Read efik JEREMIAH 13 Bible Online

JEREMIAH 13 - efik bible

JEREMIAH 13

¹NTEM ke Jehovah ɔdɔhɔ mi, ete, Ka kada ubɔp-isin fo a-linen ke idem fo, nyuŋ bɔbɔ enye ke isin fo, ndien kusin enye ke mmɔŋ.

²Ntre ke ami nda ubɔp-isin oro ke uyo Jehovah, ndien mbɔbɔ enye ke isin mi.

³Ekem uyo Jehovah ɔtɔŋɔ ntak osim mi, ete,

⁴da ubɔp-isin emi afo akadade, emi ɔbɔbɔde fi ke isin, nyuŋ daha ke enyɔŋ ka ke Euphrates, nyuŋ dip enye do ke usiaha itiat kiet.

⁵Ndien ŋka ŋkodip enye ke mben Euphrates, kpa nte emi Jehovah eketemede mi.

⁶Edikem ke utit ediwak usen, Jehovah ɔdɔhɔ mi, ete, daha ke enyɔŋ ka ke Euphrates, ndien men ubɔp-isin oro ŋkowukde fi nte odip enye do, fep ke esit.

⁷Ndien ŋka Euphrates, ŋketibi, nnyuŋ mmen ubɔp-isin mfep ke ebiet oro ŋkedipde enye ke esit: ndien, sese, ubɔp-isin oro amabiara, ifɔnke ke baba ŋkpɔ kiet.

⁸Ndien uyo Jehovah osim mi, ete,

⁹Ntem ke Jehovah ɔdɔhɔ, ete, Kpa ntem ke ami ndisobo iseri Judah, ye akwa iseri Jerusalem.

¹⁰Mme idiɔk mbio-obio emi minyimeke ndikop ikɔ mi, emi esaŋade ke itun esit mmɔ, enyuŋ ebinede abasi efen, enyuŋ enam ŋkpɔ mmɔ, enyuŋ etuak ibuot enɔ mmɔ, kpa mmɔ eyebiet ubɔp-isin emi mifɔnke ke baba nkpɔ kiet.

¹¹Koro kpa nte ubɔp-isin ɔbɔbɔde owo ke isin, kpasuk ntre ke ŋkada ofuri ufɔk Israel ye ofuri ufɔk Judah mbɔbɔ ke idem mi, Jehovah ɔdɔhɔ; man mmɔ ekpedi okimmɔ ke ikɔt, ye ke enyiŋ, ye ke itoro, ye ke ubɔŋ: edi mmɔ ikokopke.

¹²Tiŋ ndien ikɔ emi nɔ mmɔ, ete, Ntem ke Jehovah Abasi Israel ɔdɔhɔ, ete, Wine eyeyɔhɔ ke kpukpru ikpa: ndien mmɔ eyedɔhɔ fi, ete, Nte nnyin itimke ifiɔk, ite ke wine ediyɔhɔ ke kpukpru ikpa?

¹³Ndien dɔhɔ mmɔ, ete, Ntem ke Jehovah ɔdɔhɔ, ete, Sese ami nyeda mmin nnɔ kpukpru mme andiduŋ isɔŋ emi, ye ndidem emi etiede ke ibuot David ke ebekpo esie, ye mme oku, ye mme prophet, ye kpukpru mme andiduŋ Jerusalem, eŋwɔŋ ekpa.

¹⁴Ndien ami nyeyibi mmɔ kiet kiet nnuak, ye mme ete ye nditɔ ɔtɔ kiet, Jehovah ɔdɔhɔ: ndiyakke, ndinyuŋ nnyeneke mbɔm, ndinyuŋ ntuaha mbɔm, edi nyesobo mmɔ.

¹⁵Mbufo ekop, enyuŋ ekpaŋ utɔŋ: ekuseri iseri: koro Jehovah ɔmɔdɔhɔ.

¹⁶Mbufo enɔ Jehovah Abasi ubɔŋ, ke ebiet mika-ikimke kaŋa, ke ukot mbufo mika-ituahake ke obot okoneyo, ndien mbufo edori enyin ebet uŋwana, edi enye eyenam enye edi mfut mkpa, onyuŋ esin enye okim eti-eti.

¹⁷Edi mbufo minyimeke ndikop enye, ukpɔŋ mi eyetua eyet ke ndibe abaŋa ntaŋidem mbufo; eyenyuŋ eseme eti-eti, mmɔŋeyet eyenyuŋ oto mi ke enyin ɔsuhɔre: koro etaŋde otu ufene Jehovah efep.

¹⁸Dɔhɔ edidem ye ɔbɔŋ-aŋwan, ete, Mbufo esuhɔre etie; koro anyanya ubɔŋ mbufo otode mbufo ke ibuot ɔduɔ ke isɔŋ.

¹⁹Mme obio ke edem usuk emesire, baba owo kiet inyuŋ ikpɔhɔkede: emetaŋ ofuri Judah efep, etaŋ mmɔ efep ema.

²⁰Mbufo emenere enyin mbufo enyuŋ ese, mmɔ ke eto ke edem edere edi: enye otu ufene oro ekenɔde fi, kpa ediye otu ufene fo?

²¹Afo edidɔhɔ didie ke ini eke enye edinɔde fi ufen? (Ŋkɔm afo amayak mmɔ emehe ndida ata ubɔŋ fo:) nte ubiak idimumke fi nte omumde ŋwan uman?

²²Ndien emi afo ɔdɔhɔde ke esit fo, ete, “Nsinam ŋkpɔ emi etienede mi?” Uwak mme idiɔk ido fo esin efuhɔre ɔfɔŋ-idem fo, enyuŋ eyarare fi nditiŋ-ikpat.

²³Nte eyen Ethiopia ekeme ndikpuhɔre ikpɔhidem esie? Nte ekpe ekeme ndipuhɔre ntɔi esie? Ndien mbufo ŋko emi emehede ndinam idiɔk eyekeme ndinam eti.

²⁴Ndien ami nyesuan mmɔ, kpa nte ofum wilderness ɔkpɔride mbio efep.

²⁵Emi edi afia fo, udeme emi ndomode nnɔ fi, Jehovah ɔdɔhɔ; koro afo emefre mi, omonyuŋ ɔbuɔt idem ke nsu.

²⁶Ndien ŋko ami nyesio fi ɔfɔŋ-idem fo ke idem, nda mfuk fi iso, ndien owo eyekut esuene fo.

²⁷Mmokut efibe fo, ye uyo use fo, ye nte afo asaŋade akpara oburobut, ye mbubiam fo ke enyɔŋ ikpɔ obot ke iŋwaŋ. Osuk ɔdɔdiɔk ɔnɔ fi, Jerusalem; adaŋa didie ke afo edisuk esin ndisana?