Read efik EZEKIEL 21 Bible Online

EZEKIEL 21 - efik bible

EZEKIEL 21

¹NDIEN uyo Jehovah osim mi, ete, Eyen owo, wuk iso fo se Jerusalem,

²nyuŋ tiŋ ikɔ dian mme edisana ebiet, nyuŋ nam prophecy baŋa isɔŋ Israel,

³Nyuŋ dɔhɔ isɔŋ Israel, ete, Ntem ke Jehovah ɔdɔhɔ, ete, Sese, ami mmɔŋ nnam ikɔ ye afo; ndien nyesio ofut mi ke efɔk esie, nnyuŋ nsibe eti owo ye idiɔk ke otu mfep.

⁴Koro ndisibede fi eti owo ye idiɔk ke esit mfep, mmɔdo ofut mi eyeto ke efɔk esie, osim kpukpru obukidem, ɔtɔŋɔde ke edem usuk tutu osim edem edere:

⁵ndien kpukpru obukidem eyefiɔk, ete ke ami Jehovah nsio ofut mi ke efɔk esie: enye idifiakke aba.

⁶Afo, ndien, eyen owo, mum tutu isin ɔbuŋɔ; nyuŋ mum ndot-ndot ke iso mmɔ.

⁷Ndien edikem, ke ini mmɔ edɔhɔde ye afo, ete, Nsinam afo omumde? dɔhɔ ndien ete, Ke abaŋa etop: koro enye ɔmɔŋ edi; ndien kpukpru esit eyetara, kpukpru ubɔk eyenyuŋ emem, kpukpru spirit eyenyuŋ ekpa, kpukpru edɔŋ eyenyuŋ esaŋa nte mmɔŋ: sese, ke edi, eyenyuŋ odu; emi edi uyo Ɔbɔŋ Jehovah.

⁸Ndien uyo Jehovah osim mi, ete,

⁹Eyen owo, tiŋ prophecy, nyuŋ dɔhɔ, ete, Ntem ke Jehovah ɔdɔhɔ, ete, Dɔhɔ, ete, Ofut, ofut emi ebande enyuŋ etukde:

¹⁰emeban enye, man ewot ediwak owo; emetuk enye man ebiet obuma: mme mmɔnyɔ eyen mi adat esit; enye (ofut) ese kpukpru (oruk) eto ke ndek.

¹¹Ndien enɔ enye ete etuk, man emum ke ubɔk: enye edi ofut emi ebande enyuŋ etukde man eda enye esin ke ubɔk owo eke owotde.

¹²Fiori nyuŋ seme, O eyen owo: koro enye eyedoro ikɔt mi ke idem: enye eyedoro kpukpru mbɔŋ Israel ke idem: emeyak mmɔ enɔ ofut ye ikɔt mi: tuak ndien ifuhi.

¹³Koro edomode idomo, ndien edieke ofut esinde mmɔnyɔ ke ndek, nso ŋkpɔ ediwɔrɔ ndien? Ididuhe aba; Ɔbɔŋ Jehovah ɔdɔhɔ.

¹⁴Afo, eyen owo, tiŋ ndien prophecy, nyuŋ kwak ubɔk ke ubɔk, ndien ofut eyedɔdiɔŋ ɔsɔŋ aka iso utim ikaba ye idem utim ikata, enye eyedi ofut mmɔ eke ekpaŋade afai; ofut akamba owo emi akpade afai: enye oduk osim ŋkpɔ esit idem mmɔ.

¹⁵Mma ŋket iso ofut nse kpukpru inua-otop mmɔ man esit ɔduɔ mmɔ, man ŋwure enyuŋ ewak: ah! enam enye ebiet obuma, eban enye ete eda ewot.

¹⁶Sop idem ɔtɔ kiet, ka nnasia, wuk idem, kabare se ufien, ke ebiet ekededi eke owukde iso fo ese.

¹⁷Ndien ami ŋko nyekwak ubɔk mi ke ubɔk mi, nnyuŋ nnam ifuresit mi ana: ami Jehovah ndɔhɔ.

¹⁸Edikem uyo Jehovah osim mi, ete,

¹⁹Afo eyen owo, nyuŋ siak ɔkpɔ-usuŋ iba ke idem fo, eke ofut edidem Babylon edisaŋade edi: mmɔ mbiba eyeto ke isɔŋ kiet: nyuŋ sɔi ubɔk, sɔi enye nim ke ŋwaŋa-usuŋ obio.

²⁰Siak usuŋ eke ofut edikade Rabbah nditɔ Ammon, aka Judah osim Jerusalem emi enyenede ibibene ekɔŋ.

²¹Koro edidem Babylon adade ke ŋwaŋa-usuŋ, ke ibuot ɔkpɔ-usuŋ iba, ete ibre idiɔŋ; enye enyeŋe idaŋ, obup mme teraphim, ese esit (unam).

²²Idiɔŋ Jerusalem odu enye ke ubɔk nnasia, ete, inim ŋkpɔ uwuri ibibene, itat inua ibaŋa eriwot owo, isio uyo mkpo, ete inim ŋkpɔ uwuri ke mme inua-otop, ete ikubi ibombom, inyuŋ ikɔŋ akwa ufɔk ekɔŋ.

²³Ndien eyetie mmɔ nte idiɔŋ nsu ke enyin, kpa mmɔ emi ekaŋade akaŋa enɔ mmɔ; ndien enye eyebuk idiɔk ido, man emum mmɔ.

²⁴Mmɔdo ntem ke Ɔbɔŋ Jehovah ɔdɔhɔ, ete, Koro mbufo enamde owo eti idiɔk ido mbufo, ke eriyarare oburobut ido mbufo, nnyuŋ nyak mmɔ ekut mme idiɔk ido mbufo ke kpukpru se mbufo enamde; koro etide mbufo, eyemum mbufo ke ubɔk.

²⁵Ndien afo idiɔk ɔbɔŋ Israel emi ewotde, emi usen esie edide ke ini akpatre idiɔk ido,

²⁶ntem ke Ɔbɔŋ Jehovah ɔdɔhɔ, ete, Emesio mitre efep, enyuŋ eyarare anyanya; emi idige emi: se isuhɔrede eyekoŋ; se ikoŋde eyenyuŋ ɔsuhɔre.

²⁷Nyeyut, nyeyut, nyeyut enye ŋkabare nnim: emi idinyuŋ iduhe, tutu enye emi edikpede ikpe edi; ndien nyeda nnɔ enye.

²⁸Ndien afo, eyen owo, tiŋ prophecy nyuŋ dɔhɔ ete, Ntem ke Ɔbɔŋ Jehovah ɔdɔhɔ abaŋa nditɔ Ammon ye esuene mmɔ; dɔhɔ, ndien, ete, Ofut, ofut, emesio enye, ete iwot owo: etuk enye idige ŋkpɔ man enye emineŋ:

²⁹ke ini mmɔ ekutde nsu enɔ fi, ke ini mmɔ ebrede idiɔŋ abiaŋa enɔ fi, man enye (ofut) emen fi odori ke itɔŋ mme idiɔk owo emi ekpaŋade afai, emi usen mmɔ edide ke akpatre idiɔk ido.

³⁰Yak enye afiak oduk ke ufɔk esie: nyekpe ikpe fo ke ebiet oro ekebotde fi, ke isɔŋ emana fo.

³¹Ndien nyeŋwaŋa fi ikpahesit mi ke idem, nyeda ikaŋ iyaresit mi mfuri fi, nnyuŋ nda fi nsin ke ubɔk mbon afai, mbon-usɔ ŋkpɔ eke osobode nsobo.

³²Afo eyedi ifia ikaŋ; iyip fo eyedu ke ufɔt isɔŋ; iditihi aba fi: koro ami Jehovah ndɔhɔ.