Read efik JEREMIAH 32 Bible Online

JEREMIAH 32 - efik bible

JEREMIAH 32

¹IKƆ emi okoto Jehovah osim Jeremiah ke ɔyɔhɔ isua Zedekiah edidem Judah, duop, isua oro edi ɔyɔhɔ isua Nebuchadrezzar efureta.

²Ndien ke ini oro mbon-ekɔŋ edidem Babylon ekan Jerusalem ekuk: ndien ekɔbi Jeremiah prophet ebaha ke okure ufɔk ukwak, emi odude ke ufɔk edidem Judah.

³Koro Zedekiah edidem Judah ɔkɔkɔbide enye abaha, ete, Afo anam didie etiŋ prophecy, ete, Ntem ke Jehovah ɔdɔhɔ, ete, Sese, ami mmɔŋ nda obio emi nsin edidem Babylon ke ubɔk, ndien enye eyeda enye;

⁴Zedekiah edidem Judah idinyuŋ ibɔhɔke mme Chaldean ke ubɔk; koro enye miditreke ndisine edidem Babylon ke ubɔk, eyenyuŋ eneme ye enye inua ye inua, enyin esie eyenyuŋ okut enyin enye eken;

⁵ndien enye eyeda Zedekiah aka ke Babylon, ndien enye eyedu do tutu ami ndi ndise enye; Jehovah ɔdɔhɔ koro mbufo eyeŋwana ekɔŋ ye mme Chaldean, edi idikwe unen.

⁶Ndien Jeremieh ɔdɔhɔ ete, Uyo Jehovah omosim mi, ete,

⁷Sese, Hanamel eyen Shallum, eyen-ete usɔ eyedi ke ɔtɔ fo, ete, Dep iŋwaŋ mi emi odude ke Anathoth ke idem fo: koro ufak enyenede fi nte edepde enye.

⁸Ekem Hanamel eyen-ete ete mi edisim mi ke okure ufɔk ukwak, ekem ke uyo Jehovah, ndien ɔdɔhɔ mi, ete, Mbɔk, dep iŋwaŋ mi emi odude ke Anathoth, emi odude ke isɔŋ Benjamin: koro enyenede fi ndida enye nnyene, ufak onyuŋ enyene fi; dep enye ke idem fo.

⁹Ndien ndifiɔk, nte ke uyo Jehovah edi oro. Ndien ndep iŋwaŋ oro ke ubɔk Hanamel eyen eyen-ete ete mi, emi odude ke Anathoth, nnyuŋ ndomo silver nnɔ enye, kpa shekel silver efureba.

¹⁰Ndien ŋwet nsin ke ŋwed, mbɔp nsin idiɔŋɔ, nnyuŋ ŋkot ntiense edi, nnyuŋ ndomo silver ke ŋkpɔ udomo.

¹¹Ndien nda ŋwed udep oro, kiet emi ebɔpde esin idiɔŋɔ, nte etemede enyuŋ ewukde, ye eken emi anade iŋwaŋ:

¹²ndien mmen ŋwed udep oro nnɔ Baruch, eyen Neriah, eyen Mahseiah, ke iso Hanamel eyen eyen-ete ete mi, ye ke iso ntiense oro ekewetde ke ŋwed udep oro, ye ke iso kpukpru mme Jew eke etiede ke okure ufɔk ukwak.

¹³Ndien nteme Baruch ke iso mmɔ, nte,

¹⁴Ntem ke Jehovah mme udim Abasi Israel ɔdɔhɔ, ete, Bɔ mi ŋwed emi, ŋwed udep emi, kpa kiet emi ebɔpde esin idiɔŋɔ, ye kiet emi anade iŋwaŋ; nnyuŋ sin mmɔ ke abaŋ mbat eso, man ebigi ediwak usen.

¹⁵Koro ntem ke Jehovah mme udim Abasi Israel ɔdɔhɔ ete, Eyetɔŋɔ ntak edep ufɔk ye iŋwaŋ ye iŋwaŋ-vine ke isɔŋ emi.

¹⁶Ndien ke adaŋemi mma ŋkɔnɔ Baruch eyen Neriah ŋwed udep oro, ŋkpe Jehovah ubɔk, nte,

¹⁷Ah, Ɔbɔŋ Jehovah, sese, afo akanam enyɔŋ ye isɔŋ ke akwa odudu fo, ye ke edimenere ubɔk fo, baba ŋkpɔ kiet inyuŋ isɔŋke ikan fi:

¹⁸emi anamde ima ye mme tɔsin owo, onyuŋ osiode usiene idiɔk ido mme ete esin ke ikpanesit nditɔ mmɔ eke etienede mmɔ edem; Akwa ye Ɔkpɔsɔŋ Abasi Jehovah mme udim edi enyiŋ esie:

¹⁹omokpon ke item, onyuŋ ɔsɔŋ ke utom, emi enyin fo etarade ese kpukpru usuŋ nditɔ owo, ndinɔ kpukpru owo nte ekemde ke usuŋ mmɔ ye utip utom mmɔ:

²⁰emi okonimde mme idiɔŋɔ ye mme utibe ŋkpɔ ke isɔŋ Egypt tutu osim mfin emi, ye ke Israel, ye ke otu owo efen, onyuŋ anam enyiŋ ɔnɔ idem fo, kpa nte edide mfin emi;

²¹onyuŋ ada ikɔt fo Israel ke isɔŋ Egypt ɔwɔrɔ, ke mme idiɔŋɔ, ye ke mme utibe ŋkpɔ, ye ke ɔkpɔsɔŋ ita, ye ke edimenere ubɔk, ye ke akwa ndik;

²²onyuŋ ɔnɔ mmɔ isɔŋ emi afo ɔkɔŋwɔŋɔde ɔnɔ mme ete mmɔ, ete iyenɔ mmɔ, isɔŋ eke ɔfiɔrɔde mmɔŋeba ye aran-ɔkwɔk:

²³ndien mmɔ eduk edida enye enyene; ndien mmɔ ikopke uyo fo, inyuŋ isaŋake ke ibet fo; mmɔ inamke kpukpru se afo okowukde mmɔ, ete enam: ndien afo anam ofuri idiɔk-ŋkpɔ emi osim mmɔ.

²⁴Sese, mme ibombom emesim obio, man mmɔ eda enye: ndien emen obio esin ke ubɔk mme Chaldean, emi eŋwanade ekɔŋ ye enye ke ofut ye ke biɔŋ ye ke udɔŋɔ: ndien se afo ɔkɔdɔhɔde omosu: ndien, sese, afo omokut.

²⁵Edi, O Ɔbɔŋ Jehovah, afo ɔkɔdɔhɔ mi, ete, Dep iŋwaŋ ke idem fo ke okuk, nyuŋ kot ntiense edi, ndien emeda obio emi esin mme Chaldean ke ubɔk.

²⁶Ekem uyo Jehovah osim Jeremiah, ete,

²⁷Sese, ami Jehovah ndi Abasi ofuri obukidem: nte ŋkpɔ ekededi ɔsɔŋ akan mi?

²⁸Mmɔdo ntem ke Jehovah ɔdɔhɔ, ete, Sese, ami mmɔŋ nda obio emi nsin mme Chaldean ke ubɔk, ye ke ubɔk Nebuchadrezzar edidem Babylon; ndien enye eyeda enye:

²⁹ndien mme Chaldean eke eŋwanade ekɔŋ ye obio emi, eyedi edikim ikaŋ ke obio emi, enyuŋ efɔp enye, ye ufɔk oro mmɔ ekefɔpde ŋkpɔ ke enyɔŋ ɔkɔm mmɔ enɔ Baal, enyuŋ ɔtɔhɔde ediŋwɔŋ uwa mmɔ enɔ abasi efen, man eyat mi esit.

³⁰Koro nditɔ Israel ye nditɔ Judah esuk enam idiɔk-idiɔk ke iso mi, toto ke ini uyen mmɔ: koro nditɔ Israel esuk eyeyat mi esit ke se ubɔk mmɔ enamde; Jehovah ɔdɔhɔ.

³¹Koro obio emi ama edi ŋkpɔ iyaresit mi ye ifuresit mi toto ke usen oro ekebɔpde enye, tutu osim mfin emi; man mmen enye ke iso mi mfep:

³²mbaŋa ofuri idiɔk ido nditɔ Israel, ye eke nditɔ Judah, emi mmɔ enamde ndiyat mi esit, mmɔ ye ndidem mmɔ, ye ikpɔ owo mmɔ, ye mme oku mmɔ, ye mme prophet mmɔ, ye mbio Judah, ye mme andiduŋ Jerusalem.

³³Ndien mmɔ ekabare obot itɔŋ enɔ mi, ikabakede iso: okposuk edi nte ŋkpepde mmɔ, mbabak ŋkpep, edi mmɔ ikopke, inyuŋ ibɔhɔ item.

³⁴Ndien mmɔ esin ŋkpɔ mbubiam mmɔ ke ufɔk emi ekerede enyiŋ mi, enyuŋ esabare enye.

³⁵Mmɔ enyuŋ ebɔp edikoŋ ebiet Baal oro odude ke itihere eyen Hinnom, enyuŋ enam nditɔ-iren mmɔ ye nditɔ-iban mmɔ ebe eduk ke esit ikaŋ enɔ Molech, eke mme ŋkowukke mmɔ, enye mikonyuŋ idukke mi esit: mmɔ enam ido mbubiam emi, man esin Judah enam idiɔk.

³⁶Ke emi ndien, ntem ke Jehovah Abasi Israel ɔdɔhɔ obio emi mbufo edɔhɔde, ete, Ke eda enye esin ke ubɔk edidem Babylon, ke ofut, ye ke biɔŋ, ye ke udɔŋɔ;

³⁷sese, ami nyetaŋ mmɔ ke kpukpru mme idut emi ŋkebinde mmɔ nsin do, ke iyaresit mi, ye ke ifuresit mi, ye ke akwa ikpahesit, mbon; ndien nda mmɔ mfiak ke ɔtɔ emi, nnyuŋ nyak mmɔ eduŋ ke ifure.

³⁸Ndien mmɔ eyedi ikɔt mi, ami nyenyuŋ ndi Abasi mmɔ:

³⁹nyenyuŋ nnɔ mmɔ esit kiet ye usuŋ kiet, man ebak mi kpukpru ini, man ɔfɔn ye mmɔ ye nditɔ mmɔ emi editienede mmɔ ke edem.

⁴⁰Nyenyuŋ nnim nsinsi ediomi ye mmɔ, nte ndikabakede ŋkpɔŋ mmɔ, ntre ndifɔn ye mmɔ; nyenyuŋ nda uteŋe mi nsin mmɔ ke esit, man ekukabare ekpɔŋ mi.

⁴¹Ndien nyedat esit mbaŋa mmɔ ndifɔn ye mmɔ, nnyuŋ ntɔ mmɔ ke isɔŋ emi ke akpanikɔ, ye ke ofuri esit mi, ye ke ofuri ukpɔŋ mi.

⁴²Koro ntem ke Jehovah ɔdɔhɔ, ete, Kpa nte ŋkadade ofuri akamba idiɔk-ŋkpɔ emi ntiene mbio-obio emi, kpa ntre ke ndida ofuri nti ŋkpɔ emi ndɔhɔde mmɔ ntiene mmɔ.

⁴³Ndien eyedep iŋwaŋ ke isɔŋ emi mbufo edɔhɔde ete, “Enye omo sobo; ndien owo ye ufene iduhe ke esit; emeda enye esin mme Chaldean ke ubɔk.”

⁴⁴Eyedep iŋwaŋ ke okuk, enyuŋ ewet ŋwed, enyuŋ ebɔp esin idiɔŋɔ, enyuŋ ekot ntiense, ke isɔŋ Benjamin, ye ke edem emi akande Jerusalem okuk, ye ke mme obio Judah, ye ke mme obio obot, ye ke mme obio una-isɔŋ edem inyaŋ, ye ke mme obio edem usuk: koro nyeda mmɔ ke itie mbuot-ekɔŋ mfiak ndi: emi edi uyo Jehovah.