Read efik LEVITICUS 5 Bible Online

LEVITICUS 5 - efik bible

LEVITICUS 5

¹NDIEN adaŋemi owo eduede ke ama okokop uyo eke owukde, onyuŋ edide ntiense, mme enye okokut, mme ɔfɔfiɔk; edieke enye mitiŋke, idiɔk ido esie eyebiomo enye.

²Mme onyuŋ edi owo eke otukde edidehe ŋkpɔ ekededi, edide okpo edidehe unam, onyuŋ edide okpo edidehe ufene, onyuŋ edide okpo edidehe andinyɔni, ndien ama odibe enye, enye edehe, onyuŋ enyene isop.

³Mme onyuŋ edieke enye otukde ndek owo, ke ndek ekededi eke owo edehede ke esit, onyuŋ edibe enye; ke ini enye edifiɔkde, enye enyene isop.

⁴Mme edi eke owo ɔsɔpde inua ɔŋwɔŋɔ ete imɔ iyenam idiɔk, mme inyuŋ inam eti, se isuk ididi eke owo edisɔpde inua asiak ke uŋwɔŋɔ, ndien odibe enye; adaŋemi enye edifiɔkde, enye enyene isop ndien ke emi kiet.

⁵Ndien ama ekem, adaŋemi enye eduede isop ke ŋkpɔ emi kiet, yak enye ayarare ete ke imɔ imedue ke esit;

⁶ndien yak enye ada isop esie edisɔk Jehovah, abaŋa ndudue esie emi enye eduede, uman eke otode ke ŋkpi ufene, edide eyen erɔŋ, onyuŋ edide eyen ebot ke uwa idiɔk ido; ndien oku edisio isop esie abaŋa ndudue esie.

⁷Ndien edieke ubɔk mikemke enye ke eke ŋkpri ufene, yak enye ada mbomoŋkuku iba, mme nditɔ ibiom iba, ɔsɔk Jehovah, ke isop esie emi enye eduede; kiet ke uwa idiɔk ido, ye kiet eken ke edifɔp uwa.

⁸Ndien enye ada mmɔ ɔsɔk oku, ndien enye edibem iso ada eke uwa idiɔk ido edi, ndien okibi enye ibuot ke itɔŋ, edi okuyirere efep:

⁹ndien yak enye osime iyip uwa idiɔk ido ke ŋkaŋ itie-uwa; onyuŋ onyimi iyip eke ɔsuhɔde, ɔduɔk ke ukot itie-uwa: enye edi uwa idiɔk ido.

¹⁰Ndien enye edida eken anam edifɔp uwa, nte ekam esinamde: ntem ke oku edisio isop esie abaŋa ndudue esie emi enye eduede, ndien eyefen enye.

¹¹Edi edieke ubɔk mikemke enye ke mbomoŋkuku iba, mme nditɔ ibiom iba; ndien yak andidue ada omer eti ndom-uyo kiet ke enɔ eise, ke uwa idiɔk ido, edi enye okusin aran ke esit, okunyuŋ adian frankincense ke esit: koro enye edide uwa idiɔk ido.

¹²Ndien ada enye ɔsɔk oku, ndien oku owobi enye ɔyɔhɔ ubɔk kiet, kpa editi ubak esie, ɔfɔp ke itie-uwa, ke enyɔŋ uwa ikaŋ Jehovah: enye edi uwa idiɔk ido.

¹³Ntem ke oku edisio isop esie abaŋa ndudue esie emi enye eduede ke ŋkpɔ emi kiet; ndien eyefen enye: ndien yak oku ada se isuhɔde, nte inuak-udia.

¹⁴Ndien Jehovah ɔdɔhɔ Moses, ete,

¹⁵Adaŋemi owo enamde se minenke, onyuŋ abiatde edisana ŋkpɔ Jehovah ekededi, mikoho koi; yak enye ada isop esie ɔsɔk Jehovah, okukim kiet eke ɔfɔnde ama, eke otode ke ŋkpri ufene, nte afo ɔkɔmde ke shekel silver, esaŋa ye edisana shekel, man edi ŋkpɔ isop:

¹⁶ntre ke enye edisio usiene edisana ŋkpɔ emi enye abiatde, onyuŋ ada ɔyɔhɔ ubak ition odori ke esit, emen ɔnɔ oku: ntre ke oku edisio isop esie ke okukim uwa ndudue, ndien eyefen enye.

¹⁷Ndien edieke owo eduede, onyuŋ abiat mbet Jehovah ekededi, eke mikpanamke, ndien mifiɔkke, onyuŋ edue isop, ndien enye obiomo idiɔk ido esie.

¹⁸Ndien yak enye osio okukim eke ɔfɔnde ama ke ŋkpri ufene, nte afo ɔkɔmde, ke ŋkpɔ isop, ada ɔsɔk oku: ndien oku edisio isop esie abaŋa ndudue esie oro enye mikoho koi idue, mikonyuŋ ifiɔkke, ndien eyefen enye.

¹⁹Oro edi ŋkpɔ isop: enye edue isop ɔnɔ Jehovah.