Read efik JEREMIAH 21 Bible Online

JEREMIAH 21 - efik bible

JEREMIAH 21

¹IKƆ emi okoto Jehovah osim Jeremiah, ke ini oro Zedekiah edidem ɔkɔdɔŋde Pashhur eyen Malchijah, ye Zephaniah eyen Maaseiah oku utom ke ɔtɔ esie, ete,

²Mbɔk, bup Jehovah baŋa nnyin: koro Nebuchadrezzar edidem Babylon ke aŋwana ekɔŋ ye nnyin; mme Jehovah eyenam ye nnyin nte asaŋade ye kpukpru mme utibe ŋkpɔ esie, man enye ɔkpɔŋ nnyin ɔdɔk.

³Ndien Jeremiah ɔdɔhɔ mmɔ, ete, Ntem ke mbufo edidɔhɔ Zedekiah, ete,

⁴Ntem ke Jehovah Abasi Israel ɔdɔhɔ, ete, Sese, ami mmɔŋ ŋkabare ŋkpɔ ekɔŋ emi edude mbufo ke ubɔk, emi mbufo edade eŋwana ekɔŋ ye edidem Babylon ye mme Chaldean emi ekande mbufo ekuk ke edem ibibene, efiak edem, ndien nyebon mmɔ ke ufɔt obio emi.

⁵Ndien ami nyeŋwana ekɔŋ ye mbufo ke edinyanare ita, ye ke ɔkpɔsɔŋ ubɔk, ye ke akwa iyaresit ye ifuresit ye ikpahesit.

⁶Nyenyuŋ ntɔ mme andiduŋ obio emi, ye owo, ye ufene: mmɔ eyekpaŋa ke akwa udɔŋɔ.

⁷Jehovah onyuŋ ɔdɔhɔ ete, Ke ini ŋkpɔ oro ebede, nyeda Zedekiah, edidem Judah, ye ikɔt esie, ye mbio-obio, ye mmɔ eke udɔŋɔ ye ofut ye akaŋ esuhɔde ke obio emi, nsin Nebuchadrezzar edidem Babylon ke ubɔk, ye ke ubɔk mme asua mmɔ, ye ke ubɔk mmɔ eke eyomde uwem mmɔ: ndien enye eyekpeŋe mmɔ ke iso ofut; idituaha mmɔ, idinyuŋ iyakke mmɔ, idinyuŋ inyeneke mbɔm.

⁸Ndien dɔhɔ mbio-obio emi, ete, Ntem ke Jehovah ɔdɔhɔ, ete, Sese, ami mmɔŋ nnim usuŋ uwem ye usuŋ mkpa ke iso mbufo.

⁹Owo eke editiede ke obio emi eyekpa ke ofut, ye ke biɔŋ, ye ke udɔŋɔ: edi owo eke ɔwɔrɔde akadian idem ye mme Chaldean emi ekande mbufo ekuk, eyedu uwem, onyuŋ ada uwem esiemɔ ke mbume.

¹⁰Koro mmowuk iso mi nse obio emi, nte nnam enye ɔdiɔk, nnamke enye eti ŋkpɔ, Jehovah ɔdɔhɔ: eyeda enye esin ke ubɔk edidem Babylon, ndien enye eyefɔp enye ke ikaŋ.

¹¹Ndien dɔhɔ ufɔk edidem Judah, ete, Mbufo ekop uyo Jehovah;

¹²O ufɔk David, ntem ke Jehovah ɔdɔhɔ ete, Mbufo ebiere ikpe ke usenubɔk, enyuŋ esio owo eke ebumede ke ubɔk andituk, mbak ifuresit mi ediwɔrɔ nte ikaŋ onyuŋ asak, baba owo kiet eke onimede idinyuŋ iduhe, kabaŋa mme idiɔk ido mbufo.

¹³Sese, ami mmɔŋ nnam ikɔ ye afo, O andiduŋ ebedeŋ, ye akwa itiat una-isɔŋ, Jehovah ɔdɔhɔ; mbufo emi edɔhɔde ete, Anie edisuhɔre ke ɔtɔ nnyin? Anie edinyuŋ oduk ke ebiet iduŋ nnyin?

¹⁴Ndien nyenɔ mbufo ufen nte asaŋade ke mfri ido mbufo: nyenyuŋ mbara ikaŋ ke akai esie, ndien enye eyeta kpukpru se ikande enye ikuk: uyo Jehovah edi emi.