Read efik ŊWED ESEME 5 Bible Online

ŊWED ESEME 5 - efik bible

ŊWED ESEME 5

¹O JEHOVAH, ti se iketibede inɔ nnyin: tiŋ enyin, nyuŋ se esuene nnyin.

²Emekabare udeme nnyin enɔ isen owo, ekabare ufɔk nnyin enɔ mbon idut.

³Nnyin idi eyen akpa, inana ete, mme eka nnyin ebiet mme ebe-akpa.

⁴Nnyin iŋwɔŋ mmɔŋ nnyin ke okuk; ifia nnyin osim nnyin ke ekɔm-urua.

⁵Edori nnyin ŋkpɔ ke itɔŋ; inam ɔkpɔsɔŋ utom, inyuŋ inyeneke nduɔk-odudu.

⁶Nnyin ikɔkɔŋɔ mfaŋ inɔ Egypt ye Assyria, man ita uyo iyuhɔ.

⁷Mme ete nnyin ekenam idiɔk, ndien iduhe; ndien nnyin ibiom idiɔk ido mmɔ.

⁸Ifin ekara nnyin: baba owo kiet eke osiode nnyin ke ubɔk mmɔ iduhe.

⁹Ofut wilderness esin nnyin ikada uwem nnyin ibiom uyo nnyin idi.

¹⁰Ata idiɔk akaŋ esin ikpɔhidem nnyin ebire nte usaŋ-uyo.

¹¹Mmɔ eke esabare iban ke Zion, esabare nditɔ-iban ke mme obio Judah.

¹²Ekekot mbɔŋ ubɔk eyiri ke enyɔŋ: ikponoke iso mbiowo.

¹³Eda mkparawa enam mmɔ ekɔk, nditɔwɔŋ enyuŋ eduɔŋɔ ye ifia.

¹⁴Mbiowo emekure ke inua-otop, mkparawa edop ikwɔ mmɔ.

¹⁵Idaresit nnyin emetre; unek nnyin amakabare edi ntuaŋa.

¹⁶Anyanya omoto nnyin ke ibuot ɔduɔ ke isɔŋ: ɔdiɔk ɔnɔ nnyin, koro nnyin imanam idiɔk!

¹⁷Emi esin esit ɔduɔ nnyin; ŋkpɔ emi esin enyin okim nnyin.

¹⁸Mme fox esaŋa ke enyɔŋ obot Zion, koro enye osobode.

¹⁹Afo, O Jehovah, etie ke nsinsi; ebekpo fo ebigi ke ofuri emana.

²⁰Nsinam afo efrede nnyin ke nsinsi? Nsinyuŋ inam afo ɔkpɔŋde nnyin ke anyan ini?

²¹Nam nnyin ifiak itiene fi, O Jehovah, ndien nnyin iyefiak; nam usen nnyin ekabare edi mbufa, kpa nte ke eset.

²²Edi afo ɔmɔduɔk nnyin akaha; amayat esit ye nnyin eti-eti.