Read efik LEVITICUS 8 Bible Online

LEVITICUS 8 - efik bible

LEVITICUS 8

¹EKEM Jehovah ɔdɔhɔ Moses, ete, Da Aaron ye nditɔ esie ŋko, ye edisine-ŋkpɔ oro,

²ye aran-nyere, ye abak ayara enaŋ uwa idiɔk ido, ye okukim iba, ye akpan uyo eke leaven miduhe;

³nyuŋ bon kpukpru mbon esop ke enyin-usuŋ efe esop.

⁴Ndien Moses anam kpa nte Jehovah ɔkɔdɔhɔde enye; ndien mbon esop esop idem ke enyin-usuŋ efe esop.

⁵Ndien Moses ɔdɔhɔ esop, ete, Emi edi se Jehovah owukde ete nnyin inam.

⁶Ndien Moses ada Aaron ye nditɔ esie edi, onyuŋ eyet mmɔ mmɔŋ.

⁷Ndien enye ada frock esine enye ke idem, onyuŋ ɔbɔp enye ubɔp-isin, onyuŋ ɔfɔri enye ekura, onyuŋ esine enye ephod, ɔbɔp enye ubɔp-ephod, onyuŋ akpaha enye idem ke esit.

⁸Ndien ɔkɔŋɔ enye mbana-ikpanesit; onyuŋ esin URIM ye THUMMIM ke mbana-ikpanesit.

⁹Ndien enye ada mitre ayara enye ke ibuot; onyuŋ ada ubak gold, kpa edisana anyanya oro, adian ke mitre ke ɔkpɔ-iso esie; nte emi Jehovah okowukde Moses.

¹⁰Ndien Moses ada aran-nyere eyet ebiet-iduŋ, ye kpukpru ŋkpɔ eke edude ke esit, onyuŋ anam mmɔ esana.

¹¹Enye onyuŋ osime ndusuk aran ke itie-uwa utim ikatiaba, onyuŋ eyet itie-uwa oro, ye kpukpru ŋkpɔ esie, ye akpaŋ-kpaŋ, ye ukot esie, onyuŋ anam mmɔ esana.

¹²Ndien enye ada aran-nyere ɔtɔhɔ Aaron ke ibuot eyet enye ntem, onyuŋ onim enye ke edisana.

¹³Ndien Moses ada nditɔ Aaron edi, esine mmɔ frock ke idem, onyuŋ akpaha mmɔ ubɔp-isin, ndien ada uyaribuot ayara mmɔ; kpa nte Jehovah okowukde Moses.

¹⁴Ndien enye ada enaŋ uwa idiɔk ido edi; ndien Aaron ye nditɔ esie eda ubɔk edori enaŋ uwa idiɔk ido ke ibuot.

¹⁵Ndien ewot enye: ndien Moses emen iyip ke nnuenubɔk esie, ekeyet ke nduk itie-uwa akan okuk, onyuŋ osio itie-uwa idiɔk efep, ndien aŋwaŋa iyip ɔduɔk ke ukot itie-uwa, onyuŋ onim enye ke edisana ŋkpɔ, onyuŋ osio enye isop efep.

¹⁶Ndien enye ada ofuri ikpɔŋ emi ɔfuhɔde ke ŋkpɔ esit idibi, ye caul emi adianade ke esit, ye ekput mbiba, ye ikpɔŋ mmɔ, ndien Moses ɔfɔp mmɔ ke itie-uwa.

¹⁷Edi enye emen enaŋ, ye ikpa esie, ye unam esie, ye ifuɔ esie, aka ɔkɔfɔp ke ikaŋ ke edem nna; kpa nte emi Jehovah okowukde Moses.

¹⁸Ndien enye ada okukim edifɔp uwa edi; ndien Aaron ye nditɔ esie eda ubɔk mmɔ edori okukim ke ibuot.

¹⁹Ndien ewot enye; ndien Moses osime iyip ke itie-uwa akanade okuk.

²⁰Enyuŋ ebak okukim esin ke mbak esie; ndien Moses ɔfɔp ibuot, ye mbak oro, ye ikpɔŋ.

²¹Ndien enye eyet ŋkpɔ esit idibi, ye nnuk ke mmɔŋ; Moses onyuŋ ɔfɔp ofuri okukim ke itie-uwa: ekedi edifɔp uwa edinem utebe, uwa ikaŋ Jehovah; kpa nte Jehovah eketemede Moses.

²²Ndien enye ada okukim eken, okukim eriyɔhɔ ubɔk, edi: ndien Aaron ye nditɔ esie eda ubɔk mmɔ edori okukim ke ibuot.

²³Ndien ewot enye; Moses onyuŋ ada ndusuk iyip esie, ɔtɔi Aaron ke mben utɔŋ nnasia, ye ke nnuenubɔk obodom nnasia, ye ke nnuenukot obodom nnasia.

²⁴Ndien enye ada nditɔ Aaron edi, ndien Moses ada iyip ɔtɔi mmɔ ke mben utɔŋ nnasia, ye ke nnuenubɔk obodom ubɔk nnasia, ye ke nnuenukot obodom nnasia: ndien Moses osime iyip ke itie uwa akanade okuk.

²⁵Ndien enye ada ikpɔŋ, ye isim, ye ofuri ikpɔŋ emi ɔfuhɔde ke ŋkpɔ esit idibi, ye caul emi adianade esit, ye ekput mbiba, ye ikpɔŋ mmɔ, ye afara nnasia:

²⁶enye onyuŋ osio obukpa kiet eke leaven miduhe, ke akpan uyo emi leaven miduhe, emi anade ke iso Jehovah, ye obukpa aran kiet, ye mfefere uyo kiet, ndien ada mmɔ odori ke ikpɔŋ oro, ye ke afara nnasia;

²⁷ndien emen kpukpru esin Aaron ke ubɔk ye ke ubɔk nditɔ esie, ndien ofuŋ mmɔ ke edifuŋ uwa ke iso Jehovah.

²⁸Ndien Moses ɔbɔ mmɔ ke ubɔk mmɔ, aka ɔkɔfɔp ke itie uwa ke enyɔŋ edifɔp uwa: mmɔ edi ŋkpɔ eriyɔhɔ ubɔk, ke edinem utebe: enye edi uwa ikaŋ Jehovah.

²⁹Ndien Moses emen ikɔŋesit, onyuŋ ofuŋ enye ke edifuŋ uwa ke iso Jehovah: ubak okukim eriyɔhɔ ubɔk emi edi udeme Moses; kpa nte emi Jehovah eketemede Moses.

³⁰Ndien Moses ada ndusuk aran-nyere, ye eke iyip emi odorode ke itie-uwa, osime Aaron, ye edisine-ŋkpɔ esie, ye nditɔ esie, ye edisine-ŋkpɔ nditɔ esie ŋko; onyuŋ onim Aaron, ye edisine-ŋkpɔ esie, ye nditɔ esie, ye edisine-ŋkpɔ nditɔ esie ŋko ke edisana ŋkpɔ.

³¹Ndien Moses ɔdɔhɔ Aaron ye nditɔ esie, ete, Mbufo etem unam oro ekpere enyin-usuŋ efe esop; ndien do ke mbufo edita enye, ye uyo emi odude ke akpan eriyɔhɔ ubɔk, kpa nte ŋketemede, nte, Aaron ye nditɔ esie eta enye.

³²Ndien mbufo eda unam ye uyo eke ɔsuhɔde efɔp ke ikaŋ.

³³Mbufo ekunyuŋ edaŋa ke enyin-usuŋ efe esop ke ofuri usen itiaba, tutu osim ke usen eke mme usen eriyɔhɔ ubɔk mbufo ekurede: koro ke ofuri usen itiaba ke enye edisuk ɔyɔhɔ mbufo ubɔk.

³⁴Kpa nte emi enye anamde mfin, Jehovah omowuk ete enam kpasuk ntre, man osio isop mbufo.

³⁵Mbufo etie ndien ke enyin-usuŋ efe esop ke ofuri usen itiaba, ke uwemeyo ye ke okoneyo, enyuŋ ekpeme item Jehovah, man mbufo ekukpa: koro ntem ke eketeme mi.

³⁶Ndien Aaron ye nditɔ esie enam kpukpru ŋkpɔ eke Jehovah okowukde ke ubɔk Moses.