Read efik JEREMIAH 23 Bible Online

JEREMIAH 23 - efik bible

JEREMIAH 23

¹JEHOVAH ɔdɔhɔ ete, Osuk ɔdɔdiɔk ɔnɔ mme ɔbɔk erɔŋ eke esobode enyuŋ esuande ufene emi ami mbɔkde.

²Mmɔdo ntem ke Jehovah Abasi Israel ɔdɔhɔ abaŋa mme ɔbɔk erɔŋ emi ebɔkde ikɔt mi, ete: Mbufo emesuan ufene mi, enyuŋ ebin mmɔ efep, inyuŋ itiŋke mmɔ enyin ise: sese, ami nyenɔ mbufo ufen mbaŋa idiɔk ido mbufo: emi edi uyo Jehovah.

³Ndien ami nyetaŋ ufene mi emi esuhɔde ke kpukpru mme idut eke mbinde mmɔ nsin do, mbon, nyenyuŋ nda mmɔ mfiak ke ebiet nna mmɔ; ndien mmɔ eyetɔt enyuŋ ewak.

⁴Ndien nyedori mme ɔbɔk eke edibɔkde mmɔ, ndien mmɔ idifeheke aba ndik, idem idinyuŋ ikpaha aba mmɔ, mmɔ idinyuŋ isopke: ke edi Jehovah ɔdɔhɔ.

⁵Jehovah ɔdɔhɔ, ete, Sese, usen ke edi eke ndinamde edinen nsehe otibe ɔnɔ David, ndien edidem kiet eyeda ubɔŋ, onyuŋ okut unen, onyuŋ anam edinen ikpe ke isɔŋ.

⁶Ke eyo esie ke edinyaŋa Judah, Israel eyenyuŋ oduŋ ke ifure: ndien emi edi enyiŋ eke edisiode enye, JEHOVAH EDINEN IDO NNYIN.

⁷Jehovah ɔdɔhɔ ete, Mmɔdo, sese, mme usen ke edi eke mmɔ mididɔhɔke aba, ite, Ma uwem Jehovah, emi okosiode ubon ufɔk Israel ke isɔŋ Egypt ɔdɔk;

⁸edi eyedɔhɔ ete, Ma uwem Jehovah emi okosiode ubon ufɔk Israel efep ke isɔŋ edere, ye ke kpukpru mme idut eke ŋkebinde mmɔ nsin do, ada ɔdɔk; ndien mmɔ eyeduŋ ke isɔŋ mmɔ.

⁹Esit ɔbuŋɔ mi ke idem abaŋa mme prophet; kpukpru mme ɔkpɔ mi enyek; ŋkabare mbiet owo eke akpade mmin, mbiet owo eke mmin akande, mbaŋa Jehovah ye edisana ikɔ esie.

¹⁰Koro mme esin-efibe eyɔhɔde ke isɔŋ; koro isɔŋ atuade abaŋa isuŋi; mbiet wilderness emesat, ndien ido mmɔ ɔdiɔk, odudu mmɔ inyuŋ inenke.

¹¹Koro mme prophet ŋko ye mme oku esuk enanam oburobut: kpa ke ufɔk mi ke ŋkut idiɔk ido mmɔ; Jehovah ɔdɔhɔ.

¹²Mmɔdo usuŋ mmɔ eyetie ye mmɔ nte mfɔfiɔnɔ ebiet ke ekim; eyebin mmɔ, ndien mmɔ eyeduɔŋɔ ke esit; koro nyeda idiɔk-ŋkpɔ, kpa isua ufen mmɔ, ntiene mmɔ: uyo Jehovah edi emi.

¹³Ŋkokut oburobut ŋkpɔ ke mme prophet Samaria; mmɔ eda Baal etiŋ prophecy, enyuŋ esin ikɔt mi Israel edue:

¹⁴ndien ŋkut ata ŋkpɔ ndidien ke mme prophet Jerusalem; ke esin efibe, ke esaŋa ke nsu; mmɔ enyuŋ esɔŋɔ mme idiɔk owo ubɔk, ndien owo ndomo kiet ikabakede ikpɔŋ idiɔk ido esie; kpukpru mmɔ etie ye ami nte Sodom, mme andiduŋ enye enyuŋ ebiet Gomorrah.

¹⁵Mmɔdo ntem ke Jehovah mme udim ɔdɔhɔ abaŋa mme prophet, ete, Sese, mmɔŋ nnɔ mmɔ wormwood edia, nnyuŋ nnɔ mmɔ mmɔŋ etidot eŋwɔŋ: koro oburobut ido otode mme prophet Jerusalem osim ofuri isɔŋ.

¹⁶Ntem ke Jehovah mme udim ɔdɔhɔ, ete, Mbufo ekukop ikɔ mme prophet emi etiŋde prophecy enɔ mbufo: mmɔ esin mbufo edama idat: etiŋ ŋkukut eke otode mmɔ ke esit, itoho Jehovah ke inua.

¹⁷Mmɔ esuk edɔhɔ ye mmɔ eke esinde mi ke ndek, ete, Jehovah ɔdɔhɔ, ete, Mbufo eyenyene emem; enyuŋ edɔhɔ kpukpru owo eke esaŋade ke itun esit mmɔ, ete, “Baba idiɔk-ŋkpɔ kiet idisimke mbufo.”

¹⁸Koro anie akada ke odu Jehovah, onyuŋ okut, onyuŋ okop uyo esie? Anie akakpaŋ utɔŋ ke ikɔ esie, onyuŋ okop?

¹⁹Sese, oyobio Jehovah ɔwɔrɔ ke iyaresit, kpa ibumere-ibumere oyobio: eyebumere ɔtɔ mme idiɔk owo ke ibuot.

²⁰Iyaresit Jehovah idikabakede, tutu enye anam, onyuŋ ama uduak esit esie: mbufo eyetim efiɔk enye ke utit mme usen oro.

²¹Ami ŋkɔdɔŋke mme prophet oro utom, ndien mmɔ efeŋe, ŋkɔdɔhɔke ye mmɔ, ndien mmɔ etiŋ prophecy.

²²Ekpedi nte, mmɔ ekedade ke odu mi, enyuŋ enamde ikɔt mi ekop ikɔ mi, mmɔ ekpekabare mmɔ ndien esio ke idiɔk usuŋ mmɔ, ye ke idiɔk ido mmɔ.

²³Jehovah ɔdɔhɔ, ete, Nte ami ndi Abasi mkpet-mkpet, ndien ndige Abasi nsan-nsan?

²⁴Jehovah ɔdɔhɔ ete, Nte owo ekeme ndidibe ke ndibe ebiet eke ami mmendikwe enye? Jehovah ɔdɔhɔ, ete, Nte ami nyɔhɔke ke ofuri enyɔŋ ye isɔŋ?

²⁵Mmokop uyo mme prophet emi etiŋde nsunsu o-prophecy ke enyiŋ mi, ete, “Mmadaba ndap, mmadaba ndap.”

²⁶Adaŋa didie ke ŋkpɔ emi edidu ke esit mme prophet emi etiŋde nsu-nsu o-prophecy? enyuŋ etiŋde abiaŋa esit mmɔ ke prophecy?

²⁷Emi ekerede ete ke mmimɔ iyenam ikɔt mi efre enyiŋ mi ke ndap mmɔ eke mmɔ etiŋde kiet ye kiet, kpa nte Baal ekesinde mmɔ efre enyin mi.

²⁸Yak prophet eke ndap odude ye enye etiŋ ndap; ndien yak owo eke ikɔ mi odude ye enye, etiŋ ikɔ mi akpan-akpan. Ikpɔk ibokpot asaŋa nso ye idem ibokpot? Jehovah ɔdɔhɔ.

²⁹Jehovah ɔdɔhɔ, ete, Nte ikɔ mi ibietke ikaŋ? nte ibietke hammer eke obomde akamba itiat?

³⁰Jehovah ɔdɔhɔ ete, Mmɔdo, sese, ami mmɔŋ nnam ikɔ ye mme prophet, emi eyipde ikɔ mi kiet ye mbɔhiduŋ esie.

³¹Jehovah ɔdɔhɔ ete, Sese, ami mmɔŋ nnam ikɔ ye mme prophet emi edade edeme mmɔ edɔhɔ, ete, Enye ɔdɔhɔ.

³²Jehovah ɔdɔhɔ ete, Sese, mmɔŋ nnam ikɔ ye mmɔ eke etiŋde nsunsu ndap, enyuŋ ebukde mmɔ, enyuŋ enamde ikɔt mi edue ke nsu mmɔ ye ke use mmɔ; ndien ami ndɔŋke mmɔ, nnyuŋ ŋwukke mmɔ; ndien mmɔ ididoroke mbio emi baba udori. Ke edi Jehovah ɔdɔhɔ.

³³Ndien ke ini mbio-obio emi edide prophet, onyuŋ edide oku, edibupde fi, ete, Nsidi uyo Jehovah? Dɔhɔ mmɔ, ndien, ete, Nso uyo? Ŋkɔm nyekpɔŋ mbufo: Jehovah ɔdɔhɔ.

³⁴Ndien ama edi prophet, ye oku, ye mbio-obio emi, edidɔhɔde, ete, “Uyo Jehovah,” nyenɔ owo oro ufen, kpa owo ye ufɔk esie.

³⁵Ntem ke mbufo edidɔhɔ kiet ye mbɔhiduŋ esie, ye owo ye eyen-eka esie, ete, Jehovah ɔbɔrɔ didie? Jehovah onyuŋ ɔdɔhɔ didie?

³⁶Ndien mbufo iditiŋke aba uyo Jehovah: koro ikɔ owo eyedi uyo (Jehovah) esie; ndien mbufo emeyut ikɔ Abasi uwem, kpa eke Jehovah mme udim, Abasi nnyin.

³⁷Dɔhɔ ntem ye prophet, ete, Jehovah ɔkɔbɔrɔ fi didie? Jehovah okonyuŋ ɔdɔhɔ didie?

³⁸Ndien edieke mbufo edidɔhɔde, ete, “Uyo Jehovah”: mmɔdo ntem ke Jehovah ɔdɔhɔ ete, Koro mbufo edɔhɔde ikɔ emi, ete, Uyo Jehovah; ndien ami ndɔŋ ekedɔhɔ mbufo, ete, Mbufo ekudɔhɔ ete, Uyo Jehovah; mmɔdo, sese,

³⁹ami nyefre mbufo tak-tak nnyuŋ nsio mbufo ye obio emi ŋkɔnɔde mbufo ye mme ete mbufo ke iso mi nduɔk:

⁴⁰nyenyuŋ nnim mbufo ke ŋkpɔ nsinsi but, ye nsinsi esuene, eke owo midifreke.