Read efik EZEKIEL 16 Bible Online

EZEKIEL 16 - efik bible

EZEKIEL 16

²Eyen owo, wut Jerusalem mbubiam ŋkpɔ mmɔ, nyuŋ dɔhɔ ete,

³Ntem ke Ɔbɔŋ Jehovah ɔdɔhɔ Jerusalem, ete, Ntak fo ye emana fo eto ke isɔŋ Canaan; usɔ ekedi Amorite, uka okonyuŋ edi Hittite.

⁴Ndien ama edi emana fo: ke usen oro afo akamanade owo isibike fi uruk eyen, inyuŋ iyetke fi ke mmɔŋ asana; inyuŋ itukke fi inuŋ ke idem, inyuŋ ibɔpke fi ke ɔfɔŋ.

⁵Baba enyin kiet ikereke fi, ete inam fi baba ŋkpɔ emi kiet, inyuŋ itua fi mbɔm; edi eduɔk fi ke iso isɔŋ esin idem fo ke ndek ke usen oro afo akamanade.

⁶Ndien ami nsaŋa mbe fi nnyuŋ ŋkut fi amiaŋade ke iyip fo, ndien ndɔhɔ fi ke iyip fo, nte, Du uwem; ŋkɔm ndɔhɔ fi ke iyip fo, nte, Du uwem.

⁷Ŋkanam fi ɔtɔt tɔsin tɔsin nte se itibede ke isɔŋ, ndien afo awak onyuŋ okpon, onyuŋ ɔwɔrɔ ediye eti-eti: eba fo eduɔŋɔ, idet fo onyuŋ ɔkɔri, ndien afo ama edi iferi ye ikpikpu.

⁸Ndien ami nsaŋa mbe fi nnyuŋ ŋkut fi, ndien, sese, ini fo edi ini ima; ndien ami ntat ɔfɔŋidem mi ndori fi ke idem, nnyuŋ mfuk fi iferi: nnyuŋ ŋŋwɔŋɔ nnɔ fi, nnyuŋ nduk ke ediomi ye afo, ndien afo akabare edi okimmɔ: uyo Ɔbɔŋ Jehovah edi emi.

⁹Ndien nyet fi ke mmɔŋ, nnyuŋ nsio fi iyip ke idem mfep, nnyuŋ nyet fi aran ke idem.

¹⁰Ndien nsine fi ŋwet-ŋwet ɔfɔŋidem, nnyuŋ nsine fi ikpa-ukot badger, nnyuŋ nyara fi linen, nnyuŋ mfuk fi ke silk.

¹¹Ndien mbana fi ŋkpɔ mbana, nnyuŋ mfɔri fi okpoho ubɔk, nnyuŋ ŋkɔŋ fi ŋkpɔkɔbi ke itɔŋ.

¹²Ndien nsin fi mkpanuen ke ibuo, nsin fi mkpanuen ke utɔŋ, nnyuŋ nyara fi ediye anyanya ke ibuot.

¹³Ndien afo ada gold ye silver abana idem; edisine-ŋkpɔ fo enyuŋ edi linen ye silk ye ŋwet-ŋwet ɔfɔŋ; afo adia eti ndom-uyo, ye aran-ɔkwɔk ye aran: onyuŋ akabare eye eti-eti, onyuŋ ɔdɔdiɔŋ ɔkɔri ɔwɔrɔ edi obio edidem.

¹⁴Ndien afo ɔwɔrɔ etop abaŋa uyai fo; koro enye ɔfɔnde ama oto ke ubɔŋ mi emi ŋkodoride fi ke idem; emi edi uyo Ɔbɔŋ Jehovah.

¹⁵Ndien afo ɔbuɔt idem ye uyai fo, onyuŋ ese use abaŋa etop fo, onyuŋ ɔduɔk use fo ɔnɔ kpukpru mmɔ eke esaŋade ebe: enyene enye.

¹⁶Ndien afo ada ndusuk edi-sine-ŋkpɔ fo atuak, ɔdiɔŋ edikoŋ ebiet fo, ndien anam use ke enyɔŋ mmɔ: mmɔ ikpedige ikpenyuŋ iduhe.

¹⁷Ndien afo ada ediye ŋkpɔ fo, emi ekenamde ke gold mi, ye silver mi emi ŋkɔnɔde fi, anam mbiet irenowo ke idem fo, ndien anam use ye mmɔ.

¹⁸Afo okonyuŋ ada ŋwet-ŋwet edisine-ŋkpɔ fo ofuk mmɔ, onyuŋ ada aran mi ye incense mi onim ke iso mmɔ.

¹⁹Afo onyuŋ ada udia mi emi ŋkɔnɔde fi, eti ndom-uyo, ye aran, ye aran-ɔkwɔk emi ŋkɔnɔde fi adia, onim ke iso mmɔ ke edinem utebe: ntem ke ekedi: Ɔbɔŋ Jehovah ɔdɔhɔ.

²⁰Afo onyuŋ ada nditɔ-iren fo ye nditɔ-iban fo emi afo akamande ɔnɔ mi, awa ɔnɔ mmɔ, ete edia. Nte use fo ama ekpri akan?

²¹Nte afo eyenyuŋ owot nditɔ mi, onyuŋ ɔnɔ mmɔ, ete enam mmɔ ebe eduk ke ikaŋ enɔ mmɔ?

²²Ndien ke kpukpru mbubiam ŋkpɔ fo, ye use fo, afo utihi mme usen uyen fo, ke ini afo ekedide iferi ye ikpikpu, onyuŋ amiaŋade ke iyip fo.

²³Edikem ke afo ama akanam ofuri idiɔk ido fo (Osuk ɔdɔdiɔk ɔnɔ fi, edi uyo Ɔbɔŋ Jehovah);

²⁴afo okonyuŋ ɔbɔp ufɔk use ɔnɔ idem fo, onyuŋ anam edikoŋ ebiet ke idem fo ke kpukpru aŋwa.

²⁵Afo ɔmɔbɔp edikoŋ ebiet fo ke ibuot ofuri usuŋ, omonyuŋ asabare uyai fo, onyuŋ adianare ukot fo ɔnɔ kpukpru mmɔ eke esaŋade ebe, onyuŋ anam use fo awak.

²⁶Afo onyuŋ anam use ye nditɔ Egypt mbɔhiduŋ fo emi ekponde obuk-idem; onyuŋ anam use fo awak, onyuŋ ayat mi esit.

²⁷Ndien, sese, mmanyan ubɔk mi ndori fi ke idem; nnyuŋ nsuhɔre udeme fo, nnyuŋ nda fi nyak nnɔ esit mmɔ emi esuade fi, kpa nditɔ-iban mme Philistine emi enyenede but ke mme oburobut ido fo.

²⁸Afo okonyuŋ anam use ye nditɔ Assyria: koro midige nte eyuhɔde fi; ŋkɔm afo anam use ye mmɔ; unyuŋ uyuhɔke ŋko.

²⁹Afo onyuŋ anam use fo ke isɔŋ Canaan awak tutu osim Chaldea; emi ŋko inyuŋ iyuhɔke fi.

³⁰Ɔbɔŋ Jehovah ɔdɔhɔ ete, Esit fo efere didie ke emi afo anamde kpukpru ŋkpɔ emi: utom nsɔŋido aŋwan use;

³¹emi afo ɔbɔpde ufɔk use ke ibuot kpukpru efak; onyuŋ anam edikoŋ ebiet fo ke kpukpru aŋwa: afo unyuŋ ubietke akpara, koro esede okuk akpara ke ndek;

³²ŋwan eke esinde efibe ke odude ke idak ubɔk ebe esie, aka isen owo!

³³Eda enɔ enɔ kpukpru mme akpara; edi afo ada enɔ fo ɔnɔ mme mmɔ emi emade fi, onyuŋ ekpe mmɔ, ete eto ke ŋkan-ŋkuk etiene fi ke use fo.

³⁴Afo onyuŋ anam isio ye iban efen ke use fo: koro owo mitieneke fi inam use: koro afo onyuŋ ɔnɔde utip, ndien minɔŋɔ fi utip: afo etie isio ntem.

³⁵Akpara, kop ndien uyo Jehovah: ntem ke Ɔbɔŋ Jehovah ɔdɔhɔ ete,

³⁶Koro eŋwaŋade ndek fo, enyuŋ efuhɔrede fi iferi, oto ke use fo ye mmɔ eke emade fi, onyuŋ abaŋa kpukpru mbukpo ibɔk fo, onyuŋ oto ke iyip nditɔ-iren fo, emi afo ɔkɔnɔde mmɔ;

³⁷mmɔdo, sese, ami nyetaŋ kpukpru mme ufan fo emi afo enemde mmɔ esit, ye kpukpru mmɔ emi afo amade, ŋkɔrɔ ye kpukpru mmɔ emi afo asuade, mbon; nyenyuŋ ntaŋ mmɔ ke ŋkan-ŋkuk mbon ke ɔtɔ fo; ndien nyefuhɔre fi iferi nnɔ mmɔ; ndien mmɔ eyekut ofuri iferi fo.

³⁸Ndien nyekpe ikpe ye afo, kpa nte ekpede ikpe ye iban eke esinde efibe enyuŋ eduɔkde iyip; nnyuŋ nnɔ fi iyip ifuresit ye ufup.

³⁹Nyenyuŋ nda fi nsin mmɔ ke ubɔk, ndien mmɔ eyewuri ufɔk use fo, enyuŋ esuan ŋkokoŋo ebiet fo; enyuŋ esioŋo fi edisine-ŋkpɔ ke idem efep; ndien mmɔ eyeda ŋkpɔ mbana fo, enyuŋ ekpɔŋ fi iferi ye ikpikpu.

⁴⁰Ndien mmɔ eyeda udim owo etiene fi, enyuŋ etɔŋɔ fi ke itiat, enyuŋ esibe fi mbak-mbak ke ofut mmɔ;

⁴¹enyuŋ efɔp ufɔk fo ke ikaŋ, enyuŋ enɔ fi ufen ke iso ediwak iban; ndien nyenam fi etre ndisin efibe, ndien afo udunɔŋɔ aba utip.

⁴²Ndien nyenam ifuresit mi ye afo odop, ufup mi eyenyuŋ ɔkpɔŋ fi akabare,

⁴³ntre ke ami nditie suŋ, ndinyuŋ nyatke aba esit. Koro afo mutihi usen uyen fo, edi ɔtɔhɔ ye ami ke kpukpru ŋkpɔ emi; ndien, sese, ami ŋko nyeda usuŋ fo ndori fi ke ibuot, Ɔbɔŋ Jehovah ɔdɔhɔ; ndien afo udunyuŋ unamke oburobut ido emi ukɔrɔ ke kpukpru mbubiam fo.

⁴⁴Sese, kpukpru owo emi etohode ufiet eyetoho ufiet edian fi, ete,

⁴⁵“Eyen-aŋwan ebiet eka esie.” Afo edi eyen-uka emi akasuade ebe esie ye nditɔ esie; afo onyuŋ edi eyen-eka aŋwan nditɔ-uka iban emi ekesuade mme ebe mmɔ ye nditɔ mmɔ: eka fo ekedi Hittite, ete mbufo okonyuŋ edi Amorite ŋko.

⁴⁶Ndien akamba eyen-uka edi Samaria, ye nditɔ-iban esie emi eduŋde fi ke ubɔk ufien: ndien eyen-uka emi ekpride akan fi, onyuŋ oduŋde fi ke ubɔk nnasia, edi Sodom ye nditɔ-iban esie.

⁴⁷Ndien afo unyuŋ usaŋake ke usuŋ mmɔ, unyuŋ unamke nte mbubiam mmɔ asaŋade: oro ekpedi ata ekpri ŋkpɔ: edi afo asabare idem fo akan mmɔ ke kpukpru usuŋ fo.

⁴⁸Ɔbɔŋ Jehovah ɔdɔhɔ ete, Ma uwem mi, Sodom eyen-uka aŋwan ye nditɔ-iban esie ikenamke nte emi afo ye nditɔ-iban fo enamde.

⁴⁹Sese, emi ekedi idiɔk ido Sodom eyen-uka, iseri, ke uyuhɔ udia, ye ata ifure ekenyene enye ye nditɔ-iban esie, ndien enye isɔŋke eyen ukut ye ubuene ubɔk.

⁵⁰Ndien mmɔ ekok idem, enyuŋ enam mbubiam ke iso mi: ndien ami mbin mmɔ mfep, ke ini ŋkutde.

⁵¹Samaria ŋko ikanamke baba ubak idiɔk ido fo; edi afo amanam mbubiam fo awak akan mmɔ, omonyuŋ akan nditɔ-uka iban ke kpukpru mbubiam fo emi afo akanamde.

⁵²Afo ŋko emi ekekpede ikpe ɔnɔ nditɔ-uka iban, ke mme idiɔk ido fo emi afo akanamde mbubiam akan mmɔ, biom but fo: mmɔ emenen ekan fi: kop esuene ŋko, nyuŋ biom but fo: koro afo akakaŋde nditɔ-uka iban.

⁵³Ndien ami nyeyak mbon ntaŋ-mfep mmɔ efiak, kpa mbon ntaŋ-mfep Sodom ye nditɔ-iban esie, ye mbon ntaŋ-mfep Samaria, ye nditɔ-iban esie, ye ntaŋ-mfep ke otu mbon ntaŋ-mfep fo ke otu mmɔ ŋko:

⁵⁴man afo obiom esuene fo, onyuŋ okut but ke kpukpru se afo akanamde, koro afo ɔkɔdɔŋde mmɔ esit.

⁵⁵Ndien nditɔ-uka iban, kpa Sodom ye nditɔ-iban esie eyefiak ke akani itie mmɔ; Samaria ye nditɔ-iban esie eyenyuŋ efiak ke akani itie mmɔ ŋko; ndien afo ye nditɔ-iban fo ŋko-ŋko eyefiak ke akani itie mbufo.

⁵⁶Ndien Sodom eyen-uka aŋwan iduhe fi ke inua ke se etiŋde abaŋa ke usen ntaŋidem fo:

⁵⁷ke mika-iyarakede kaŋa mme idiɔk ido fo, kpa nte ini esuene nditɔ-iban Syria, ye kpukpru mmɔ emi ekande enye ekuk, nditɔ-iban mme Philistine emi esinde fi ke ndek ekan ekuk.

⁵⁸Jehovah ɔdɔhɔ ete, Ama edi oburobut ido fo ye mbubiam fo, afo obiom mmɔ.

⁵⁹Koro ntem ke Ɔbɔŋ Jehovah ɔdɔhɔ ete, Nyenam fi kpa nte afo akanamde, emi afo ekesede uŋwɔŋɔ ke ndek ke eribiat ediomi.

⁶⁰Ndien ami nyeti ediomi mi ye afo ke mme usen uyen fo, nyenyuŋ nsɔŋɔ ŋwuk nsinsi ediomi ye afo.

⁶¹Ndien afo eyeti usuŋ fo, onyuŋ okop but, ke ini afo ɔbɔde nditɔ-uka iban emi ekponde ekan fi, ɔkɔrɔ ye mmɔ emi ekpride ekan fi: ndien nyeda mmɔ nnɔ fi ke nditɔ-iban, edi idisaŋake ke ediomi fo.

⁶²Ndien ami nyewuk ediomi mi ye afo; ndien afo eyefiɔk ete ke ami ndi Jehovah:

⁶³man afo eti onyuŋ okut but, okunyuŋ ekeme ndikubɔre inua abaŋa esuene fo, ke ini ami ndidahadedo nnɔ fi ke kpukpru se afo anamde. Emi edi uyo Ɔbɔŋ Jehovah.