Read efik JEREMIAH 42 Bible Online

JEREMIAH 42 - efik bible

JEREMIAH 42

¹NDIEN kpukpru mbɔŋ udim-ekɔŋ, ye Johanan eyen Kareah, ye Jezaniah eyen Hoshaiah, ye kpukpru owo, nkpri ye ikpɔ, esaŋa ekpere,

²edidɔhɔ Jeremiah prophet, ete, Mbɔk, yak mkpe-ubɔk nnyin ɔsuhɔre ana fi ke iso, nyuŋ kpe Jehovah Abasi fo ubɔk baŋa nnyin, baŋa kpukpru mmɔ eke esuhɔde mi: koro nnyin emi ikewakde isuhɔde esisit, kpa nte enyin fo okutde nnyin:

³man Jehovah Abasi fo owut nnyin usuŋ eke nnyin idisaŋade ke esit, ye ŋkpɔ eke nnyin idinamde.

⁴Ndien Jeremiah prophet ɔdɔhɔ mmɔ, ete, Mmokop; sese, ami nyekpe Jehovah Abasi mbufo ubɔk, nte ekemde ke uyo mbufo; ndien ama ekem nyesian mbufo kpukpru ikɔ emi Jehovah edibɔrɔde mbufo: ndidipke mbufo baba ikɔ kiet.

⁵Ndien mmɔ edɔhɔ Jeremiah, ete, Yak Jehovah edi ata akpan ntiense akpanikɔ ke ufɔt nnyin, ete ke nnyin iditreke ndinam kpukpru ikɔ emi Jehovah Abasi fo ɔdɔŋde fi utom ke ɔtɔ nnyin abaŋa.

⁶Edide eti onyuŋ edide idiɔk, nnyin iyekop uyo Jehovah Abasi nnyin, emi nnyin idɔŋde fi utom ke ɔtɔ esie; man ɔfɔn ye nnyin ke ini nnyin idikopde uyo Jehovah Abasi nnyin.

⁷Edikem ke utit usen duop uyo Jehovah osim Jeremiah.

⁸Ndien enye okot Johanan eyen Kareah, ye kpukpru mme etubom mbon-ekɔŋ emi edude ye enye, ye kpukpru owo, ŋkpri ye ikpɔ;

⁹ndien ɔdɔhɔ mmɔ, ete, Ntem ke Jehovah Abasi Israel emi mbufo ekedɔŋde mi utom ke ɔtɔ esie, ete nsuhɔre mkpe-ubɔk mbufo nnim enye ke iso, ɔdɔhɔ, ete,

¹⁰Edieke mbufo ediduŋde ke isɔŋ emi, ndien nyediɔŋ mbufo, ndiwurike, nyetɔ mbufo, ndidibekede: koro mbɔm idiɔk-ŋkpɔ oro nnamde mbufo anamde mi.

¹¹Mbufo ekufehe ndik ke iso edidem Babylon emi mbufo efehede enye; Jehovah ɔdɔhɔ ete, Mbufo ekufehe enye: koro ami ndude ye mbufo ndinyaŋa mbufo, ndinyuŋ nsio mbufo ke ubɔk esie.

¹²Ndien ami nyetua fi mbɔm, ndien enye eyetua fi mbɔm, onyuŋ ayak mbufo efiak ke isɔŋ mbufo.

¹³Edi edieke mbufo edidɔhɔde, ete, “Nnyin ididuŋke ke isɔŋ emi,” ndien mikopke uyo Jehovah Abasi mbufo;

¹⁴ete, Ih ih; edi nnyin iyeka isɔŋ Egypt, eke nnyin midikwe ekɔŋ, midinyuŋ ikopke uyom ukorowo, minyuŋ inanake udia, ndien iyetie do:

¹⁵mbufo, O nditɔ Judah emi esuhɔde, ekop ndien uyo Jehovah: ntem ke Jehovah mme udim Abasi Israel ɔdɔhɔ, ete, Edieke mbufo ediwukde iso mbufo, ete ika Egypt, ndien eka ndiduŋ do;

¹⁶ndien ama ekem, ofut emi mbufo efehede enye, eyesim mbufo do ke isɔŋ Egypt, biɔŋ emi mbufo ekedikhede ebaŋa, eyenyuŋ eyire mbufo ke edem do ke Egypt; ndien do ke mbufo edikpaŋa.

¹⁷Ndien ama ekem, kpukpru owo eke ekewukde iso mmɔ, ete ika Egypt ndiduŋ do, eyekpaŋa ke ofut, ye ke biɔŋ, ye ke udɔŋɔ; ndien baba owo mmɔ kiet idisuhɔke, idinyuŋ ibɔhɔke idiɔk-ŋkpɔ eke ami ndidade ntiene mmɔ.

¹⁸Koro ntem ke Jehovah mme udim Abasi Israel ɔdɔhɔ, ete, Kpa nte ŋkaŋwaŋade iyaresit mi ye ifuresit mi ke idem mme andiduŋ Jerusalem, kpa ntre ŋko ke ndiŋwaŋa mbufo iyaresit mi ke idem, ke mbufo ekade Egypt; ndien mbufo eyekabare edi ŋkpɔ isuŋi, ye nsobo, ye itɔk, ye esuene; idinyuŋ ikwe aba ebiet emi.

¹⁹Jehovah ɔmɔdɔhɔ abaŋa mbufo, nditɔ Judah emi esuhɔde, ete, Mbufo ekuka Egypt: mbufo etim efiɔk ete ke nteme mbufo mfin emi.

²⁰Koro mbufo ekeduede etuk ukpɔŋ mbufo: koro mbufo ekedɔŋde mi utom ke ɔtɔ Jehovah Abasi mbufo, ete, Kpe Jehovah Abasi nnyin ubɔk baŋa nnyin; nyuŋ sian nnyin kpukpru se Jehovah Abasi nnyin edidɔhɔde, ndien nnyin iyenam.

²¹Ndien mmasian mbufo mfin emi; ndien mbufo ikopke uyo Jehovah Abasi mbufo, inyuŋ ikopke baba ŋkpɔ kiet eke enye ɔkɔdɔŋde mi utom ke ɔtɔ mbufo abaŋa.

²²Mbufo efiɔk, ndien, ete ke mbufo eyekpa ke ofut, ye ke biɔŋ, ye ke udɔŋɔ, ke ebiet emi mbufo eyomde ndika ŋkoduŋ do.