Read efik JEREMIAH 29 Bible Online

JEREMIAH 29 - efik bible

JEREMIAH 29

¹NDIEN mme mmɔ emi edi ikɔ ŋwed oro Jeremiah prophet ɔkɔnɔde ke Jerusalem esɔk mbiowo mbon ntaŋ-mfep emi esuhɔde, ye mme oku, ye mme prophet, ye kpukpru owo oro Nebuchadnezzar akataŋde ke Jerusalem ɔnyɔŋ ke Babylon;

²(ke Jeconiah edidem, ye ɔbɔŋ-aŋwan, ye mme eunuch, mbɔŋ Judah ye Jerusalem, ye mbon-usɔ, ye mme odom-utim ewɔŋɔde ke Jerusalem ema:)

³ke ubɔk Elasah eyen Shaphan, ye eke Gemariah eyen Hilkiah, emi Zedekiah edidem Judah ɔdɔŋde utom ke Babylon ke ɔtɔ Nebuchadnezzar edidem Babylon, ete:

⁴Ntem ke Jehovah mme udim, Abasi Israel, ɔdɔhɔ ye ofuri mbon ntaŋ-mfep oro ŋkataŋde ke Jerusalem nnyɔŋ ke Babylon, ete;

⁵Mbufo ebɔp ufɔk enyuŋ eduŋ ke esit; enyuŋ etɔ iŋwaŋ mfri eto, enyuŋ edia mfri mmɔ;

⁶edɔ iban, enyuŋ ebon nditɔ-iren ye nditɔ-iban; enyuŋ eda iban enɔ nditɔ-iren mbufo enyuŋ eda nditɔ-iban mbufo enɔ owo, man mmɔ eman nditɔ-iren ye nditɔ-iban; man mbufo enyuŋ ewak do, ndien ekukpri.

⁷Mbufo enyuŋ eyom ifure obio emi ŋkataŋde mbufo mfep nsin do, enyuŋ ekpe Jehovah ubɔk enɔ enye: koro mbufo edikutde ifure ke ifure esie.

⁸Koro ntem ke Jehovah mme udim Abasi Israel ɔdɔhɔ, ete, Mbufo ekuyak mme prophet mbufo emi edude ke otu mbufo, ye mbia-idiɔŋ mbufo, ebiaŋa mbufo, ekunyuŋ ekop ndap mbufo emi mbufo esinde mmɔ edaba.

⁹Koro mmɔ etiŋde nsu-nsu o-prophecy enɔ mbufo ke enyiŋ mi: ndɔŋke mmɔ; Jehovah ɔdɔhɔ.

¹⁰Koro ntem ke Jehovah ɔdɔhɔ, ete, Ke adaŋemi ekemde ke isua ata ye duop ke Babylon, nyedi ndise mbufo, nnyuŋ nnam eti ikɔ mi ɔsɔŋɔ ada ye mbufo, nnyuŋ nda mbufo mfiak ndi ke ebiet emi.

¹¹Koro ami mmɔfiɔk ekikere emi ŋkerede mbaŋa mbufo, Jehovah ɔdɔhɔ, ekikere emem, idige eke idiɔk, man nnɔ mbufo utit ye idorienyin.

¹²Ndien mbufo eyefiori ekot mi, enyuŋ eka ekekpe mi ubɔk, ndien nyekop uyo mbufo.

¹³Ndien mbufo eyeyom mi, enyuŋ ekut mi, koro mbufo edibinede mi ke ofuri esit mbufo.

¹⁴Jehovah ɔdɔhɔ, ete, Mbufo eyenyuŋ ekut mi; ndien ami nyeyak mbufo eto ke itie mbuot-ekɔŋ enyɔŋ edi, nnyuŋ ntaŋ mbufo ke kpukpru mme idut, ye ke kpukpru ebiet eke mbinde mbufo nsin do, ndibon, Jehovah ɔdɔhɔ; nyenyuŋ nda mbufo mfiak ndi ke ebiet eke ŋkayakde mmɔ etaŋ mbufo ke esit efep.

¹⁵Emi mbufo edɔhɔde, ete, Jehovah omonim prophet ɔnɔ nnyin ke Babylon, (ekukop):

¹⁶koro ntem ke Jehovah ɔdɔhɔ edidem emi etiede ke ebekpo David, ye kpukpru owo emi eduŋde ke obio emi, nditɔ-ete mbufo emi miketieneke mbufo iwɔŋɔ ika ke otu mbon ntaŋ-mfep:

¹⁷ntem ke Jehovah mme udim ɔdɔhɔ, ete, Sese, ami mmɔŋ ndɔŋ ofut ye biɔŋ ye udɔŋɔ utom ke otu mmɔ, nnyuŋ nnim mmɔ ke mme idiɔk fig eke mikemeke ndidia, koro ediɔkde.

¹⁸Nyenyuŋ nda ofut, ye biɔŋ, ye idiɔk udɔŋɔ mbine mmɔ, nnyuŋ nnim mmɔ ke ŋkpɔ ndutime nnɔ kpukpru mme idut ke ererimbot, ye ke isuŋi, ye ke nsobo, ye ke nsi, ye ke esuene ke otu kpukpru mme idut eke mbinde mmɔ nsin do:

¹⁹koro mmɔ mikekopke uyo mi (Jehovah ɔdɔhɔ), ke ini oro ŋkɔdɔŋde ikɔt mi mme prophet utom ke ɔtɔ mmɔ, mbabak ndɔŋ: ndien mbufo ikopke, Jehovah ɔdɔhɔ.

²⁰Mbufo ekop ndien uyo Jehovah, kpukpru mbufo mbon ntaŋ-mfep emi ŋkebinde mfep ke Jerusalem eka Babylon:

²¹ntem ke Jehovah mme udim, Abasi Israel, ɔdɔhɔ Ahab eyen Kolaiah, ye Zedekiah eyen Maaseiah, emi eketiŋde nsunsu o-prophecy enɔ mbufo ke enyiŋ mi: sese, nyemen mmɔ nsin Nebuchadrezzar edidem Babylon ke ubɔk; ndien enye eyewot mmɔ ke iso mbufo.

²²Ndien kpukpru nditɔ Judah oro eketaŋde efep emi edude ke Babylon, eyeda mmɔ ikɔ isuŋi ke idem, ete, “Yak Jehovah osuk onim fi nte Zedekiah, ye nte Ahab emi edidem Babylon ɔkɔfɔpde ke ikaŋ.”

²³Koro mmɔ ekenamde oburobut ido ke Israel, enyuŋ esinde efibe ye iban mbɔhiduŋ mmɔ, enyuŋ edɔhɔde ikɔ nsu esin ke enyiŋ mi, eke mme-ŋketemeke mmɔ; ami mmonyuŋ mfiɔk, nnyuŋ ndi ntiense: ke edi Jehovah ɔdɔhɔ.

²⁴Nyuŋ dɔhɔ Shemaiah Nehelamite, ete,

²⁵Ntem ke Jehovah mme udim Abasi Israel ɔdɔhɔ, ete, Koro afo ekewetde ŋwed ke enyiŋ fo ɔnɔ esɔk kpukpru owo eke edude ke Jerusalem, ye Zephaniah eyen Maaseiah oku, ye kpukpru mme oku, ete;

²⁶“Jehovah okonim fi ke oku ke ibuot Jehoiada oku, man mme etubom ekpedu ke ufɔk Jehovah, ebaŋa kpukpru owo eke edamade idat, enyuŋ enimde idem mmɔ ke prophet, man afo onyuŋ esin mmɔ ke ebuka ye ke ufɔk ukwak.”

²⁷Nsinam ndien afo mukaduarike Jeremiah eyen Anathoth, emi onimde idem esie ke prophet ɔnɔ mbufo?

²⁸Koro emi ekesin enye ɔnɔ ŋwed esɔk nnyin ke Babylon, ete, Eyebigi: mbufo ebɔp ufɔk enyuŋ eduŋ, enyuŋ etɔ iŋwaŋ enyuŋ edia mfri mmɔ.

²⁹Ndien Zephaniah oku okot ŋwed emi esin ke utɔŋ Jeremiah prophet.

³⁰Ekem uyo Jehovah osim Jeremiah, ete, Dɔŋ ekedɔhɔ kpukpru mbon ntaŋ-mfep, ete,

³¹Ntem ke Jehovah ɔdɔhɔ Shemaiah Nehelamite, ete, Koro Shemaiah etiŋde prophecy ɔnɔ mbufo, ndien ami mmeŋkɔdɔŋke enye utom, ndien enye esin mbufo ebuɔt idem ke nsu:

³²mmɔdo ntem ke Jehovah ɔdɔhɔ ete, Sese, ami mmɔŋ nda ufen ntiene Shemaiah Nehelamite ye ubon esie: enye idinyeneke baba owo kiet eke editiede ke otu mbio-obio emi; idinyuŋ ikwe mfɔn eke ami ndinamde ye mbio-obio emi; koro enye ɔkɔdɔhɔde ikɔ emiom ye Jehovah. Uyo Jehovah edi emi.