Read efik EZEKIEL 11 Bible Online

EZEKIEL 11 - efik bible

EZEKIEL 11

¹NDIEN spirit emenere mi ke enyɔŋ, ada mi aka ke inua-otop ufɔk Jehovah edem usiaha-utin, emi esede edem usiaha-utin; ndien, sese, owo edip ye ition ke enyin-usuŋ eda; ndien, sese, ŋkut Jaazaniah eyen Azzur ke otu mmɔ, ye Pelatiah eyen Benaiah, mbɔŋ obio.

²Ndien enye ɔdɔhɔ mi, ete, Eyen owo, mme mmɔ emi edi mmɔ oro eduakde idiɔk, uduak enyuŋ etemede idiɔk item ke obio emi:

³emi edɔhɔde ete, Eribɔp ufɔk ikpereke: enye (obio) edi eso, nnyin inyuŋ idi unam.

⁴Tiŋ ndien prophecy dian mmɔ, tiŋ prophecy, O eyen owo.

⁵Ndien spirit Jehovah ɔduɔ mi ke idem, onyuŋ ɔdɔhɔ mi, ete, Tiŋ, ete, Ntem ke Jehovah ɔdɔhɔ, ete, Ntem ke mbufo edɔhɔ, O ufɔk Israel; ndien ami mfiɔk kpasuk se idɔkde iduk mbufo esit.

⁶Mbufo emenam mmɔ emi ekpaŋade afai ewak ke obio emi; emenyuŋ eda mmɔ emi ekpaŋade afai eyɔhɔ ke efak esie.

⁷Mmɔdo ntem ke Ɔbɔŋ Jehovah ɔdɔhɔ, ete, Mme mmɔ emi mbufo ekewotde, emi mbufo edade enim ke ufɔt esie, kpa mmɔ edi unam, ndien enye (obio) onyuŋ edi eso: ndien owo eyesioŋo mbufo ke esit efep.

⁸Mbufo ke ebak ofut; ndien ami nyeda ofut ntiene mbufo: emi edi uyo Ɔbɔŋ Jehovah.

⁹Nyenyuŋ nsioŋo mbufo ke ufɔt esie, nnyuŋ nda mbufo nsin isen owo ke ubɔk; nnyuŋ ŋkpe ikpe ke otu mbufo.

¹⁰Mbufo eyeduɔŋɔ ke ofut; nyekpe ikpe mbufo ke adaŋa Israel; ndien mbufo eyefiɔk ete ke ami ndi Jehovah.

¹¹Obio emi ididige eso mbufo, mbufo idinyuŋ idige unam ke esit; ke adaŋa Israel ke ndikpe ikpe ye mbufo.

¹²Ndien mbufo eyefiɔk ete ke ami ndi Jehovah, emi mbufo mikesaŋake ke ewuhɔ mi, minyuŋ inamke ido mi; ndien mbufo enam nte ekemde ye ido mme idut emi ekande mbufo ekuk.

¹³Edikem adaŋemi nsuk ntetiŋ prophecy, Pelatiah eyen Benaiah akpa. Ndien nduɔ ke isɔŋ ŋkubi iso mi, nnyuŋ mfiori ke ɔkpɔsɔŋ uyo, nnyuŋ ndɔhɔ nte. Ah, Ɔbɔŋ Jehovah, nte afo ɔmɔŋ anam ubak Israel emi esuhɔde ama?

¹⁴Ndien uyo Jehovah osim mi, ete,

¹⁵Eyen owo, nditɔ-usɔ, nditɔ-usɔ edi mbio oruk fo, ye ofuri ufɔk Israel akpaimɔ, mme mmɔ emi mme andiduŋ Jerusalem edɔhɔde ebaŋa mmɔ, ete: Mbufo ekpɔŋ Jehovah anyan usuŋ: emenɔ nnyin isɔŋ emi ida inyene.

¹⁶Dɔhɔ ntem ndien, ete, Ntem ke Ɔbɔŋ Jehovah ɔdɔhɔ, ete, Koro mma mbin mmɔ mfep nnim anyan ebiet ke otu mme idut, mma nnyuŋ nsuan mmɔ ke otu mme obio, ntre ke ndikabare ndi edisana ebiet mmɔ ke ini esisit ke mme obio emi mmɔ ekade do.

¹⁷Dɔhɔ, ndien, ete, Ntem ke Ɔbɔŋ Jehovah ɔdɔhɔ, ete, Nditreke nditaŋ mbufo ke otu mme idut, nnyuŋ nsioŋo mbufo ke mme obio emi mbufo esuanade ke otu mmɔ, mbon; nnyuŋ nnɔ mbufo isɔŋ Israel.

¹⁸Ndien mmɔ eyesim ko, eyenyuŋ esioŋo kpukpru ŋkpɔ ndek esie, ye kpukpru mbubiam esie efep ke esit.

¹⁹Nyenyuŋ nnɔ mmɔ esit kiet, nnyuŋ nsin mbufo obufa spirit ke esit idem; nnyuŋ nsio mmɔ esit enyene itiat ke obukidem mfep, nnyuŋ nnɔ mmɔ esit enyene obuk:

²⁰man mmɔ esaŋa ke mme ewuhɔ mi, enyuŋ enim mbet mi, enyuŋ enam mmɔ: ndien mmɔ eyekabare edi ikɔt mi, ami nyenyuŋ ndi Abasi mmɔ.

²¹Edi ama edi mmɔ emi esit mmɔ asaŋade ke ŋkpɔ ndek mmɔ ye mbubiam ŋkpɔ mmɔ, nyeda usuŋ mmɔ ndori mmɔ ke ibuot; emi edi uyo Ɔbɔŋ Jehovah.

²²Ekem mme cherubim emenere mba mmɔ, ye mme wheel ekem ye mmɔ; ndien ubɔŋ Abasi Israel onyuŋ odoro mmɔ ke enyɔŋ.

²³Ndien ubɔŋ Jehovah adaha ke ufɔt obio ɔdɔk akada ke enyɔŋ akamba obot emi odude ke edem usiaha-utin obio.

²⁴Ndien spirit emen mi, onyuŋ ada mi ke ŋkukut ke spirit Abasi aka ke Chaldea ke ɔtɔ mbon ntaŋ-mfep. Ndien ŋkukut emi ŋkokutde ɔkpɔŋ mi ɔdɔk.

²⁵Ndien mmen kpukpru ikɔ Jehovah emi enye okowutde mi, ntiŋ nnɔ mbon ntaŋ-mfep.