Read efik EZEKIEL 13 Bible Online

EZEKIEL 13 - efik bible

EZEKIEL 13

¹EDIKEM uyo Jehovah osim mi, ete, Eyen owo tiŋ prophecy baŋa mme prophet Israel emi etiŋde prophecy;

²nyuŋ dɔhɔ mmɔ eke etiŋde prophecy eke otode mmɔ ke esit, ete, Mbufo ekop uyo Jehovah;

³ntem ke Ɔbɔŋ Jehovah ɔdɔhɔ, ete, Osuk ɔdɔdiɔk ɔnɔ mme ndisime prophet emi etienede spirit idem mmɔ, minyuŋ ikwe baba ŋkpɔ kiet!

⁴O Israel, prophet fo ebiet jackal ke desert.

⁵Mbufo ikɔdɔkke ke ŋwure, inyuŋ ibokpe ɔkɔ inɔ ufɔk Israel, man mmɔ eda ke ekɔŋ usen Jehovah.

⁶Mme mmɔ emi edɔhɔde ete, “Uyo Jehovah,” ndien Jehovah mikɔdɔŋke mmɔ utom, ekut abiaŋa ye nsunsu mfa: edi mmɔ esin owo edori enyin, ete ke mmɔ eyenam ikɔ ɔsɔŋɔ ada.

⁷Nte mbufo ikekwe nsunsu ŋkukut, ikonyuŋ idɔhɔke mfa abiaŋa? Ndien mbufo edɔhɔ ete, “Uyo Jehovah:” ndien idige ami ŋkɔdɔhɔ.

⁸Mmɔdo ntem ke Ɔbɔŋ Jehovah ɔdɔhɔ ete, Koro mbufo esude nsu, enyuŋ ekutde abiaŋa, mmɔdo Ɔbɔŋ Jehovah ɔdɔhɔde, ete, Sese, ami mmɔŋ nnam ikɔ ye mbufo.

⁹Ndien ubɔk mi eyedoro ke idem mme prophet eni ekutde nsu enyuŋ ebrede mfa abiaŋa: mmɔ ididuhe ke odu ikɔt mi, idinyuŋ iwetke mmɔ isin ke ŋwed ufɔk Israel, mmɔ idinyuŋ isimke isɔŋ Israel; ndien mbufo eyefiɔk ete ke ami ndi Ɔbɔŋ Jehovah.

¹⁰Koro, kpa koro mmɔ eyutde ikɔt mi, ete, “Ifure,” ndien ifure miduhe; ndien owo ɔbɔp ibibene; ndien, sese, mmɔ eyet enye ndom.

¹¹Dɔhɔ mme mmɔ emi eyetde ndom, ete ke eyeduɔ: ata ɔkpɔsɔŋ edim eyedi; ndien mbufo, ikpɔ itiat edim eyeduɔŋɔ; ndien ofum oyobio eyesiak enye.

¹²Ndien, sese, ibibene eyeduɔ; nte ididɔhɔke mbufo, ite, Enye eriyet emi mbufo ekeyetde enye?

¹³Mmɔdo ntem ke Ɔbɔŋ Jehovah ɔdɔhɔ ete, Nyeda ofum oyobio nsiak enye ke ifuresit mi; ata ɔkpɔsɔŋ edim eyenyuŋ edi ke iyaresit mi, ye ikpɔ itiat edim ke ikpahesit mi, ndibiat enye.

¹⁴Ndien nyebiat ibibene emi mbufo eyetde ndom, nnyuŋ ŋwuri enye tutu osim isɔŋ, ndien nyeyarare ɔtɔ emi enye odorode ke esit, ndien enye eyeduɔ, mbufo eyenyuŋ etak ke esit: ndien mbufo eyefiɔk ete ke ami ndi Jehovah.

¹⁵Ntem ke ndima ifuresit mi ke ibibene, ye ke idem mmɔ emi eyetde enye ndom, nnyuŋ ndɔhɔ mbufo, nte Ibibene iduhe, mmɔ emi eyetde enye ndom inyuŋ iduhe.

¹⁶Kpa mme prophet Israel emi etiŋde prophecy ebaŋa Jerusalem, enyuŋ ekutde ŋkukut ifure enɔ enye, ndien ifure iduhe. Uyo Ɔbɔŋ Jehovah edi emi.

¹⁷Ndien afo eyen owo, wuk iso fo se nditɔ-iban oruk fo, emi etiŋde prophecy eke otode mmɔ ke esit; nyuŋ tiŋ prophecy dian mmɔ.

¹⁸Nyuŋ dɔhɔ ete, Ntem ke Ɔbɔŋ Jehovah ɔdɔhɔ ete, Osuk ɔdɔdiɔk ɔnɔ iban emi etuakde udoribuot enɔ kpukpru ikek ubɔk, enyuŋ enamde ŋkpɔ ubri ke isɔŋ enɔ ibuot kpukpru idaha, man ebine ukpɔŋ! Nte mbufo eyebine ukpɔŋ ikɔt mi, ndien enim ukpɔŋ idem mbufo ke uwem?

¹⁹Nte mbufo eyenyuŋ esabare mi enɔ ikɔt mi ke uyɔhɔ ubɔk barley ye ke ŋkeŋe uyo, man ewot ukpɔŋ eke midikpaha, enyuŋ eda ukpɔŋ eke mididuhe uwem enim ke uwem, ke erisu emi mbufo esude enɔ ikɔt mi emi ekopde nsu.

²⁰Mmɔdo ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye udoribuot mbufo, emi mbufo edade ebine ukpɔŋ do, ndiyak mmɔ ebɔhɔ, ndien nyefabare mmɔ mbufo ke ubɔk, nnyuŋ nsana mme ukpɔŋ, kpa ukpɔŋ emi mbufo ebinede, nyak mmɔ ebɔhɔ.

²¹Nyenyuŋ ŋwai ŋkpɔ ubri ke isɔŋ mbufo, nnyuŋ nsio ikɔt mi ke ubɔk mbufo, ndien mmɔ ididuhe aba mbufo ke ubɔk ke ŋkpɔ eke ebinede; ndien mbufo eyefiɔk ete ke ami ndi Jehovah.

²²Koro mbufo edade nsu eyat edinen owo esit, emi ami mmenyatke; enyuŋ esɔŋde mme idiɔk owo ubɔk, man enye okukpɔŋ idiɔk ido esie afiak, man enim enye uwem:

²³mbufo ekuse aba abiaŋa ndien, ekunyuŋ ebre aba mfa; koro nyesioŋo ikɔt mi ke ubɔk mbufo: ndien mbufo eyefiɔk ete ke ami ndi Jehovah.