Read efik EZEKIEL 22 Bible Online

EZEKIEL 22 - efik bible

EZEKIEL 22

¹NDIEN uyo Jehovah osim mi, ete, Nte afo, eyen owo, eyenyuŋ ekpe ikpe, ekpe ikpe obio iyip?

²Wut enye, ndien, kpukpru mbubiam esie.

³Nyuŋ dɔhɔ ete, Ntem ke Ɔbɔŋ Jehovah ɔdɔhɔ, ete, Obio ke ɔduɔk iyip ke esit, man ini esie edi, enyuŋ anam mbiet ŋkpɔ otuk idem esie man enye edehe.

⁴Afo emedue isop ke iyip fo emi afo ɔkɔduɔkde, omonyuŋ edehe ke ibɔk emi afo akanamde, ndien afo anam mme usen fo esaŋa ekpere, omonyuŋ osim ke isua fo: oto oro nnim fi ke se mme idut esuenede, ye se kpukpru mme obio esede ke ndek.

⁵Mmɔ eke ekperede fi, ye mmɔ eke eyomde usuŋ ye afo, eyese fi ke ndek, emi enyiŋ fo edehede, afo onyuŋ etie otime-otime.

⁶Sese, mbɔŋ Israel kpukpru owo ke ukeme mmɔ edu ke ufɔt fo, man eduɔk iyip.

⁷Mmɔ ese ete ye eka ke ndek ke ufɔt fo: enam esen owo nnama ke ufɔt fo: efik ebe-akpa ye eyen-akpa ke ufɔt fo.

⁸Afo ese ndisana ŋkpɔ mi ke ndek; onyuŋ asabare mme sabbath mi.

⁹Mmɔ eke esaŋade mbia man eduɔk iyip, ke edu ke ufɔt fo: mmɔ enyuŋ edia ŋkpɔ ke enyɔŋ obot ke ufɔt fo: enam oburobut ido ke ufɔt fo.

¹⁰Efuhɔre ete mmɔ iferi ke ufɔt fo: ebiat ŋwan eke odude ke esien ke ufɔt fo:

¹¹owo onyuŋ anam oburobut ye ŋwan mbɔhiduŋ esie; owo onyuŋ asabare ŋwan eyen esie ata oburobut oburobut; owo onyuŋ abiat idem eyen-ete esie aŋwan ke ufɔt fo.

¹²Ebɔ inyene ke ufɔt fo, ete iduɔk iyip; afo ada udori ye nkɔri, onyuŋ adia mbɔhiduŋ fo ke ŋwo, onyuŋ efre mi. Uyo Ɔbɔŋ Jehovah edi emi.

¹³Ndien, sese, mmakwak ubɔk mi mbaŋa ŋwo fo emi afo owode, ye iyip fo emi afo ɔduɔkde ke ufɔt fo.

¹⁴Nte esit fo eyeda, nte ubɔk fo eyenyuŋ ɔsɔŋɔ ke usen eke ami ndinamde ntem ye afo? Ami Jehovah mmɔdɔhɔ, nyenyuŋ nnam.

¹⁵Ndien ami nyesuan fi ke otu mme idut, nnyuŋ ŋkpɔri fi nsin ke mme obio, nnyuŋ nsobo ndek fo ke ufɔt fo mma.

¹⁶Afo eyenyuŋ asabare idem fo ke enyin mme idut, ndien afo eyefiɔk ete ke ami ndi Jehovah.

¹⁷Ndien uyo Jehovah osim mi, ete,

¹⁸Eyen owo, ufɔk Israel emekabare edi mbukpeŋ enɔ mi: kpukpru mmɔ edi okpoho, ye idaŋ, ye ukwak, ye ŋket ke ufɔt ikaŋ; mmɔ edi mbukpeŋ silver.

¹⁹Mmɔdo ntem ke Ɔbɔŋ Jehovah ɔdɔhɔ, ete, Koro kpukpru mbufo ekabarede edi mbukpeŋ, mmɔdo, sese, ami mmɔŋ ntaŋ mbufo mbok ke ufɔt Jerusalem;

²⁰kpa nte etaŋde silver, ye okuk, ye ukwak, ye ŋket ye idaŋ, esin ke ufɔt ikaŋ, man ebara ikaŋ ke esit etara enye; kpa ntre ke nditaŋ mbufo ke iyaresit mi ye ke ifuresit mi mbon, nnyuŋ ŋkpɔŋ mbufo, nnyuŋ ntara mbufo.

²¹Ndien nyetaŋ mbufo mbon, nnyuŋ mfuri mbufo ke ikaŋ ifuresit mi, nnyuŋ ntara mbufo ke esit.

²²Kpa nte etarade silver ke ufɔt ikaŋ, kpa ntre ke editara mbufo ke esit; ndien mbufo eyefiɔk ete ke ami Jehovah ŋŋwaŋa mbufo ifuresit mi ke idem.

²³Ndien uyo Jehovah osim mi, ete,

²⁴Eyen owo, dɔhɔ enye, Afo edi isɔŋ eke minamke enye asana, eke edim midepke ke esit, ke usen ikpahesit.

²⁵Odu mme prophet esie odu ke esit, kpa nte lion okunide awai ŋkpɔ; mmɔ emeta ukpɔŋ; emeda inyene ye ŋkpɔuto: emenam mme ebe-akpa esie ewak ke esit.

²⁶Mme oku esie emebiat mbet mi, enyuŋ esabare ndisana ŋkpɔ mi: mmɔ idianakede ŋkpɔ Abasi ye ŋkpɔ owo inim isio; inyuŋ idiɔŋɔke se idehede ye se isanade; mmɔ enyuŋ ebɔp enyin mmɔ ebaŋa mme sabbath mi; ami nnyuŋ ntie nte ŋkpɔ ndek ke otu mmɔ.

²⁷Mbɔŋ esie ke otu mmɔ ebiet wolf eke ewaide ŋkpɔ, ke eriduɔk iyip, nnyuŋ nsobo ukpɔŋ, man mmɔ edia udori utuk.

²⁸Mme prophet esie enyuŋ eyet mmɔ ndom, ekut nsu, enyuŋ ebre idiɔŋ abiaŋa enɔ mmɔ, edɔhɔ ete, Ntem ke Ɔbɔŋ Jehovah ɔdɔhɔ, ndien Jehovah idɔhɔke.

²⁹Mbio isɔŋ enam nnama, enyuŋ ewo ŋwo, enyuŋ efik eyen ukut ye ubuene, enyuŋ etuk esen owo ke ido eke minenke.

³⁰Ndien ami nyom owo eke edinamde ɔkɔ, onyuŋ adade ke ebiet emi owurede ke iso mi, ke abaŋa isɔŋ, man enye okubiara: edi ŋkwe.

³¹Ndien ŋŋwaŋa mmɔ ikpahaesit mi ke idem; nnyuŋ nsobo mmɔ ke ifuresit mi; nnyuŋ nda usuŋ mmɔ ndori mmɔ ke ibuot. Uyo Ɔbɔŋ Jehovah edi emi.