Read efik EZEKIEL 20 Bible Online

EZEKIEL 20 - efik bible

EZEKIEL 20

¹EDIKEM ke ɔyɔhɔ isua itiaba, ke ɔyɔhɔ ɔfiɔŋ ition, ke ɔyɔhɔ usen ɔfiɔŋ duop, ndusuk mbiowo Israel eto edi edibup Jehovah ŋkpɔ, ndien mmɔ editie mi ke iso.

²Ndien uyo Jehovah osim mi, ete,

³Eyen owo, neme ye mbiowo Israel, nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Nte mbufo edi ndibup mi ŋkpɔ? Ɔbɔŋ Jehovah ɔdɔhɔ, ete, Ma uwem mi, ndiyakke ebup mi enɔ mbufo.

⁴Nte afo eyekpe ikpe ɔnɔ mmɔ, eyen owo? Nte afo eyekpe ikpe ɔnɔ mmɔ? Nam mmɔ efiɔk mbubiam ŋkpɔ mme ete mmɔ:

⁵nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Ke usen oro ŋkemekde Israel, nnyuŋ mmenerede ubɔk mi nnɔ ubon ufɔk Jacob, nnyuŋ nyak mmɔ efiɔk mi ke isɔŋ Egypt, nnyuŋ mmenere ubɔk mi nnɔ mmɔ, nte, “Ami ndi Jehovah Abasi mbufo;”

⁶Ke usen oro ke ŋkemenere ubɔk mi nnɔ mmɔ, nte, Nyesioŋo mmɔ ke isɔŋ Egypt, nda nduk ke isɔŋ emi ŋkeyepde nnɔ mmɔ, emi ɔfiɔrɔde mmɔŋ eba ye aran-ɔkwɔk; enye eyekan kpukpru mme idut.

⁷Ndien ndɔhɔ mmɔ, nte, Mbufo kpukpru emen ŋkpɔ ndek ke enyin mbufo eduɔk, ekunyuŋ eda ibɔk Egypt esabare idem mbufo: ami Jehovah ndi Abasi mbufo.

⁸Ndien mmɔ esɔŋ ibuot ye ami, inyuŋ inyimeke ndikop uyo mi: baba owo kiet imenke ŋkpɔ ndek ke enyin esie iduɔk, inyuŋ ikpɔŋke ibɔk Egypt: ndien ndɔhɔ nte ke nyeŋwaŋa mmɔ ifuresit mi ke idem, man mma iyaresit mi ke idem mmɔ ke ufɔt isɔŋ Egypt.

⁹Ndien ŋkanam ntre mbaŋa enyiŋ mi, man ekusabare mi ke enyin mme idut emi mmɔ edude ke otu mmɔ, emi ŋwutde mmɔ idem mi ke iso mmɔ, man nsio mmɔ ke isɔŋ Egypt mfep.

¹⁰Ndien ŋkosio mmɔ ke isɔŋ Egypt, nnyuŋ nda mmɔ nduk ke wilderness.

¹¹Nnyuŋ nnɔ mmɔ mme ewuhɔ mi; nnyuŋ ŋwut mmɔ mme item mi, emi owo ama anam mmɔ, owo eyedu uwem ke esit.

¹²Ami nnyuŋ nnɔ mmɔ mme sabbath mi, man edi idiɔŋɔ ke ufɔt mi ye mmɔ, man mmɔ efiɔk ete ke edi ami Jehovah nnam mmɔ esana.

¹³Ndien ufɔk Israel esɔŋ ibuot ye ami ke wilderness: mmɔ isaŋake ke mme ewuhɔ mi, edi esin mme item mi, emi owo ama anam mmɔ, owo eyedu uwem ke esit; mmɔ enyuŋ esabare mme sabbath mi eti-eti: ndien ndɔhɔ nte ke nyeŋwaŋa mmɔ ifuresit mi ke idem ke wilderness man nsobo mmɔ.

¹⁴Ndien nnam ntre mbaŋa enyiŋ mi, man ekusabare enye ke enyin mme idut emi ŋkosiode mmɔ ke esit ke enyin mmɔ.

¹⁵Ami ŋko nnyuŋ mmenere ubɔk mi nnɔ mmɔ ke wilderness, nte ke ndidaha mmɔ nduk ke isɔŋ emi ŋkɔnɔde mmɔ, emi ɔfiɔrɔde mmɔŋ-eba ye aran-ɔkwɔk; enye eyekan kpukpru mme idut;

¹⁶koro mmɔ esinde mme item mi, minyuŋ isaŋake ke mme ewuhɔ mi, edi esabare mme sabbath mi: koro esit mmɔ ebinede ibɔk mmɔ.

¹⁷Ndien enyin mi akatua mmɔ mbɔm; ndien nsoboke mmɔ, nnyuŋ mmaŋa ye mmɔ ke wilderness.

¹⁸Ndien ndɔhɔ nditɔ mmɔ ke wilderness, nte, Mbufo ekusaŋa ke mme ewuhɔ mme ete mbufo, ekunyuŋ enim mme item mmɔ, ekunyuŋ eda ubɔk mmɔ esabare idem mbufo:

¹⁹Ami Jehovah ndi Abasi mbufo; mbufo esaŋa ke mme ewuhɔ mi, enyuŋ enim mme item mi, enyuŋ enam mmɔ;

²⁰enyuŋ enim mme sabbath mi efɔn; ndien mmɔ eyedi idiɔŋɔ ke ufɔt mi ye mbufo, man mbufo efiɔk ete ke ami ndi Jehovah Abasi mbufo.

²¹Ndien nditɔ oro esɔŋ ibuot ye ami: mmɔ isaŋake ke mme ewuhɔ mi, inyuŋ inimke mme item mi, inyuŋ inamke mmɔ, emi owo ama anam mmɔ, owo eyedu uwem ke esit; mmɔ ebiat mme sabbath mi. Ndien ami ndɔhɔ nte, Nyeŋwaŋa mmɔ ifuresit mi ke idem, man mma iyaresit mi ke idem-mmɔ ke wilderness.

²²Ndien ŋkabare ubɔk mi nnyuŋ nnam ntre mbaŋa enyiŋ mi, man ekusabare enye ke enyin mme idut, emi ŋkosioŋode ke enyin mmɔ mfep.

²³Ami nnyuŋ mmenere ubɔk mi nnɔ mmɔ ke wilderness, nte ke nyesuan mmɔ ke otu mme idut, nnyuŋ ŋkpɔri mmɔ nduɔk ke otu mme obio;

²⁴koro mmɔ mikanamke mme item mi, edi esin mme ewuhɔ mi, enyuŋ ebiat mme sabbath mi, enyin mmɔ enyuŋ ekabare ese ibɔk mme ete mmɔ.

²⁵Ndien ŋko ami nnɔ mmɔ mme ewuhɔ eke mifɔnke, ye mme item eke mmɔ mikemeke ndidu uwem ke esit;

²⁶nnyuŋ nsabare mmɔ ke mme enɔ mmɔ, ke ini mmɔ edade kpukpru se isirerede itie-eyen esɔk mi, man mbiat mmɔ, kpaŋ mmɔ ekpefiɔk ete ke ami ndi Jehovah.

²⁷Neme ndien, eyen owo, ye ufɔk Israel, nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Ntem ŋko ke mme ete mbufo ekesuene mi ke eridue emi mmɔ ekeduede mi.

²⁸Ami nnyuŋ nda mmɔ nduk ke isɔŋ emi ŋkemenerede ubɔk mi, nte ke nyeda enye nnɔ mmɔ, ndien mmɔ ekut kpukpru edikoŋ obot, ye kpukpru mfuhɔ eto, ndien ewa mme uwa mmɔ do ndien do ke mmɔ enɔ enɔ mmɔ eke esinde iyaresit: enyuŋ enim do edinem utebe mmɔ, enyuŋ eŋwaŋa do ediŋwɔŋ uwa mmɔ.

²⁹Ndien ndɔhɔ mmɔ, nte, Nsidi edikoŋ ebiet emi mbufo ekade do? Ndien enyin esie ekere Bamah tutu osim mfin emi.

³⁰Dɔhɔ ndien ufɔk Israel, ete, Ntem ke Ɔbɔŋ Jehovah ɔdɔhɔ ete, Nte mbufo esabare idem mbufo ke usuŋ mme ete mbufo? mbufo enyuŋ ebine ŋkpɔ ndek enam use.

³¹Ndien ke ini mbufo emende enɔ mbufo esɔk mi, ke erinam nditɔ mbufo ebe eduk ke ikaŋ, mbufo esabare idem mbufo ke kpukpru ibɔk mbufo tutu ɔsim mfin emi: ndien nte ndiyak ebup mi ŋkpɔ enɔ mbufo, O ufɔk Israel? Ɔbɔŋ Jehovah ɔdɔhɔ, ete, Ma uwem mi, ndiyakke ebup mi enɔ mbufo.

³²Ndien ŋkpɔ emi ɔdɔkde oduk mbufo ke esit ididuhe du, emi mbufo edɔhɔde, ete, Nnyin iyebiet mme idut, ibiet mme oruk mme obio, inyuŋ inam ŋkpɔ inɔ eto ye itiat.

³³Ɔbɔŋ Jehovah ɔdɔhɔ ete. Ma uwem mi, nditreke ndikara mbufo ke ɔkpɔsɔŋ ita, ye ke edimenere ubɔk, ye ke ifuresit eke eŋwaŋade.

³⁴Nyenyuŋ nda ɔkpɔsɔŋ ita, ye edimenere ubɔk, ye ifuresit eke eŋwaŋade, nsio mbufo ke otu mme idut mfep, nnyuŋ ntaŋ mbufo ke mme obio emi mbufo esuanade ke esit, mbon.

³⁵Ndien nyeda mbufo nduk ke wilderness mme idut, nnyuŋ ŋkpe ikpe do ye mbufo iso ye iso.

³⁶Kpa nte ŋkekpede ikpe ye mme ete mbufo ke wilderness isɔŋ Egypt, kpa ntre ke ndikpe ŋko ye mbufo; uyo Ɔbɔŋ Jehovah edi emi.

³⁷Ndien nyenam mbufo esaŋa ke idak esaŋ ebe, nnyuŋ nsin mbufo ke ŋwed ediomi:

³⁸ndien nyekpɔri mbon nsɔŋ-ibuot ke otu mbufo mfep, ye mmɔ emi eduede mi: nyesio mmɔ ke isɔŋ emi mmɔ eduŋde ke esit, ndien mmɔ ididukke ke isɔŋ Israel. Ndien mbufo eyefiɔk ete ke ami ndi Jehovah.

³⁹Ndien ama edi mbufo, ufɔk Israel, ntem ke Ɔbɔŋ Jehovah ɔdɔhɔ, ete, Mbufo kpukpru eka ekenam ŋkpɔ mme ibɔk mbufo ye ke ini iso, ke baba owo mbufo kiet mikopke uyo mi: mbufo ekunyuŋ esabare aba edisana enyiŋ mi ke enɔ mbufo, ye ibɔk mbufo.

⁴⁰Koro Ɔbɔŋ Jehovah ɔdɔhɔde ete, Ke edisana obot mi, ke edikoŋ obot Israel, do ke ofuri ufɔk Israel, kpukpru mmɔ ke isɔŋ, edinam ŋkpɔ mi: do ke mmɔ edinem mi esit, do ŋko ke ndiyom edimenere uwa mbufo, ye akpa ŋkpɔ eke mbufo emende ke kpukpru edisana ŋkpɔ mbufo enɔ.

⁴¹Mbufo eyeda ufuɔŋkpɔ enem mi esit, ke ini nsiode mbufo ke otu mme idut oro mfep, nnyuŋ ntaŋ mbufo ke mme obio emi ŋkasuande mbufo ke otu mmɔ, mbon; ndien eyenim mi ke edisana ke otu mbufo ke enyin mme idut.

⁴²Ndien mbufo eyefiɔk ete ke ami ndi Jehovah, ke ini ndidade mbufo ndi ke isɔŋ Israel, ke idut emi ŋkemenerede ubɔk mi, nte ke nyeda enye nnɔ mme ete mbufo.

⁴³Ndien do ke mbufo editi usuŋ mbufo, ye kpukpru se mbufo ekenamde, emi mbufo ekesabarede idem mbufo ke esit; ndien mbufo eyesua idem mbufo ebaŋa kpukpru mme idiɔk-ŋkpɔ emi mbufo ekenamde.

⁴⁴Ndien mbufo eyefiɔk ete ke ami ndi Jehovah, ke ndinamde mbufo mbaŋa enyiŋ mi, isaŋake ye mme idiɔk usuŋ mbufo, ye ido mbufo emi ebiarade, O ufɔk Israel: uyo Ɔbɔŋ Jehovah edi emi.

⁴⁵Edikem uyo Jehovah osim mi, ete,

⁴⁶Eyen owo, wuk iso fo se edem usuk-usuk, nyuŋ nam prophecy nɔ akai edem usuk-usuk;

⁴⁷nyuŋ dɔhɔ akai edem usuk-usuk, ete, Kop uyo Jehovah, Ntem ke Ɔbɔŋ ɔdɔhɔ ete, Sese, ami mmɔŋ ŋkim fi ikaŋ ke idem, ndien enye eyeta kpukpru nsehe eto ye kpukpru edisat eto ke ufɔt fo: edisak ikaŋ idinimeke, ndien kpukpru iso, ɔtɔŋɔde ke usuk tutu osim ke edere, eyesak ke esit.

⁴⁸Ndien kpukpru obukidem eyekut, ete ke edi ami Jehovah ŋkabara enye: enye idinimeke.

⁴⁹Ndien ami ndɔhɔ nte, Ah, Ɔbɔŋ Jehovah, mmɔ edɔhɔ mi ete, Nte enye itopke ŋke?