Read efik EZEKIEL 28 Bible Online

EZEKIEL 28 - efik bible

EZEKIEL 28

¹NDIEN uyo Jehovah osim mi, ete, Eyen owo, dɔhɔ ɔbɔŋ Tyre, ete,

²Ntem ke Ɔbɔŋ Jehovah ɔdɔhɔ ete, Koro esit fo okoŋde, afo onyuŋ ɔdɔhɔ, ete, Ami ndi abasi kiet; ntie ke itie Abasi ke ufɔt inyaŋ; ndien afo edi owo, udige Abasi; onyuŋ onim esit fo nte esit Abasi:

³sese, afo emenyene ibuot akan Daniel; baba ndibe ŋkpɔ kiet idibeke fi:

⁴afo ada eti ibuot fo ye asian fo ɔkɔ inyene ke idem fo; onyuŋ ɔkɔ gold ye silver esin ke unim-inyene fo:

⁵ata eti ibuot fo ke urua fo esin inyene fo ewak, ndien inyene fo emenere fi esit ke enyɔŋ:

⁶mmɔdo ntem ke Ɔbɔŋ Jehovah ɔdɔhɔ, ete, Koro afo onimde esit fo nte esit Abasi;

⁷mmɔdo, sese, ami nyeda isen owo mme idut emi enyenede ndik, ntiene fi: ndien mmɔ eyesioŋo ofut mmɔ ekpi uyai ifiɔk fo, enyuŋ esabare uyai fo.

⁸Eyeda fi eduɔk ke obube, ndien afo eyekpa mkpa mmɔ eke ekpaŋade afai ke ufɔt inyaŋ.

⁹Nte afo eyedɔhɔ, ete, Ami ndi Abasi ke iso enye emi owotde fi? Ndien afo edi owo, udige Abasi, ke ubɔk enye emi owotde fi.

¹⁰Afo eyekpa mkpa mbon edut ke ubɔk isen owo; koro edi ami ndɔhɔ. Uyo Ɔbɔŋ Jehovah edi emi.

¹¹Edikem uyo Jehovah osim mi, ete,

¹²Eyen owo, men ikwɔ eseme baŋa edidem Tyre, nyuŋ dɔhɔ enye, ete, Ntem ke Ɔbɔŋ Jehovah ɔdɔhɔ, ete, Afo efik idiɔŋɔ mfɔn-mma, ɔmɔyɔhɔ ifiɔk, omonyuŋ eye ama.

¹³Afo okodu ke Eden, iŋwaŋ-esa Abasi: kpukpru ɔsɔŋ-urua itiat ke efuk fi idem, sardius, ye topaz, ye diamond, ye beryl, ye onyx, ye jasper, ye sapphire, ye emerald, ye carbuncle, ye gold; ubɔk-usɔ ekɔmɔ fo ye eke iban fo edu fi ke esit, eketim mmɔ enim ke usen emi ekebotde fi.

¹⁴Afo edi cherub emi eyetde aran emi ɔfuhɔde ŋkpɔ; ndien ami nnim fi ntem: afo odu ke edisana obot Abasi; asasaŋa ke mme ufɔt mme itiat emi esakde ke ikaŋ.

¹⁵Afo ɔfɔn ama ke usuŋ fo toto ke usen emi ekebotde fi, tutu ekut fi idiɔk ido ke esit.

¹⁶Uwak urua fo esin eyɔhɔ fi afai ke ufɔt, ndien afo anam idiɔk: ndien nsabare fi nsio ke obot Abasi nduɔk, nnyuŋ nsobo fi, O cherub emi ɔfuhɔde ke ufɔt mme itiat emi esakde ke ikaŋ.

¹⁷Uyai fo emenere fi esit ke enyɔŋ, afo amabiat ifiɔk fo abaŋa ubɔŋ fo: mmɔŋ nduɔk fi ke isɔŋ, mmɔŋ nda fi nnim ke iso ndidem, man ese fi.

¹⁸Afo ada uwak mme idiɔk ido fo ke ŋkwaŋa-urua fo, asabare edisana ebiet fo; ndien nyesio fi ikaŋ ke ufɔt, ndien enye eyeta fi; ndien nyenam fi akabare edi ntɔŋ ke isɔŋ ke iso kpukpru owo eke ekutde fi.

¹⁹Kpukpru mmɔ eke efiɔkde fi ke otu mme idut eyekpa idem ebaŋa fi: afo eyekabare edi ŋwure, udunyuŋ uduhe aba ke nsinsi.

²⁰Edikem uyo Jehovah osim mi, ete,

²¹Eyen owo, wuk iso fo se Zidon, nyuŋ tiŋ prophecy baŋa enye; nyuŋ dɔhɔ ete,

²²Ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye afo zidon, nyenyuŋ nda ukpono ke ufɔt fo: ndien mmɔ eyefiɔk ete ke ami ndi Jehovah, ke ini ndinamde ikpe ke esit, ndien eyenim mi ke edisana ke esit.

²³Ndien nyenɔ idiɔk udɔŋɔ esɔk enye, ye iyip ke mme efak esie; ndien mmɔ eke ekpaŋade afai eyeduɔŋɔ enye ke ufɔt ke ofut eke otode ke ŋkan-ŋkuk edidoro enye. Ndien mmɔ eyefiɔk ete ke ami ndi Jehovah.

²⁴Ndien ufɔk Israel idikwe aba akpap eke okimde ye ŋkukim eke ayatde, eke otode kpukpru mmɔ emi ekande mmɔ ekuk, emi esede mmɔ ke ndek. Ndien mmɔ eyefiɔk ete ke ami ndi Ɔbɔŋ Jehovah.

²⁵Ntem ke Ɔbɔŋ Jehovah ɔdɔhɔ ete; Ke ini emi ntaŋde ufɔk Israel mfep ke mme idut emi mmɔ ekesuanade ke otu mmɔ, ke mmɔ enyuŋ enimde mi ke edisana ke enyin mme idut, ndien mmɔ eyeduŋ ke isɔŋ mmɔ emi ŋkadade nnɔ owo mi Jacob.

²⁶Ndien mmɔ eyeduŋ ke esit ke ifure, enyuŋ ebɔp ufɔk, enyuŋ etɔ iŋwaŋ-vine, enyuŋ eduŋ ke ifure, ke ini ndinamde ikpe ye kpukpru mmɔ eke etode ke ŋkan-ŋkuk ese mmɔ ke ndek; ndien mmɔ eyefiɔk ete ke ami ndi Jehovah Abasi mmɔ.