Read efik JEREMIAH 40 Bible Online

JEREMIAH 40 - efik bible

JEREMIAH 40

¹UYO emi okoto Jehovah osim Jeremiah, ke adaŋemi Nebuzaradan etubom mbon ukpeme idem edidem akasanade enye ke Ramah ayak, ke ama okomum enye; ndien ekekɔbi enye ke ŋkpɔkɔbi ke otu kpukpru mbon ntaŋ-mfep Jerusalem ye Judah oro etaŋde efep eka ke Babylon.

²Ndien etubom mbon ukpeme edidem ada Jeremiah edi, onyuŋ ɔdɔhɔ enye, ete, Jehovah Abasi fo ɔkɔdɔhɔ idiɔk-ŋkpɔ emi abaŋa ebiet emi.

³Jehovah ama onyuŋ ada edi, onyuŋ anam kpa nte enye ɔkɔdɔhɔde: koro mbufo ekenamde idiɔk ido ye Jehovah, mikonyuŋ ikopke uyo esie, mmɔdo ŋkpɔ emi osimde mbufo.

⁴Sese, ndien, mfin emi ŋkpɔhɔre fi ŋkpɔkɔbi emi edude fi ke ubɔk. Edieke afo amade nditiene mi ndi Babylon, di; ndien ami nyetiŋ fi enyin mi ke idem; edieke mumaŋa nditiene mi ndi Babylon, yak etie: sese, ofuri isɔŋ emi ana fi ke iso: ka ke ebiet ekededi eke ɔfɔnde onyuŋ enende fi ke enyin ndika do.

⁵Ndien ke enye (Jeremiah) mika-ibɔrɔke kaŋa, (enye eken ɔdɔhɔ, ete,) Fiak ka ke ɔtɔ Gedaliah eyen Ahikam, eyen Shapham, emi edidem Babylon onimde ke etubom mme obio Judah, nyuŋ tie ye enye ke otu mbio-obio; midige ntre, ka ke ebiet ekededi eke afo amade ndika do. Ndien etubom mbon ukpeme ɔnɔ enye udia usuŋ ye enɔ, onyuŋ ayak enye aka.

⁶Ndien Jeremiah aka ke ɔtɔ Gedaliah eyen Ahikam ke Mizpah; onyuŋ oduŋ ye enye ke otu mbon-obio eke esuhɔde ke isɔŋ.

⁷Ekem kpukpru mme etubom mbon-ekɔŋ emi edude ke iŋwaŋ mmɔ ye ikɔt mmɔ edikop, ete ke edidem Babylon okonim Gedaliah eyen Ahikam ke etubom ke isɔŋ, okonyuŋ ada iren-owo, ye iban ye nditɔwɔŋ, ye ndusuk mbon ubuene, ubak mmɔ emi miketaŋke ifep ika Babylon, onim ye enye;

⁸ndien mmɔ eka ke ɔtɔ Gedaliah ke Mizpah, kpa Ishmael eyen Nethaniah, ye Johanan ye Jonathan nditɔ Kareah, ye Seraiah eyen Tanhumeth, ye nditɔ Ephai Netophathite, ye Jezaniah eyen Maachathite kiet, mmɔ ye ikɔt mmɔ.

⁹Ndien Gedaliah eyen Ahikam eyen Shaphan, ɔŋwɔŋɔ ɔnɔ mmɔ ye ikɔt mmɔ, ete, Mbufo ekufehe ndinam ŋkpɔ nnɔ mme Chaldean: mbufo etie ke isɔŋ, enyuŋ edi ikɔt edidem Babylon, ndien eyefɔn ye mbufo.

¹⁰Ndien ama edi ami, sese, ami nduŋ ke Mizpah, man ndiɔŋ mme Chaldean eke edisimde nnyin itie; edi mbufo etaŋ wine ye mfri eto nda-eyo ye aran, esin ke ŋkpɔ mbufo, enyuŋ eduŋ ke mme obio mbufo emi mbufo edade.

¹¹Ndien ŋko kpukpru mme Jew eke edude ke Moab, ye ke otu nditɔ Ammon, ye ke Edom, ye eke edude ke kpukpru mme idut, edikop ete ke edidem Babylon ɔmɔsuhɔ ndusuk nditɔ Judah, onyuŋ onim Gedaliah eyen Ahikam, eyen Shaphan, ke etubom mmɔ;

¹²ndien kpukpru mme Jew eto ke kpukpru mme ebiet eke ekebinde mmɔ esin do, enyɔŋ edi ke isɔŋ Judah, etiene Gedaliah ke Mizpah, enyuŋ etaŋ ata ediwak wine ye mfri eto nda-eyo.

¹³Ndien Johanan eyen Kareah ye kpukpru mme etubom mbon ekɔŋ oro edude ke ikɔt, edisim Gedaliah ke Mizpah.

¹⁴Ndien mmɔ edɔhɔ enye, ete, Nte afo ufiɔkke ete ke Baalis, edidem nditɔ Ammon, ɔmɔdɔŋ Ishmael eyen Nethaniah utom, ete ediwot fi? Edi Gedaliah eyen Ahikam inimke uyo mmɔ ke akpanikɔ.

¹⁵Ndien Johanan eyen Kareah ɔdɔhɔ Gedaliah ndibe-ndibe ke Mizpah, ete, Mbɔk, yak ŋka ŋkowot Ishmael eyen Nethaniah, ndien baba owo kiet idifiɔkke: enye edinam didie owot fi, ofuri Judah emi ebonode ke ɔtɔ fo edinyuŋ esuana, ubak Judah emi ɔsuhɔde onyuŋ atak?

¹⁶Ndien Gedaliah eyen Ahikam ɔdɔhɔ Johana eyen Kareah, ete, Kunam ŋkpɔ emi: koro afo ososu abaŋa Ishmael.