Read efik JEREMIAH 1 Bible Online

JEREMIAH 1 - efik bible

JEREMIAH 1

¹IKƆ Jeremiah eyen Hilkiah, emi okotode mme oku oro edude ke Anathoth ke isɔŋ Benjamin:

²emi uyo Jehovah osimde enye ke eyo Josiah eyen Amon edidem Judah, ke ɔyɔhɔ isua ubɔŋ esie duopeta:

³onyuŋ osim enye ke eyo Jehoiakim eyen Josiah edidem Judah, tutu osim ke utit ɔyɔhɔ isua Zedekiah eyen Josiah edidem Judah duopekiet, tutu osim ke ini oro etaŋde Jerusalem efep ke ɔyɔhɔ ɔfiɔŋ ition.

⁴Ndien uyo Jehovah edisim mi ete,

⁵Ke mmeŋka-mbotke fi kaŋa ke idibi, mma mfiɔk fi; ke afo muka-unyuŋ utoho ke itieeyen, mma ndianare fi nnim nte prophet nnɔ mme idut.

⁶Ndien ami ndɔhɔ, nte, Aha, Ɔbɔŋ Jehovah! sese, mfiɔkke nditiŋ ikɔ: koro ami ndide eyen-ɔwɔŋ.

⁷Ndien Jehovah ɔdɔhɔ mi, ete, Kudɔhɔ ete, “Ami ndi eyen-ɔwɔŋ:” koro afo eyesaŋa kpukpru utom eke ndidɔŋde fi, eyenyuŋ etiŋ kpukpru se ndiwukde fi.

⁸Kufehe iso mmɔ; koro ami ndude ye afo ndinyaŋa fi; Jehovah ɔdɔhɔ.

⁹Ndien Jehovah anyanare ubɔk esie otuk mi inua. Jehovah onyuŋ ɔdɔhɔ mi, ete, Sese, mmesin fi ikɔ mi ke inua.

¹⁰Sese, mfin emi mmonim fi nte akan mme idut ye mme obio, onyuŋ odibere onyuŋ owuri, nte osobo onyuŋ abiat, nte ɔbɔp onyuŋ ɔtɔ.

¹¹Ndien uyo Jehovah edisim mi, ete, Afo okut nso ŋkpɔ, Jeremiah? Ndien ndɔhɔ nte, Nsehe eto almond ke ami ŋkut.

¹²Ndien Jehovah ɔdɔhɔ mi, ete, Afo omotim okut: koro ami mbabak ndemere mbaŋa ikɔ mi man nnam enye.

¹³Ndien uyo Jehovah ɔtɔŋɔ ntak osim mi, ete, Afo okut nso? Ndien ndɔhɔ nte, Eso eke ofutde ke ami ŋkut; ndien inua esie akabare ese edem edere.

¹⁴Ndien Jehovah ɔdɔhɔ mi, ete, Idiɔk ŋkpɔ eyesiaha ke edem edere odoro kpukpru mme andiduŋ isɔŋ.

¹⁵Koro, sese, ami mmɔŋ ŋkot kpukpru mme ubon mme idut edem edere, Jehovah ɔdɔhɔ; ndien mmɔ eyedi, kpukpru mmɔ eyenyuŋ ediɔk ebekpo mmɔ ke inua-otop Jerusalem, ye ke enyɔŋ kpukpru ibibene esie ekan ekuk, ye ke kpukpru mme obio Judah.

¹⁶Ndien nyetiŋ ikpe mi ye mmɔ, mbaŋa ofuri idiɔk ido mmɔ: koro mmɔ ekpɔŋde mi, enyuŋ efɔpde incense enɔ abasi efen, enyuŋ etuakde ibuot enɔ se ubɔk mmɔ ekenamde.

¹⁷Afo, ndien, bɔbɔ mbɔbɔ ke isin fo, nyuŋ daha da, nyuŋ nam kpukpru se ami nditemede fi tiŋ nɔ mmɔ: kuyak esit ɔduɔ fi ubaŋa mmɔ, mbak ami ndinam esit ɔduɔ fi ke iso mmɔ.

¹⁸Ndien, sese, mfin emi ami nnim fi ke obio ibibene, ye ke adaha ukwak, ye ke ibibene okpoho, mbaŋa ofuri isɔŋ emi, mbaŋa ndidem Judah ye mbɔŋ mmɔ ye mme oku mmɔ ye mbio-obio.

¹⁹Ndien mmɔ eyeŋwana ekɔŋ ye afo; edi idikemeke ubɔk ye afo; koro ami ndude ye afo, man nnyaŋa fi: uyo Jehovah edi emi.