Read efik JEREMIAH 4 Bible Online

JEREMIAH 4 - efik bible

JEREMIAH 4

¹JEHOVAH ɔdɔhɔ ete, O Israel, afo ama afiak edi, fiak tiene mi: ama onyuŋ emen ŋkpɔ mbubiam fo ke iso mi efep, afo udusehekede.

²Afo onyuŋ ɔŋwɔŋɔ ete, Ma Jehovah, ke akpanikɔ ye ke ikpe ye ke edinen ido; ndien mme idut eyeda Enye ediɔŋ idem-mmɔ, enyuŋ ebure mbure ke Enye.

³Koro ntem ke Jehovah ɔdɔhɔ mbio Judah ye Jerusalem, ete, Mbufo efuŋ obufa iŋwaŋ ke idem mbufo, ndien ekusuan mkpasip ke ikɔt.

⁴O mbio Judah, ye mme andiduŋ Jerusalem, mbufo ena mbobi enɔ Jehovah, enyuŋ esibe esit mbufo edut efep: mbak ifiopesit mi ediwɔrɔ nte ikaŋ, onyuŋ ata, ndien baba owo kiet eke onimede iduhe, abaŋa mme idiɔk ido mbufo.

⁵Mbufo etiŋ ke Judah, enyuŋ ebuk ke Jerusalem, enyuŋ edɔhɔ, enyuŋ efuri ukorowo ke isɔŋ; efiori ɔkpɔsɔŋ, enyuŋ edɔhɔ ete, Mbufo esop idem, ndien yak nnyin iduk ke mme obio ibibene.

⁶Mbufo emenere banner ke enyɔŋ ke Zion: efeŋe itɔk: ekutuak eda: koro ami mmɔŋ nda idiɔk ye akwa ŋwure ke edem edere ndi.

⁷Lion oto ke mfuhɔ ikɔt esie ɔdɔk, andisobo mme idut onyuŋ otibi isaŋ; oto ke ebiet esie, ete inim isɔŋ fo ke nsobo; mme mbio fo eyebiara, ndien baba owo kiet eke oduŋde ididuhe.

⁸Mbufo eda ɔfɔŋ-ikpo ebɔbɔ ke idem ebaŋa ŋkpɔ emi, etuaŋa enyuŋ eseme: koro ifiopesit Jehovah midiwɔŋɔ-kede ikpɔŋ nnyin.

⁹Jehovah onyuŋ, ɔdɔhɔ, ete, Ama ekem ke usen oro, esit eyeduɔ edidem, esit eyenyuŋ ɔduɔ mbɔŋ; idem eyenyuŋ akpa mme oku, mme prophet eyenyuŋ eyik.

¹⁰Ndien ami ndɔhɔ, nte, Ah, Ɔbɔŋ Jehovah! ŋkɔm afo ama abiaŋa mbio-obio emi ye Jerusalem eti-eti, ete, Mbufo eyenyene emem: ndien ofut omosim ukpɔŋ (nnyin).

¹¹Ke ini oro eyedɔhɔ mbio-obio emi ye Jerusalem, ete, Edifiop ofum ŋkokoŋo ebiet ke wilderness ke edi ke usuŋ adiaha oruk mi, idige ndisak, inyuŋ idige ndinam asana;

¹²ofum eke akande mme mmɔ emi eyesim mi: ke emi ŋko ami nyenɔ uyo ikpe mbaŋa mmɔ.

¹³Sese, enye eyedɔk nte mbubit enyɔŋ, mme chariot esie eyenyuŋ ebiet oyobio: horse esie esɔp ukot nte ntrukpom.

¹⁴Ɔdɔdiɔk ye nnyin koro emesobo nnyin. O Jerusalem, yet esit fo idiɔk-ŋkpɔ fep, man enyaŋa fi. Adaŋa didie ke mme idiɔk ekikere fo ediduŋ fi ke esit?

¹⁵Koro uyo otode ke Dan etiŋ onyuŋ oto ke obot Ephraim obuk nnanenyin.

¹⁶Mbufo etɔt mme idut; sese, mbufo ekwɔrɔ ebaŋa Jerusalem, ete ke mbon ukuk-obio eto ke anyan idut edi, enyuŋ emenere uyo mmɔ efiori ebaŋa mme obio Judah.

¹⁷Kpa nte mme ekpeme-iŋwaŋ, kpa ntre ke mmɔ edikan enye ekuk: koro enye ama ɔsɔŋ ibuot ye ami; Jehovah ɔdɔhɔ.

¹⁸Usuŋ fo ye ido fo enam ŋkpɔ emi enɔ fi; emi oto ke idiɔk ido fo, koro enye ododoro, koro osimde fi ke esit.

¹⁹Nsia mi! nsia mi! ɔwɔŋ esit mi abiak mi; esit mi eseme ɔnɔ mi; ndidopke uyo, koro, O ukpɔŋ mi, ŋkopke uyo ukorowo ye mkpo ekɔŋ.

²⁰Mmɔ ebuk ŋwure ekɔrɔ ke ŋwure: koro ofuri isɔŋ amabiara: mme tent mi emebiara ke isɔrɔ kiet, mme ikpehe mi emebiara ke idaha kiet.

²¹Adaŋa didie ke ndikut banner, nnyuŋ ŋkop uyo ukorowo?

²²Koro ikɔt mi edide ndisime, mmɔ ifiɔkke mi; mmɔ edi nditeŋ nditɔ, inyuŋ inyeneke ibuot; etim efiɔk ndinam idiɔk, edi ifiɔkke ndinam eti.

²³Nse isɔŋ, ndien, sese, isɔŋ edi ikpikpu ye ukpɔk; nse ikpa-enyɔŋ, ndien uŋwana iduhe ke esit.

²⁴Nse ikpɔ obot, ndien sese, mmɔ enyek, kpukpru ŋkpri obot enyuŋ efefum.

²⁵Nse ndien, sese, baba owo kiet iduhe, kpukpru inuen enyɔŋ emenyuŋ edaŋa.

²⁶Nse, ndien, sese, eti iŋwaŋ amakabare edi wilderness, kpukpru obio esie enyuŋ ewure ke iso Jehovah, ye ke iso ata ifiopesit esie.

²⁷Koro ntem ke Jehovah ɔdɔhɔ ete, Ofuri isɔŋ eyebiara; edi ndinamke mma.

²⁸Emi eyesin isɔŋ atua, esin ikpa-enyɔŋ ke enyɔŋ ebire: koro mmɔdɔhɔ, mmaduak, ndien ndituaha mkpɔfiɔk, ndinyuŋ ŋkabakede ŋkpɔŋ enye.

²⁹Uyom mme horse ye eke mme otop-utiga eyesin ofuri obio efeŋe: mmɔ eduk ke mfuhɔ ikɔt, enyuŋ edɔk ke ikpɔ itiat: ekpɔŋ kpukpru obio, baba owo kiet eke oduŋde mmɔ ke esit inyuŋ iduhe.

³⁰Ndien afo andibiara edinam didie? Koro afo eyesine ididuot: koro afo eyeda mbana-ŋkpɔ o-gold abana idem, koro afo adade stibium awai enyin fo: eyenam idem fo eye ikpikpu: mmɔ eke emade fi esin fi, eyeyom uwem fo.

³¹Koro ŋkopde uyo ebiet aŋwan uman, ubiak ebiet eke ŋwan eke amande akpan eyen, uyo adiaha zion, enye eŋwek, anyan ekaubɔk esie; ete, “Mbɔm mi ndien: koro mme owot-owo esinde ukpɔŋ akpa mi.”