Read efik ŊWED ESEME 4 Bible Online

ŊWED ESEME 4 - efik bible

ŊWED ESEME 4

¹GOLD anam didie akabare ebire! ata eti gold anam didie ɔkpuhɔre! Mme itiat edisana ebiet emeduɔŋɔ ke ibuot kpukpru mme efak.

²Ndiye nditɔ-iren Zion emi ekemde ye ata eti gold, anam didie ebat mmɔ nte abaŋ mbat eso eke ubɔk obot-eso anamde!

³Kpa mme jackal esio eba enɔ nditɔ mmɔ ewap: adiaha ikɔt mi amakanare edi afai, ebiet ostrich ke wilderness.

⁴Nsat-itɔŋ anam edeme eyen nsek adiana enye ke nsiŋ: nditɔ-ɔwɔŋ eyom uyo; owo eke obuŋde ɔnɔ mmɔ iduhe.

⁵Mmɔ eke ekediade edinem udia esobo ke efak: mmɔ eke ekebɔkde ke ididuot efat ifum.

⁶Idiɔk ido adiaha oruk mi onyuŋ okpon akan ukwaŋ-ŋkpɔ Sodom, emi okosobode ke idaha kiet, ndien idige ubɔk owo otuk enye.

⁷Mme Nazirite esie ekesana ekan snow, efia ekan mmɔŋ-eba, ekeyibe idem ekan ruby, iwut-idem mmɔ edi sapphire.

⁸Iso ke ebire mmɔ akan ubit, owo idiɔŋɔke mmɔ ke efak: ikpɔkidem adiana mmɔ ke ɔkpɔ; amasat, akabare nte eto.

⁹Ɔfɔn ye mmɔ eke ofut owotde, akan mmɔ eke akaŋ owotde: koro mmɔ oro eyemerede, enyuŋ etie nte ekekim mmɔ, koro mbuŋwum iŋwaŋ miduhe.

¹⁰Ubɔk iban emi enyenede esit mbɔm emetem nditɔ mmɔ: mmɔ ekabare edi udia mmɔ ke ŋwure adiaha ikɔt mi.

¹¹Jehovah ama ama ifuresit esie; amaŋwaŋa ikaŋ iyaresit esie. Enye omonyuŋ okim ikaŋ ke Zion, emi atade tutu osim ke isɔŋ esie.

¹²Ndidem ererimbot ye kpukpru mme andiduŋ ekondo baba kiet ikpenimke ke akpanikɔ, ite ke owo usua ye owo utɔk ekpeduk ke inua-otop Jerusalem.

¹³Mme idiɔk ido mme prophet esie, mme ukwaŋ-ŋkpɔ mme oku esie, eke ekeduɔkde iyip mme andinen owo ke ufɔt esie,

¹⁴esin mmɔ ediyo nte nnan ke mme efak, iyip asabare mmɔ, ndien owo ikemeke ndituk edisine-ŋkpɔ mmɔ.

¹⁵Mmɔ efiori ekot mmɔ, ete, Mbufo edaŋa, ke edehe, edaŋa, edaŋa, ekutuk! koro mmɔ efeŋede, enyuŋ ediyo, edɔhɔ ke otu mme idut, ete, Mmɔ ididuŋke aba.

¹⁶Iyaresit Jehovah amakabare mmɔ; enye iditiŋke aba mmɔ enyin ke idem: mmɔ iteŋeke mme oku iso, inyuŋ ifɔnke ido ye mbiowo.

¹⁷Ke ini nnyin isuk idedu, enyin okim nnyin, ke nnyin isede mmɔ eke ekpeŋwamde nnyin, ikpikpu; ŋnyin ikekpeme ke itie ukpeme, ise idut eke mikemeke ndinyaŋa nnyin.

¹⁸Mmɔ ebine ikpat nnyin, ndien nnyin ikemeke ndisaŋa ke aŋwa nnyin: utit nnyin emekpere, mme usen nnyin emeyɔhɔ: koro utit nnyin emedi.

¹⁹Mmɔ emi ebinede nnyin esɔp ukot ekan ntrukpom enyɔŋ: mmɔ esɔp ebine nnyin ke enyɔŋ ikpɔ obot, edibe ebet nnyin ke wilder-ness.

²⁰Mmɔ ekeda mme ukpe mmɔ emum ibifik inua nnyin emi Jehovah ekeyetde aran, kpa enye emi nnyin ikɔdɔhɔde ibaŋa, ite, Nnyin iyedu uwem ke idak mfut esie ke otu mme idut.

²¹O adiaha Edom, emi oduŋde ke isɔŋ Uz, dara nyuŋ bre; cup eyenyuŋ ebe fi ŋko: afo eyeŋwɔŋ akpa, onyuŋ ɔfuhɔre idem fo.

²²O adiaha Zion, ufen idiɔk ido fo omokure; enye iditaŋke aba fi ifep: enye eyenɔ fi ufen idiɔk ido, O adiaha Edom; eyeyarare idiɔk ido fo.