Read efik JEREMIAH 20 Bible Online

JEREMIAH 20 - efik bible

JEREMIAH 20

¹EKEM Pashhur eyen Immer oku emi edide akpan etubom ufɔk Jehovah, okop nte Jeremiah etiŋde prophecy emi.

²Ndien Pashhur amia Jeremiah prophet, onyuŋ esin enye ke ebuka oro odude ke enyɔŋ-enyɔŋ inua-otop Benjamin emi odude ke ufɔk Jehovah.

³Edikem mkpɔŋ, Pashhur osio Jeremiah ke ebuka. Ndien Jeremiah ɔdɔhɔ enye, ete, Jehovah ikotke aba enyiŋ fo, ite, Pashhur (uforo kpukpru,) edi okot, ete, Margor-missabib (ndik akan okuk.)

⁴Koro ntem ke Jehovah ɔdɔhɔ ete, Sese, ami mmɔŋ nnim fi ke ŋkpɔ ndik nnɔ idem fo, ye kpukpru mme ufan fo; ndien mmɔ eyekpaŋa ke ofut mme usua mmɔ, enyin fo eyenyuŋ ekut; nyenyuŋ nda ofuri Judah nsin ke ubɔk edidem Babylon; ndien enye eyetaŋ mmɔ ɔnyɔŋ ke Babylon, onyuŋ owot mmɔ ke ofut.

⁵Ndien nyeda ofuri inyene obio emi, ye ofuri utom esie, ye kpukpru ŋkpɔ-uto esie, nnyuŋ nda kpukpru inyene oro ndidem Judah ekenimde, nsin ke ubɔk mme asua mmɔ ndien mmɔ eyebume mmɔ, enyuŋ eda mmɔ ebiom enyɔŋɔ ke babylon.

⁶Ndien ama edi afo, Pashhur, ye kpukpru mme andiduŋ ufɔk fo, mbufo eyeka ke otu mbon ntaŋ-mfep; ndien afo eyesim Babylon, onyuŋ akpa do, onyuŋ ɔbuhɔ do, afo, ye kpukpru mme ufan fo emi afo etiŋde nsunsu o-prophecy ɔnɔ mmɔ.

⁷Afo akatap mi. O Jehovah, ndien ami ŋkop nnɔ fi: afo ɔkɔsɔŋ ebe mi, onyuŋ akan mi ubɔk: ami ŋkabare ndi ŋkpɔ eke esakde ofuri usen, kpukpru owo ebiaŋa mi.

⁸Koro toto ke ini oro ŋkɔdɔhɔde, mfiori, nseme afai ye mbume; koro uyo Jehovah akabarede edi se edade esuene mi, enyuŋ esin mi ke ndek kpukpru usen.

⁹Ndien ndɔhɔ nte, Ndisiakke aba enye, ndinyuŋ ndɔhɔke aba ke enyiŋ esie. Ndien ŋkpɔ odu mi ke esit nte ikaŋ eke asakde, esine mi ke ɔkpɔ, ndien ŋŋwana ndimum idem mi ŋkama, tutu akak:

¹⁰koro ŋkopde ikɔ-edem ediwak owo: ndik odu ke edem kpukpru: ete, “Mbufo etiŋ, ndien nnyin iyetiŋ ibaŋa enye.” Kpukpru mme ufan mi ekpeme iduɔ mi, ete, Mme eyekeme nditap enye, ndien nnyin iyekan enye ubɔk, inyuŋ isio usiene nnyin ye enye.

¹¹Ndien Jehovah odu ye ami nte owo uko eke enyenede ndik: mmɔdo mmɔ eke ekɔbɔde mi eyeduɔŋɔ, idinyuŋ ikanke: but eyenam mmɔ eti-eti, koro mmɔ mikekwe unen: ke edi nsinsi o-but, owo idifreke enye.

¹²Ndien, O Jehovah mme udim, emi odomode edinen owo, onyuŋ okutde ekput ye esit, yak ŋkut usiene eke afo edisiode ye mmɔ: koro mmayarare ikɔ mi nnɔ fi.

¹³Mbufo ekwɔ enɔ Jehovah, mbufo etoro Jehovah: koro enye anyaŋade ukpɔŋ eyen-ubuene osio mme idiɔk owo ke ubɔk.

¹⁴Osuk ɔdɔdiɔk ɔnɔ usen oro ŋkamanade ke esit: yak usen oro eka mi akamande mi okudi se etorode.

¹⁵Osuk ɔdɔdiɔk ɔnɔ owo oro ɔkɔtɔtde ete, mi, ete, “Eyen-eren amamana ɔnɔ fi,” ke adat enye esit.

¹⁶Yak owo oro onyuŋ ebiet mme obio eke Jehovah okosobode, ndien mituaha mkpɔfiɔk: enye onyuŋ okop mfiori ke usenubɔk, ye mkpo ke ini ufɔt uwemeyo.

¹⁷Koro enye mikowotke mi ke itie-eyen; ndien eka mi ekpedi udi mi, enye okponyuŋ oyomo idibi ke nsinsi.

¹⁸Nsinam emi ŋkotode ke itie-eyen ndikut ukut ye ubaha, man mme usen mi ekpetak ke but?