Read efik JEREMIAH 34 Bible Online

JEREMIAH 34 - efik bible

JEREMIAH 34

¹UYO emi okoto Jehovah osim Jeremiah, ke ini Nebuchadnezzar edidem Babylon ye ofuri mbon-ekɔŋ esie, ye kpukpru mme idut ke edem emi ubɔk esie akarade, ye kpukpru mme obio, eŋwanade ekɔŋ ye Jerusalem, ye kpukpru mme obio mmɔ, ete,

²Ntem ke Jehovah Abasi Israel ɔdɔhɔ, ete, Ka kɔdɔhɔ ikɔ ye Zedekiah edidem Judah, nyuŋ tiŋ ntem nɔ enye, ete Ntem ke Jehovah ɔdɔhɔ, ete, Sese, ami mmɔŋ nda obio emi nsin edidem Babylon ke ubɔk, ndien enye eyefɔp enye ke ikaŋ.

³Ndien afo udubɔhɔke enye ke ubɔk, koro mmɔ eyemum fi, eyenyuŋ eda fi esin enye ke ubɔk; ndien enyin fo eyekut enyin edidem Babylon, inua esie eyenyuŋ eneme ye inua fo, ndien afo eyesim Babylon.

⁴Edi, O Zedekiah edidem Judah, kop uyo Jehovah; ntem ke Jehovah ɔdɔhɔ abaŋa fi, ete, Afo udukpaha ke ofut:

⁵afo eyekpa ke emem: ndien kpa nte ekefɔpde ŋkpɔ enɔ mme usɔ, ndidem eyo oko oro ekebemde fi iso, kpa ntre ke edifɔp ŋkpɔ enɔ fi: eyenyuŋ etuaŋa fi, ete, “Ah, ɔbɔŋ!” koro edi ami ndɔhɔ ikɔ. Emi edi uyo Jehovah.

⁶Ndien Jeremiah prophet etiŋ kpukpru ikɔ emi ɔnɔ Zedekiah edidem Judah ke Jerusalem;

⁷ndien mbon-ekɔŋ edidem Babylon eŋwana ekɔŋ ye Jerusalem, ye kpukpru mme obio Judah eke esuhɔde, kpa ye Lachish ye Azekah; koro mmɔ oro esuhɔde ke otu mme obio Judah eke edide obio ibibene.

⁸Uyo emi okoto Jehovah osim Jeremiah ke adaŋemi edidem Zedekiah okodiomide ama ye kpukpru owo eke edude ke Jerusalem, ete ekwɔrɔ uwɔrɔ ufin enɔ mmɔ;

⁹ete kpukpru owo kiet kiet eyak ofin eren mmɔ, ye owo kiet kiet ofin aŋwan mmɔ eke edide Hebrew eren ye Hebrew aŋwan ewɔrɔ ufin: ekunim mmɔ ke ifin, owo baba kiet okunim Jew eyen-ete esie ke ofin.

¹⁰Ndien kpukpru mbɔŋ ekop, ye kpukpru owo eke edukde ke ediomi, ete kiet kiet eyak ofin eren mmɔ, ye kiet kiet ofin aŋwan mmɔ ewɔrɔ ufin, ekunyuŋ enim aba mmɔ ke ifin, ndien mmɔ ekop, enyuŋ eyak mmɔ ewɔrɔ.

¹¹Ndien ke ini oro ebede, mmɔ etɔŋɔ ntak enam ifin iren mmɔ ye ifin iban mmɔ oro mmɔ ekeyakde ewɔrɔ ke ufin, efiak, enyuŋ enim mmɔ ke ifin iren ye ke ifin iban ke ŋkan-ubɔk.

¹²Ekem uyo Jehovah oto Jehovah edisim Jeremiah, ete,

¹³Ntem ke Jehovah Abasi Israel ɔdɔhɔ, ete, Ami ŋkodiomi ediomi ye mme ete mbufo ke usen oro ŋkosiode mmɔ ke isɔŋ Egypt ke ufɔk ufin, nte,

¹⁴Ke utit isua itiaba mbufo kpukpru esana eyen-ete mbufo, eyen Hebrew emi anyamde idem esie ɔnɔ mbufo eyak; ke adaŋemi enye anamde ŋkpɔ ke isua itiokiet, yak enye ɔwɔrɔ ufin ɔkpɔŋ ebiet mbufo: ndien mme ete mbufo ikopke uyo mi, inyuŋ ikpaŋke utɔŋ mmɔ.

¹⁵Ndien mbufo ema ekabare mfin, ema enyuŋ enam se inende ke iso mi, enyuŋ ekwɔrɔ uwɔrɔ-ufin kpukpru kiet kiet enɔ mbɔhiduŋ mbufo; ema enyuŋ ediomi ediomi ke iso mi ke ufɔk emi ekerede enyiŋ mi:

¹⁶ndien mbufo etɔŋɔ ntak esabare enyiŋ mi, enyuŋ enam ifin iren mbufo ye ifin iban mbufo, emi mbufo ekeyakde ewɔrɔ ufin, nte mmɔ emade, efiak, enyuŋ ekan mmɔ ubɔk, ete edi ifin iren mbufo ye ifin iban mbufo.

¹⁷Mmɔdo ntem ke Jehovah ɔdɔhɔ, ete, Mbufo ikopke uyo mi ndikwɔrɔ uwɔrɔ ufin nnɔ nditɔ-ete mbufo ye mbɔhiduŋ mbufo: sese, Jehovah ɔdɔhɔ, ete, Ami mmɔŋ ŋkwɔrɔ ufin nnɔ mbufo nnɔ ofut ye idiɔk udɔŋɔ ye biɔŋ; nyenyuŋ nda mbufo nnɔ man edi se etukde ke kprukpru mme idut ererimbot.

¹⁸Ndien mmɔŋ nda mmɔ eke ebiatde ediomi mi, eke minimke ikɔ ediomi emi mmɔ ekediomide ke iso mi, enaŋ oro mmɔ ekesiakde ke mbak iba, ndien esaŋa ke ufɔk esie ebe, kpa mbɔŋ Judah,

¹⁹ye mbɔŋ Jerusalem, ye mme eunuch, ye mme oku ye kpukpru mbio-obio emi ekesaŋade ke ufɔt enaŋ oro ebe;

²⁰nyeda mmɔ nsin mme asua mmɔ ke ubɔk, ye ke ubɔk mmɔ eke eyomde uwem mmɔ; ndien mme okpo mmɔ eyekabare edi se inuen enyɔŋ ye mme unam isɔŋ ekpetade.

²¹Ndien nyeda Zedekiah edidem Judah ye ikpɔ owo esie, nsin mme asua mmɔ ke ubɔk, ye ke ubɔk mmɔ eke eyomde uwem mmɔ, ye ke ubɔk mbon-ekɔŋ edidem Babylon, emi ekpɔŋde mbufo edɔk.

²²Jehovah ɔdɔhɔ ete, Sese, ami mmɔŋ ŋwuk, nnyuŋ nda mmɔ mfiak ndi ke obio emi; ndien mmɔ eyeŋwana ekɔŋ ye enye, enyuŋ eda enye, enyuŋ efɔp enye ke ikaŋ: ndien nyenim mme obio Judah ke ŋkpɔ nsobo tutu anana owo eke oduŋde.