Read efik JEREMIAH 48 Bible Online

JEREMIAH 48 - efik bible

JEREMIAH 48

¹NTEM ke Jehovah mme udim Abasi Israel ɔdɔhɔ abaŋa Moab, ete, Ɔdɔdiɔk ɔnɔ Nebo! koro ebumede enye: enam Kiriathaim but, enyuŋ eda enye: enam edikoŋ ebiet but ye ndik.

²Itoro Moab iduhe aba: mmɔ eduak idiɔk-ŋkpɔ ebaŋa enye ke Heshbon; ete, mbufo edi nnyin isibe enye ifep, man okudi aba idut. Eyenyuŋ ebiat fi, O Madmen; ofut eyebine fi ke edem.

³Uyo eseme oto ke Horonaim, mbume ye akwa ŋwure.

⁴Moab omowure; ŋkpri nditɔ esie enam owo ekop eseme.

⁵Koro ke obot Luhith ntua eyet ke ɔdɔdiɔŋ ɔdɔk; koro ke usuhɔre Horonaim mme asua ekop eseme ŋwure.

⁶Mbufo efeŋe, enyaŋa uwem mbufo, enyuŋ ebiet juniper ke wilderness.

⁷Ŋkɔm eyenyuŋ emum fi ŋko, koro afo ɔbuɔtde idem ke se afo akanamde ye ke inyene fo: eyenyuŋ etaŋ Chemosh efep ye mme oku esie, ye mbɔŋ esie, ini kiet.

⁸Ndien andibume eyesim kpukpru obio, baba obio kiet idinyuŋ ibɔhɔke: ndien itihere eyebiara, una-isɔŋ eyenyuŋ osobo, kpa nte Jehovah ɔkɔdɔhɔde.

⁹Mbufo enɔ Moab mba, man enye ɔwɔrɔ efe: ndien mme obio esie eyedobo, ndien owo eke oduŋde ididuhe.

¹⁰Osuk ɔdɔdiɔk ɔnɔ owo eke edinamde utom Jehovah enyɔŋ-enyɔŋ! onyuŋ osuk ɔdɔdiɔk ɔnɔ owo eke emende ofut esie ke iyip efep!

¹¹Moab ama oduŋ ke ifure toto ke ini uyen esie, enye ama onyuŋ etie ke ntak esie, ika-inyuŋ ikaŋake enye ke abaŋ kiet isin ke abaŋ eken, ika-inyuŋ itaŋke enye ifep: oro esin inem esie ebigi enye ke esit, ufuɔŋ esie inyuŋ ikpuhɔkede.

¹²Jehovah ɔdɔhɔ ete, Mmɔdo mme usen ke edi, eke ndidɔŋde owo eke etukde, utom ke ɔtɔ esie, ndien eyetuk enye eduɔk, enyuŋ eŋwaŋa abaŋ esie, enyuŋ esuan mme ikpa wine mmɔ.

¹³Ndien but eyenam Moab abaŋa Chemosh, kpasuk nte but akanamde ufɔk Israel abaŋa Bethel mbuɔtidem mmɔ.

¹⁴Mbufo enam didie edɔhɔ ete, Nnyin idi mbon uko ye mkpɔsɔŋ owo ke ekɔŋ?

¹⁵Moab amabiara, mme obio esie enyuŋ edɔk (ke nsuŋikaŋ), ndimek mkparawa esie enyuŋ esuhɔre ete ekewot mmɔ; emi edi uyo edidem. Jehovah mme udim edi enyiŋ esie.

¹⁶Nsobo Moab asaŋa ekpere, idiɔk-ŋkpɔ esie onyuŋ awara eti-eti edi.

¹⁷Mbufo kpukpru mmɔ emi ekande enye ekuk etua enye; yak kpukpru mmɔ eke efiɔkde enyiŋ esie enyuŋ edɔhɔ, ete, Anam didie ebuŋ ɔkpɔsɔŋ esaŋ, mmɔnyɔ uyai!

¹⁸Wɔrɔ ke ubɔŋ, suhɔre tie ke nsat-itɔŋ, O eyen-aŋwan emi oduŋde ke Dibon; koro andibiat Moab ɔmɔdɔk osim fi, enye eyesobo mkpɔsɔŋ ebiet fo.

¹⁹O andi-duŋ Aroer, da ke usuŋ, nyuŋ kpeme; bup enye emi efehede onyuŋ ɔbɔhɔde; dɔhɔ, ete, Nsitibe?

²⁰But anam Moab, koro enye owurede: fiori nyuŋ seme; mbufo etiŋ ke Arnon, ete ke Moab amabiara.

²¹Ikpe ɔmɔnyuŋ osim ke una-isɔŋ; kpa Holon, ye Jahzah,

²²ye Mephaath, ye Dibon, ye Nebo, ye Beth-diblathaim,

²³ye Kiriathaim, ye Beth-gamul,

²⁴ye Beth-meon, ye Kerioth, ye Bozrah, ye kpukpru mme obio isɔŋ Moab mkpet-mkpet ye nsan-nsan.

²⁵Jehovah ɔdɔhɔ ete, Emesibe Moab nduk efep, ubɔk onyuŋ ɔbuŋɔ enye.

²⁶Mbufo enɔ enye mmin ɔŋwɔŋ akpa: koro enye okokde idem esie ye Jehovah: ndien Moab eyemiaŋa ke ikpɔhi esie, enye ŋko eyenyuŋ edi se esakde.

²⁷Nte Israel ikedige se afo asakde? Nte ekekut enye ke otu mbon inɔ? Koro adaŋa ini nte afo ɔkɔdɔhɔde abaŋa enye, afo oyibi ibuot.

²⁸Mbufo mme andiduŋ Moab ekpɔŋ mme obio, ndien eduŋ ke itiat, enyuŋ etie nte ibiom eke anamde efɔk esie ke odudu inua obube.

²⁹Nyin imokop iseri Moab, enye eseri iseri eti-eti, ye ntaŋ-idem esie, ye ŋkok-idem esie, ye iseŋ esie, ye nte esit esie okoŋde.

³⁰Jehovah ɔdɔhɔ, ete, Ami mmɔfiɔk ifuresit esie; ndien inenke; ye mbure esie; mmɔ enam se minenke.

³¹Mmɔdo nyefiori mbaŋa Moab, nyeseme mbaŋa ofuri Moab: owo eyemum mbio-obio Heres.

³²Nyeda ntua eyet Jazer ntua eyet mbaŋa fi, O vine Sibmah: nnyɔninyɔ fo ebe inyaŋ, mmɔ esim ke inyaŋ Jazer: andibiat amabiat ndat-ndat mfri fo ye utet vine fo.

³³Enyuŋ esioŋo idara ye mbre ke eti iŋwaŋ ye ke isɔŋ Moab efep; mma nnyuŋ nnam wine etre ke ebiet udigi: owo ididigike ye mkpo: mkpo ididige mkpo.

³⁴Mmɔ esioro uyo ɔtɔŋɔde ke eseme Heshbon tutu osim ke Elealeh, ye ke Jahaz: ɔtɔŋɔde ke Zoar tutu osim ke Horonaim, Eglath-shelishiyah: koro mmɔŋ Nimrim ŋko eyekabare asat.

³⁵Jehovah onyuŋ ɔdɔhɔ, ete, Nyenam owo eke awade uwa ke ibombom, ye eke ɔfɔpde ŋkpɔ ɔnɔ mme abasi esie etre ke Moab.

³⁶Oro eyesin esit mi oyomo nti ifiom abaŋa Moab, esit mi onyuŋ oyomo nte ifiom abaŋa mbio-obio Kir-heres: koro inyene oro enye ɔkɔkɔde omosop.

³⁷Koro kpukpru ibuot enyenede ibɔ, enyuŋ efat kpukpru ntaŋebek: enyuŋ ekpi kpukpru ubɔk, ɔfɔŋ-ikpo onyuŋ okune kpukpru isin.

³⁸Ntuaŋa mmɔdo ke enyɔŋ kpukpru ɔkɔm ufɔk Moab, ye ke esit aŋwa esie: koro mmanuak Moab nte abaŋ eke minemke owo baba: uyo Jehovah edi emi.

³⁹Mmɔ efiori ete, Enye asuana didie! didie ke but esin Moab akpa edem! Moab onyuŋ akabare edi ŋkpɔ nsahi ye mkpa-idem ɔnɔ kpukpru mmɔ eke ekande enye ekuk.

⁴⁰Koro ntem ke Jehovah ɔdɔhɔ, ete, Sese, enye efefe nte ntrukpom, onyuŋ atat mba esie ofuk Moab.

⁴¹Eda mme obio, emum mkpɔsɔŋ ebiet, ndien esit mbon uko Moab ke usen oro eyebiet esit aŋwan uman.

⁴²Eyenyuŋ esobo Moab, ndien enye ididige aba obio, koro enye okokokde idemesie ye Jehovah.

⁴³Jehovah ɔdɔhɔ ete, Ndik, ye obube, ye afia ena enɔ fi, O andiduŋ Moab.

⁴⁴Owo eke efeghede abak ndik eyeduŋ ke obube; ndien owo eke otode ke obube ɔdɔk eyemum ke afia: koro nyeda isua ufen mmɔ ntiene enye kpa Moab; uyo Jehovah edi emi.

⁴⁵Mbon itɔk eda ke mfut Heshbon enana odudu: koro ikaŋ otode ke Heshbon, edemikaŋ onyuŋ oto ke ufɔt Sihon, ndien enye eyeta inuk Moab, ata nditɔ ndutime etiŋe-ibuot.

⁴⁶Osuk ɔdɔ-diɔk ɔnɔ fi, Moab! Ikɔt Chemosh emebiara: koro etaŋde nditɔ-iren fo efep, etaŋ nditɔ-iban fo nte mbuot-ekɔŋ.

⁴⁷Jehovah onyuŋ ɔdɔhɔ, ete, Nyeda nditɔ Moab emi etaŋde mmɔ efep, nnyɔŋ ndi ke utit eyo. Ikpe Moab etie ntem.