Read efik EZEKIEL 14 Bible Online

EZEKIEL 14 - efik bible

EZEKIEL 14

¹EKEM ndusuk mbiowo Israel edi ke ɔtɔ mi editie ke iso mi.

²Ndien uyo Jehovah osim mi, ete,

³Eyen owo, mme mmɔ emi emeda ibɔk mmɔ ewuk ke esit mmɔ, enyuŋ eda ŋkpɔ iduɔ idiɔk ido mmɔ enim ke iso mmɔ: nte ŋkpayak ebup mi ebaŋa mmɔ?

⁴Neme ye mmɔ ndien, nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Kpukpru owo ufɔk Israel eke edimende ibɔk mmɔ ewuk ke esit mmɔ, enyuŋ edade ŋkpɔ iduɔ idiɔk ido mmɔ enim ke iso mmɔ, ndien edi ke ɔtɔ prophet; ami Jehovah nyebɔrɔ mmɔ ke esit, nte ekemde ye ediwak ibɔk mmɔ;

⁵man nda esit ufɔk Israel mmum mmɔ: koro ibɔk mmɔ esinde kpukpru mmɔ ekabare ekpɔŋ mi.

⁶Dɔhɔ ndien ufɔk Israel, ete, Ntem ke Ɔbɔŋ Jehovah ɔdɔhɔ, ete, Mbufo ekabare, ekabare kpa idem mbufo ke ibɔk mbufo efep; enyuŋ ekabare iso mbufo kpukpru efep ke mbubiam ŋkpɔ mbufo.

⁷Koro kpukpru owo ufɔk Israel, ye eke isen owo emi edidaŋde ke Israel, eke edianarade ye ami, enyuŋ emende ibɔk mmɔ ewuk ke esit mmɔ, enyuŋ enimde ŋkpɔ iduɔ idiɔk ido mmɔ ke iso mmɔ ndien edi ke ɔtɔ prophet, ete ibup enye ŋkpɔ ibaŋa mi; ami Jehovah nyebɔrɔ enye mbaŋa idem mi;

⁸ndien nyewuk iso mi nse owo oro, nnyuŋ nnim enye ke idiɔŋɔ ye ke ufiet, nnyuŋ nsibe enye ke otu ikɔt mi mfep; ndien mbufo eyefiɔk ete ke ami ndi Jehovah.

⁹Ndien edieke ebiaŋade prophet oro, ndien enye ɔdɔhɔ ikɔ: edi ami Jehovah ŋkabiaŋa prophet oro, ndien ami nyenyan ubɔk mi ntuk enye, nnyuŋ nsobo enye ke otu ikɔt mi Israel mfep.

¹⁰Ndien mmɔ eyebiom ufen mmɔ; ufen prophet eyebiet ufen owo oro obupde.

¹¹Man ufɔk Israel ekukpɔŋ aba mi ediyo, ekunyuŋ eda kpukpru mme idiɔk ido mmɔ esabare idem mmɔ, edi edi ikɔt mi, ami nnyuŋ ndi Abasi mmɔ: emi edi uyo Ɔbɔŋ Jehovah.

¹²Ndien uyo Jehovah osim mi, ete,

¹³Eyen owo, adaŋemi idut eduede mi ke erinam idiɔk ido, ndien ami nyenyan ubɔk mi ndori enye, nnyuŋ mbuŋ esaŋ udia esie, nnyuŋ ndɔŋ akaŋ utom ke ɔtɔ esie, nnyuŋ nsibe owo ye unam ke esit mfep.

¹⁴Ndien owo mbita oro, Noah ye Daniel ye Job ekpedu enye ke ufɔt, mmɔ ekpenyaŋa ukpɔŋ mmɔ ke edinen ido mmɔ. Emi edi uyo Ɔbɔŋ Jehovah.

¹⁵Edieke nnamde mme idiɔk unam esaŋa ke isɔŋ ebe, ndien mmɔ ebiet enye, ndien anana owo, onyuŋ akabare edi ndobo: koro mme unam miyakke owo asaŋa ebe:

¹⁶owo mbita emi ekpedu ke esit, ma uwem mi, Ɔbɔŋ Jehovah ɔdɔhɔ, mmɔ ikpenyaŋake nditɔ-iren, ikpenyuŋ inyaŋake nditɔ-iban; mmɔ ekpenyaŋa idem mmɔ ikpɔŋ-ikpɔŋ; edi isɔŋ emi ekpedi ndobo.

¹⁷Mma nda ofut ntiene isɔŋ oro; nnyuŋ ndɔhɔ ofut, nte enye asaŋa ke isɔŋ ebe; ndien nsibe owo ye unam mfep ke esit:

¹⁸ndien owo mbita oro ekpedu ke esit, ma uwem mi, Ɔbɔŋ Jehovah ɔdɔhɔ, mmɔ ikpenyaŋake nditɔ-iren, ikpenyuŋ inyaŋake nditɔ-iban; edi mmɔ ke idem mmɔ ekpebɔhɔ.

¹⁹Mmennyuŋ ndɔŋ idiɔk udɔŋɔ utom ke isɔŋ oro; nnyuŋ nda iyip ŋŋwaŋa enye ifuresit mi ke esit, man nsibe owo ye unam mfep ke esit:

²⁰Ɔbɔŋ Jehovah ɔdɔhɔ ete, Noah ye Daniel ye Job ekpedu ke esit, ma uwem mi, mmɔ ikpenyaŋake eyen-eren, ikpenyuŋ inyaŋake nditɔ-iban; edi mmɔ ke idem mmɔ ekpebɔhɔ.

²¹Koro ntem ke Ɔbɔŋ Jehovah ɔdɔhɔ, ete, Edidi ntem ke akpan-ikɔ, adaŋemi ndidade idiɔk ufen mi mbinaŋ, ofut, ye biɔŋ, ye idiɔk unam, ye idiɔk udɔŋɔ, ndɔŋ mmɔ utom ke Jerusalem, man nsibe owo ye unam ke esit mfep.

²²Ndien, sese, eyesuhɔ mbon-ubɔhɔ ke esit, eke edidade ewɔŋɔ, nditɔ-iren ye nditɔ-iban, Sese, mmɔ eyewɔŋɔ etiene mbufo: ndien mbufo eyekut usuŋ mmɔ ye ido mmɔ: enyuŋ ekop ndɔŋesit ebaŋa idiɔk-ŋkpɔ emi ndade ntiene Jerusalem, ebaŋa kpukpru se ndade ntiene enye.

²³Ndien mmɔ eyedɔŋ mbufo esit ke ini mbufo edikutde usuŋ mmɔ ye ido mmɔ: ndien mbufo eyefiɔk ete ke idige ke ikpikpu ke ŋkanam kpukpru se ŋkanamde ke esit. Uyo Ɔbɔŋ Jehovah edi emi.