Read efik EZEKIEL 27 Bible Online

EZEKIEL 27 - efik bible

EZEKIEL 27

¹NDIEN uyo Jehovah osim mi ete, Afo eyen owo,

²men ndien ikwɔ eseme baŋa Tyre;

³nyuŋ dɔhɔ Tyre, ete, Afo andiduŋ esuk akamba mmɔŋ, andinyam urua mme idut nnɔ ediwak isuo; ntem ke Ɔbɔŋ Jehovah ɔdɔhɔ, ete, O Tyre, afo ɔdɔhɔ, ete, Ami mmeye mma.

⁴Adaŋa fo edu ke esit inyaŋ; mme andikɔŋ fi emenam fi eye ama.

⁵Emeda cypress ke Senir enam kpukpru obukpɔk fo: emeda cedar ke Lebanon enam ito enɔ fi.

⁶Eda ofriyo ke Bashan enam udeŋ fo; enam deck fo ke oduk enin esine ke box eke otode ke isuo Kittim.

⁷Eti linen eke otode Egypt, ubɔk-usɔ abiabon, edi ɔfɔŋ-ito fo, onyuŋ edi ɔfɔŋ-etak ubom fo; purple ye ididuot eke etode ke mme isuo Elishah edi se edade efuk fi.

⁸Mme andiduŋ Zidon ye Arvad edi mmɔ eke ewatde fi: mme enyene-ibuot owo fo, O Tyre, edu fi ke esit; mmɔ edi mme andibɔi fi.

⁹Mbiowo Gebal ye mme enyene-ibuot owo esie edu fi ke esit, efak fi ndudu: kpukpru ubom mbakara ke inyaŋ ye mbio mmɔ edu fi ke esit enyuŋ enyam ŋkpɔ-urua fo.

¹⁰Persia, ye Lud, ye Put edu ke otu udim fo, edi mbon-ekɔŋ fo: mmɔ eda otu-ekɔŋ ye ndun-ukwak ekɔŋ fi ke esit; mmɔ enɔ fi ubɔŋ.

¹¹Nditɔ Arvad ye udim ekɔŋ fo edu ke ibibene ekan ekuk; mbon uko enyuŋ edu ke mme tower fo: mmɔ eda otu-ekɔŋ mmɔ ekɔŋ ke ibibene fo ekan ekuk; mmɔ enam fi eye ama.

¹²Uwak kpukpru oruk inyene esin Tarshish edi owo urua fo; mmɔ eda silver ye ukwak ye idaŋ ye ŋket enyam ke urua fo.

¹³Javan ye Tubal ye Meshech enyam urua ye afo: mmɔ eda owo ye ŋkpɔ okpoho enyam ke urua fo.

¹⁴Mmɔ eke etode ke ufɔk Togarmah eda horse ye mbon horse ye mule enyam ke urua fo.

¹⁵Nditɔ Dedan edi mbon urua fo; ediwak isuo edi urua ubɔk fo: mmɔ eda nduk enin ye obubit eto enɔ fi ke utip.

¹⁶Uwak ŋkpɔ-usɔ fo esin Syria enyam urua ye afo: mmɔ eda emerald, ye purple, ye ŋkpɔ-usɔ abiabon, ye eti linen, ye eme, ye ruby, enyam ke urua fo.

¹⁷Idem Judah ye isɔŋ Israel edi mbon-urua fo: mmɔ eda wheat Minnith ye pannag, ye aran-ɔkwɔk, ye aran, ye balm, enyam ke urua fo.

¹⁸Uwak ŋkpɔ ubɔk-usɔ fo, ye uwak kpukpru oruk inyene esin Damascus anyam urua ye afo ke wine Helbon ye ke afia idet erɔŋ.

¹⁹Vedan ye Javan emi etode ke Uzal eda ŋkpɔ esɔk ke urua fo: mmɔ eda edisana ukwak ye cassia ye calamus enyam ke urua fo.

²⁰Dedan ada ɔfɔŋ eke ebride ke udori horse anyam ɔbɔ fi.

²¹Arabia ye kpukpru mbɔŋ Kedar edi mbon urua fo: mmɔ eda ŋkpri nditɔ ufene ye okukim erɔŋ ye okpo ebot enyam enɔ fi.

²²Mbon-urua Sheba ye Raamah edi mbon-urua fo: mmɔ eda ata eti ye kpukpru oruk ɔsɔŋ-urua itiat, ye gold, enyam ke urua fo.

²³Haran ye Canneh ye Eden, ye mbon-urua Sheba ye Asshur ye Chilmad edi mbon-urua fo.

²⁴Mme mmɔ emi enyam urua ye afo ke ata ediye ŋkpɔ, ke awawa ekura, ye ubɔk-usɔ abiabon, ye ekese damask emi ebɔpde ke uruk, enyuŋ enamde ke cedar, ke urua fo.

²⁵Ubom mbakara Tarshish edi ibibene fo ye urua fo: ŋkpɔ enyuŋ eyɔhɔ fi ke esit, afo onyuŋ enyene ata ukpono ke ufɔt inyaŋ.

²⁶Mmɔ eke ewatde udeŋ fo eda fi eduk ke akwa mmɔŋ: ofum ikɔrabak obom fi ke esit inyaŋ.

²⁷Inyene fo, ye unyam-urua fo, ye ŋkpɔ-urua fo, mbio ubom fo, ye mmɔ eke ebɔide fi, mmɔ eke efakde fi ndudu, ye mmɔ eke esaŋade urua enɔ fi, ye kpukpru mbon-ekɔŋ fo emi edude ke esit, ye ke ofuri udim fo emi odude ke ufɔt fo, eduɔŋɔ ke esit inyaŋ ke usen iduɔ fo.

²⁸Uyom mkpo mmɔ eke ebɔide fi esin mben obio enyek.

²⁹Ndien kpukpru mmɔ eke ewatde udeŋ, mbon-ubom, kpukpru mmɔ eke ebɔide ke inyaŋ, eto ke ubom mmɔ esuhɔre eda ke isɔŋ;

³⁰ndien mmɔ eyeda uyo mmɔ enam ekop ebaŋa fi, enyuŋ eseme ndot-ndot, enyuŋ emen ntan eduɔk ke ibuot mmɔ, enyuŋ emiaŋa ke ntɔŋ:

³¹ndien mmɔ eyenam ibɔ ebaŋa fi, enyuŋ ebɔbɔ ɔfɔŋ-ikpo ke idem, ndien mmɔ eyetua eyet ebaŋa fi ke edidoro esit, ye ke ndot-ndot eseme.

³²Ndien ke eseme mmɔ ke mmɔ editibi ikwɔ ebaŋa fi, enyuŋ eseme fi ke ikwɔ, ete, Anie ebiet Tyre, ebiet enye emi esobode ke ufɔt inyaŋ?

³³Ke ini ŋkpɔ urua fo etode ke inyaŋ ewɔrɔ, afo ɔyɔhɔ ediwak mme idut; afo ada uwak inyene fo, ye eke ŋkpɔ urua fo ofori ndidem ererimbot.

³⁴Ke emi mmɔŋ omobuŋ fi ke edem; ŋkpɔ urua fo ye ofuri udim fo ke ufɔt fo edeŋ.

³⁵Afo enyene kpukpru mme andiduŋ mben inyaŋ ndyɔ; ata ndik anam ndidem mmɔ; mmɔ enyek ke iso mmɔ.

³⁶Mbon-urua ke otu mme idut esi fi; afo amabiara fap, udunyuŋ uduhe ke nsinsi.