Read efik ŊWED ESEME 1 Bible Online

ŊWED ESEME 1 - efik bible

ŊWED ESEME 1

¹OBIO emi akawakde owo anam didie etie ikpɔŋ! Enye emi okokponde ke otu mme idut akabare edi ebe-akpa! Ɔbɔŋ-aŋwan ke otu mme esien akabare otomo utomo!

²Enye atua eyet eti-eti ke okoneyo, mmɔŋeyet esie onyuŋ eyere enye ke mfuk: baba owo kiet eke ɔdɔŋde enye esit iduhe ke otu kpukpru mmɔ eke emade enye: kpukpru mme ufan esie ebiaŋa enye emekabare edi mme asua esie.

³Emetaŋ Judah efep ebaŋa ukut ye ɔkpɔsɔŋ ufin: enye etie ke otu mme idut ikwe nduɔk-odudu: kpukpru mmɔ eke ebinede enye emesim enye ke mbaba esie.

⁴Ɔkpɔ-usuŋ Zion etuaŋa, koro baba owo kiet midige ke ederi: kpukpru inua otop esie emebiara, mme oku esie eseme, nditɔ-iban esie etie ke mfuhɔ, ŋkpɔ onyuŋ odoro enye.

⁵Mbon udi esie ekabare edi ibuot, mme asua esie ekut unen; koro Jehovah otukde enye abaŋa uwak mme idiɔk ido esie: nditɔ-ɔwɔŋ esie ebem mme asua iso eka nte mbuot-ekɔŋ.

⁶Ofuri uyai adiaha Zion omonyuŋ ɔwɔrɔ ɔkpɔŋ enye: mbɔŋ esie ebiet edop eke mikwe mbiet, ndien mmɔ ebem andibine iso esaŋa, inyuŋ inyeneke odudu.

⁷Jerusalem eti kpukpru ŋkpɔ-uto esie eke ekedude ke ini eset, ke ini eke etukde enye enyuŋ ekɔbɔde enye, ke ini ikɔt esie eduɔŋɔde ke ubɔk mme asua, ndien baba owo kiet eke aŋwamde enye miduhe: mme asua esie ekut enye enyuŋ esak ŋwure esie.

⁸Jerusalem amanam idiɔk eti-eti; mmɔdo enye akabarede edi edidehe: kpukpru mmɔ eke ekekponode enye ese enye ke ndek, koro mmɔ ekutde enye iferi: enye onyuŋ eseme, onyuŋ akabare afiak edem.

⁹Ndek esie odu enye ke ɔfɔŋ idem; enye ikereke akpatre esie; mmɔdo enye ɔsuhɔrede utibe-utibe: baba owo kiet idɔŋke enye esit. O Jehovah, se ukut mi: koro asua ama ataŋ idem.

¹⁰Asua ama anyan ubɔk esie otuk kpukpru ŋkpɔ uto esie: ŋkɔm enye ama okut nte mme idut edukde ke edisana ebiet esie, kpa mme idut emi afo okowukde, ete edukde ke edisana ebiet esie, kpa mme idut emi afo okowukde, ete ekuduk ke esop fo.

¹¹Kpukpru ikɔt esie eseme eyom uyo; mmɔ enɔ ŋkpɔ-uto mmɔ ke udia, man edemere ukpɔŋ mmɔ: O Jehovah, se nyuŋ tiŋ enyin: koro ŋkabarede oburobut.

¹²Nte mbufo emi esaŋade ke usuŋ ebe ikereke? Mbufo etiŋ enyin enyuŋ ese me ndutuhɔ odu eke ebietde ndutuhɔ emi enamde mi, emi Jehovah ɔkɔtuhɔde mi ke usen ikaŋ iyaresit esie.

¹³Enye etie ke enyɔŋ ɔnɔ ikaŋ, ete edisin mi ke ɔkpɔ, ndien enye akan mmɔ: enye eneŋere iyire ɔnɔ ukot mi, anam mi mfiak edem: onim mi ke ŋwure ye mba-mba ofuri usen.

¹⁴Ubɔk esie etebe ɔkpɔnɔ idiɔk ido mi: mmɔ ewaŋa, edɔk esim itɔŋ mi: enye anam odudu mi ɔduɔ; Ɔbɔŋ esin mi ke ubɔk mmɔ eke mmeŋkemeke ndito mmɔ ke ubɔk ndaha ke enyɔŋ.

¹⁵Ɔbɔŋ ese kpukpru mbon uko mi ke ufɔt mi ke ndek: enye okot owo esop idem ebaŋa mi, man enuak mkparawa mi. Ɔbɔŋ ama edigi udigi-wine adiaha Judah eyenɔwɔŋ.

¹⁶Ŋkpɔ emi esin mi ntua eyet; enyin mi, enyin mi ayak mmɔŋ ɔsuhɔre, koro andidɔŋ mi esit ye owo eke edemerede mi esit ɔkpɔŋde mi anyan usuŋ: nditɔ mi emesobo koro asua akande.

¹⁷Zion anyan ubɔk esie, baba owo kiet eke ɔdɔŋde enye esit iduhe: Jehovah ama owuk mme asua Jacob emi ekande enye ekuk abaŋa enye, Jerusalem etie ke otu mmɔ nte ŋwan eke odude ke esien.

¹⁸Jehovah emenen: koro ami nnenide uyo esie: mbɔk mbufo kpukpru mme idut ekop, enyuŋ ese ndutuhɔ mi: nditɔ iban mi ye mkparawa mi emeka ke otu mbuot-ekɔŋ.

¹⁹Ŋkokot mmɔ eke emade mi; edi mmɔ ebiaŋa mi: mme oku mi ye ebiowo mi ekpaŋa ke obio, ke ini mmɔ eyomde udia ke idem mmɔ, man edemere ukpɔŋ mmɔ.

²⁰O Jehovah, sese: koro mmetie ke itie ukut: nsia oyomo mi; esit ɔduɔ mi ke idem; koro ŋkpɔ ododoro mi eti-eti: ofut adia ke aŋwa, ke ufɔk ke ebiet mkpa.

²¹Mmɔ ekop ete ke ami nseme; nnyuŋ nnyeneke owo eke ɔdɔŋde mi esit: kpukpru mme asua mi ekop ebaŋa idiɔk itie mi; esit adat mmɔ, koro afo anamde mi: afo eyeda usen eke afo okokotde edi, man mmɔ ebiet mi.

²²Ofuri idiɔk ido mmɔ eyedi ke iso fo; nam mmɔ ndien kpa nte afo akanamde mi, abaŋa kpukpru mme ukwaŋ-ŋkpɔ mi: koro eseme mi awakde, esit mi onyuŋ etiede mba-mba.