICUS 4

¹NDIEN Jehovah ɔdɔhɔ Moses ete, Dɔhɔ nditɔ Israel, ete,

²Ke ini owo eduede mbet Jehovah ekededi, eke mikpanamke, mikoho koi, onyuŋ anamde mmɔ oro kiet:

³edi eke oku emi eyerede aran, abiatde mbet, esin mbio-obio edue isop, yak enye ada ndien abak eyen enaŋ eke ɔfɔnde ama, abaŋa ndudue emi enye eduede, ɔsɔk Jehovah ke uwa idiɔk ido.

⁴Ndien yak enye ada abak eyen enaŋ oro edi ke enyin-usuŋ efe esop ke iso Jehovah; onyuŋ ada ubɔk esie odori abak enaŋ ke ibuot, ndien owot abak enaŋ ke iso Jehovah.

⁵Ndien yak oku emi eyerede aran, ada ndusuk iyip enaŋ oro oduk ke efe esop:

⁶ndien oku oro edebi nnuenubɔk esie ke iyip; onyuŋ osime iyip utim ikatiaba ke iso Jehovah, ke iso ukara edisana ebiet.

⁷Oku onyuŋ ada iyip eyet ke nduk itie-ufɔp edinem incense emi odude ke efe esop ke iso Jehovah; onyuŋ ɔduɔk ofuri iyip enaŋ ke ukot itie-ufɔp uwa emi ekperede enyin-usuŋ efe esop.

⁸Ndien yak enye osio ofuri ikpɔŋ enaŋ uwa idiɔk ido ke esit efep; kpa ikpɔŋ emi ɔfuhɔde ke ŋkpɔ esit idibi, ye ofuri ikpɔŋ emi adianade nsia, ye ekput mbiba,

⁹ye ikpɔŋ emi adianade mmɔ, emi adianade isin, ye caul emi adianade esit; yak owo osio enye efep ekpere ekput,

¹⁰kpa nte emi esiode enye ke enaŋ uwa emem: ndien oku ɔfɔp mmɔ ke itie-ufɔp uwa.

¹¹Ndien yak emen ikpa enaŋ oro, ye ofuri unam esie, edian ye ibuot esie, ye nnuk esie, ye ŋkpɔ esit idibi, ye ifuɔ esie,

¹²idem ofuri enaŋ, ewɔrɔ eka ke edem nna ke edisana ebiet, emi eduɔkde ntɔŋ, ndien efɔp enye ke ifia ikaŋ: yak efɔp enye ke ebiet emi eduɔkde ntɔŋ.

¹³Ndien edieke ofuri esop Israel eduede, mikoho koi, ŋkpɔ oro onyuŋ odibe esop, mmɔ enyuŋ edue mbet Jehovah ekededi, eke mikpanamke, ndien enyene isop;

¹⁴ke adaŋemi ndudue emi mmɔ eduede ke ŋkpɔ oro ayararede, yak esop eda ubak eyen enaŋ esɔk, ebaŋa ndudue oro, enyuŋ eda enye edi ke iso efe esop.

¹⁵Ndien mbiowo esop eda ubɔk mmɔ edori abak enaŋ oro ke ibuot ke iso Jehovah: ndien yak owo owot enaŋ ke iso Jehovah.

¹⁶Ndien oku emi eyerede aran, ada ndusuk iyip abak enaŋ okoduk ke efe esop:

¹⁷yak oku onyuŋ edebi nnuenubɔk esie ke iyip, osime utim ikatiaba ke iso Jehovah, ke iso ukara.

¹⁸Ndien yak enye ada ndusuk iyip eyet ke nduk itie -uwa emi odude ke iso Jehovah, emi odude ke efe esop, ndien aŋwaŋa kpukpru iyip ɔduɔk ke ukot itie-ufɔp uwa, emi ekperede enyin-usuŋ efe esop.

¹⁹Ndien yak enye onyuŋ osio ofuri ikpɔŋ esie efep, ada ɔfɔp ke itie-uwa.

²⁰Yak enye onyuŋ anam enaŋ emi, kpa nte emi enye anamde enaŋ uwa idiɔk ido (eken); yak enye anam kpasuk ntre ye enye emi: ntem yak oku osio isop mmɔ, ndien eyefen mmɔ.

²¹Ndien yak owo emen enaŋ oro ɔwɔrɔ aka ke edem nna, onyuŋ ɔfɔp enye, kpa nte ɔfɔpde akpa enaŋ: enye edi uwa idiɔk ido ofuri esop.

²²Adaŋemi ɔbɔŋ eduede, onyuŋ anamde ŋkpɔ ekededi eke Jehovah Abasi esie ebetde, eke mikpanamke, mikoho koi, ndien enyene isop;

²³edieke ayararede ndudue esie emi enye eduede ke esit, enɔ enye; yak enye ada ndien enɔ esie edi, okpo ebot kiet eke ɔfɔnde ama:

²⁴ndien yak enye ada ubɔk esie odori okpo ebot oro ke ibuot, ndien owot enye ke ebiet emi ekam ewotde edifɔp uwa ke iso Jehovah; enye edi uwa idiɔk ido.

²⁵Ndien oku ada usuk iyip uwa idiɔk ido ke nnuenubɔk esie, eyet ke nduk itie-ufɔp uwa.

²⁶Ndien yak enye ɔfɔp ofuri ikpɔŋ esie ke itie-uwa, kpa nte efɔpde ikpɔŋ uwa emem; oku onyuŋ osio isop idiɔk ido esie, ndien eyefen enye.

²⁷Ndien edieke owo mbio-obio kiet eduede, mikoho koi, ke erinam ŋkpɔ ekededi eke Jehovah ebetde, eke mikpanamke, ndien enyene isop;

²⁸edieke eyararede ndudue esie emi enye eduede, enɔ enye; yak enye ada ndien enɔ esie edi, uman ebot kiet eke ɔfɔnde ama, abaŋa ndudue esie emi enye eduede.

²⁹Ndien enye ada ubɔk esie odori uwa idiɔk ido ke ibuot, onyuŋ owot uwa idiɔk ido oro ke ebiet edifɔp uwa.

³⁰Ndien yak oku ada usuk iyip esie ke nnuen ubɔk esie, eyet ke nduk itie-ufɔp uwa, ndien aŋwaŋa ofuri iyip esie ɔduɔk ke ukot itie-uwa.

³¹Ndien yak enye osio ofuri ikpɔŋ esie efep, kpa nte esiode ikpɔŋ uwa emem; ndien oku ada enye ɔfɔp ke itie-uwa ɔnɔ Jehovah ke edinem utebe; ntre ke oku edisio isop esie, ndien eyefen enye.

³²Ndien edieke enye adade eyen erɔŋ ke enɔ esie edi ke eke ndudue oro, yak enye ada uman eke ɔfɔnde ama ɔsɔk.

³³Ndien ada ubɔk esie odori uwa idiɔk ido ke ibuot, onyuŋ owot enye ke uwa idiɔk ido, ke ebiet emi ewotde edifɔp uwa.

³⁴Ndien yak oku ada usuk iyip uwa idiɔk ido ke nnuen-ubɔk esie, eyet ke nduk itie-ufɔp uwa, onyuŋ aŋwaŋa kpukpru iyip esie ɔduɔk ke ukot itie-uwa.

³⁵Ndien enye osio ofuri ikpɔŋ esie, kpa nte esiode ikpɔŋ eyen erɔŋ uwa emem; ndien yak oku ɔfɔp mmɔ ke itie-uwa, adian ye uwa ikaŋ Jehovah: ntem ke oku edisio isop ndudue esie eke enye anamde, ndien eyefen enye.