Read efik EZEKIEL 12 Bible Online

EZEKIEL 12 - efik bible

EZEKIEL 12

¹EDIKEM uyo Jehovah osim mi, ete,

²Eyen owo, afo ke oduŋ ke otu ufɔk nsɔŋ-ibuot, emi enyenede enyin eke ekutde, ndien ikwe; enyuŋ enyenede utɔŋ eke ekopde, ndien ikopke: koro mmɔ edide ufɔk nsɔŋ-ibuot.

³Afo eyen owo tim ndien mkpoduoho uwɔrɔ-iduŋ, nyuŋ wɔrɔ iduŋ ke enyin mmɔ ke uwemeyo; nyuŋ wɔrɔ ke ebiet kiet ka ke ebiet eŋwen ke enyin mmɔ.

⁴Ndusuk mmɔ eyekut, koro mmɔ edide ufɔk nsɔŋ-ibuot. Ndien biom mkpoduoho fo, kpa nte mkpoduoho uwɔrɔ-iduŋ ke uwemeyo ke enyin mmɔ: afo nyuŋ wɔrɔ ke mbubreyo ke enyin mmɔ, kpa nte mmɔ eke ewɔŋɔde eka ke ntaŋ-mfep.

⁵Tibi odudu ke ibibene ke idem fo ke enyin mmɔ, ndien biom ŋkpɔ wɔrɔ ke esit;

⁶biom ke ekim, biom ke afara ke enyin mmɔ, wɔrɔ fuk iso fo: kunyuŋ use isɔŋ: koro mmonim fi ke idiɔŋɔ nnɔ ufɔk Israel.

⁷Ndien ami nnam ntre kpa nte ekewukde mi: ŋkosioŋo mkpoduoho mi nte mkpoduoho uwɔrɔ-iduŋ ke uwemeyo: ndien ke mbubreyo nda ubɔk mi ntibi odudu ke ibibene ke idem mi; ŋkobiom ke ekim, mbiom ke afara ke enyin mmɔ ŋwɔrɔ.

⁸Ekem eyo esiere, ndien uyo Jehovah osim mi, ete,

⁹Eyen owo, nte ufɔk Israel, ufɔk nsɔŋ-ibuot idɔhɔke fi, ite, Afo amanam nso ŋkpɔ? Dɔhɔ mmɔ, ete,

¹⁰Ntem ke Ɔbɔŋ Jehovah ɔdɔhɔ, ete, Ɔbɔŋ oro edi mbiomo emi ke Jerusalem ye ofuri ufɔk Israel emi edude ke ufɔt mmɔ.

¹¹Dɔhɔ, ete, Ami ndi mbuka mbufo: kpa nte ŋkanamde, kpa ntre ke edinam ye mmɔ: mmɔ eyewɔrɔ nte uwɔrɔ-iduŋ ye ntaŋ-mfep.

¹²Ndien ɔbɔŋ emi odude ke ufɔt mmɔ eyebiom ŋkpɔ ke afara ke ekim ɔwɔrɔ. Mmɔ eyetibi odudu ke ibibene, man ebume ŋkpɔ ke esit ewɔrɔ: enye eyefuk iso esie man okukut isɔŋ ke enyin.

¹³Ndien nyenyuŋ nduɔk enye iyire mi ke idem, enye eyenyuŋ omum ke afia mi: ndien nyeda enye ŋka Babylon ke isɔŋ mme Chaldean; edi enye idikwe enye ke enyin, ndien do ke enye edikpa.

¹⁴Ndien nyesuan kpukpru mmɔ eke ekande enye ekuk ete iŋwam enye, nyenyuŋ nsuan kpukpru mbon-ekɔŋ esie, nsin ke kpukpru mme ofum; nnyuŋ nsio ofut mbine mmɔ.

¹⁵Ndien mmɔ eyefiɔk ete ke ami ndi Jehovah, ke nsuande mmɔ ke otu mme idut, nnyuŋ ŋkpɔride mmɔ ke mme obio mfep.

¹⁶Ndien nyesio owo mmɔ esisit mfep ke ofut, ye biɔŋ, ye idiɔk udɔŋɔ, nsuhɔ; man mmɔ ebuk kpukpru mbubiam ŋkpɔ mmɔ ke otu mme idut eke edisimde do; ndien mmɔ eyefiɔk ete ke ami ndi Jehovah.

¹⁷Ndien uyo Jehovah osim mi, ete,

¹⁸Eyen owo, afo eyeta uyo fo ke nnyekidem, onyuŋ ɔŋwɔŋ mmɔŋ fo ke ndutime ye ndik;

¹⁹nyuŋ dɔhɔ mbio edem emi, ete, Ntem ke Ɔbɔŋ Jehovah ɔdɔhɔ mme andiduŋ Jerusalem, ye eke isɔŋ Israel, ete, Mmɔ eyeta uyo mmɔ ke ndik, enyuŋ eŋwɔŋ mmɔŋ mmɔ ke mkpa-idem, man ebɔ enye isɔŋ uyuhɔ esie ebiat, ebaŋa afai kpukpru mmɔ emi eduŋde ke esit.

²⁰Mmɔ eyenyuŋ esuan mme obio emi eduŋde, isɔŋ ŋko eyekabare edi ndon; ndien mbufo eyefiɔk ete ke ami ndi Jehovah.

²¹Ndien uyo Jehovah osim mi, ete,

²²Eyen owo, nso ŋke ke mbufo etop emi ebaŋa isɔŋ Israel, ete ke mme usen ebigi, kpukpru ŋkukut enyuŋ etak?

²³Dɔhɔ mmɔ ndien, ete, Ntem ke Ɔbɔŋ Jehovah ɔdɔhɔ, ete, Mmɔŋ nnam ŋke emi etre, ndien mmɔ iditopke aba enye ke Israel; edi dɔhɔ mmɔ, Mme usen ke ekpere, ye uyo kpukpru ŋkukut.

²⁴Koro baba nsunsu ŋkukut, ye nnem-inua idiɔŋ mididuhe aba ke otu ufɔk Israel.

²⁵Koro ami Jehovah nyetiŋ, ndien nyenam ikɔ eke nditiŋde: idinamke aba ubigi ke esit: koro ke mme usen mbufo, O ufɔk nsɔŋ-ibuot, ke nditiŋ ikɔ, nnyuŋ nnam enye.

²⁶Uyo Ɔbɔŋ Jehovah edi emi. Ndien uyo Jehovah osim mi, ete,

²⁷Eyen owo, sese, ufɔk Israel ke edɔhɔ ete, Ŋkukut emi enye okokutde edi eke ediwak usen; enye onyuŋ etiŋ prophecy ke esit abaŋa anyan ini.

²⁸Dɔhɔ mmɔ, ndien, ete, Ntem ke Ɔbɔŋ Jehovah ɔdɔhɔ, ete, Idinamke aba ubigi ke baba ikɔ mi kiet edi eyenam ikɔ emi ndɔhɔde. Uyo Ɔbɔŋ Jehovah edi emi.