Read efik JEREMIAH 24 Bible Online

JEREMIAH 24 - efik bible

JEREMIAH 24

¹JEHOVAH okowut mi ŋkpɔ, ndien, sese, akpasa fig iba ke ediɔhɔ ke iso temple Jehovah, ke adaŋemi Nebuchadrezzar, edidem Babylon, ama akataŋ Jeconiah eyen Jehoiakim edidem Judah, ye mbɔŋ Judah, ye mbon-usɔ, ye mme andidom utim, ke Jerusalem efep, onyuŋ ada mmɔ ɔnyɔŋ ke Babylon.

²Fig akpasa kiet ɔfɔn eti-eti, ebiet ŋwara-ndat fig: fig akpasa eken ediɔk ekaha, eke mikemeke ndidia, koro mmɔ ediɔkde ntem.

³Ndien Jehovah ɔdɔhɔ mi, ete, Jeremiah, afo okut nso? Ndien mbɔrɔ nte. Fig: mme fig eke efɔnde ke efɔn ekan: eke ediɔkde enyuŋ ediɔk ekan, eke owo mike-meke ndidia: koro ediɔkde ntem.

⁴Ndien uyo Jehovah osim mi, ete, Ntem ke Jehovah Abasi Israel ɔdɔhɔ ete,

⁵Nte nti fig emi, kpa ntre ke ndidiɔŋɔ mbon ntaŋ-mfep Judah, emi mbinde ke ebiet emi mfep nsin ke isɔŋ Babylon, ke mfɔn.

⁶Nyenyuŋ ŋwuk enyin nse mmɔ ke mfɔn, nnyuŋ nda mmɔ mfiak ke isɔŋ emi: nnyuŋ mbɔp mmɔ, ndien ŋwurike, nnyuŋ ntɔ mmɔ ke isɔŋ, ndien ndibekede.

⁷Ndien nyenɔ mmɔ esit eke ɔfiɔkde mi, ete ke ami ndi Jehovah: ndien mmɔ eyedi ikɔt mi, ami nyenyuŋ ndi Abasi mmɔ: koro mmɔ eyefiak etiene mi ke ofuri esit mmɔ.

⁸Ndien ama edi mme idiɔk fig emi owo mikemeke ndidia, koro mmɔ ediɔkde; ŋkɔm ntem ke Jehovah ɔdɔhɔ, ete, Ke ntre ke ndiyak Zedekiah, edidem Judah, ye mbɔŋ esie, ye nditɔ Jerusalem efen emi esuhɔde ke isɔŋ emi, ye emi eduŋde ke isɔŋ Egypt:

⁹nyeda mmɔ nnɔ ndutuhɔ ye idiɔk-ŋkpɔ ke kpukpru mme idut ererimbot, ke kpukpru ebiet eke ndibinde mmɔ nsin do.

¹⁰Nyenyuŋ ndɔŋ ofut, ye biɔŋ, ye idiɔk udɔŋɔ etiene mmɔ, tutu mmɔ etaha ekure ke isɔŋ emi ŋkɔnɔde mmɔ ye mme ete mmɔ.