Read efik EZEKIEL 29 Bible Online

EZEKIEL 29 - efik bible

EZEKIEL 29

¹KE ɔyɔhɔ isua duop, ke ɔfiɔŋ duop, ke usen ɔfiɔŋ duopeba, uyo Jehovah edisim mi, ete,

²Eyen owo, wuk iso fo se Pharaoh edidem Egypt, nyuŋ tiŋ prophecy baŋa enye ye ofuri Egypt.

³Dɔhɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye afo Pharaoh edidem Egypt, akamba fiom emi anade ke ufɔt mme akpa mmɔŋ esie, emi ɔdɔhɔde, ete, Akpa mi edi okimmɔ, ami ŋkonyuŋ nnam enye nnɔ idem mi.

⁴Ndien nyesin fi uwam ke mbaŋ, nyenyuŋ nnam iyak akpa fo eyire fi ke mkpɔk, ndien nyemen fi nsio ke ufɔt akpa fo, ndien kpukpru iyak akpa fo eyeyire fi ke mkpɔk.

⁵Ndien nyemen fi nduɔk ke wilderness, kpa fi ye kpukpru iyak akpa fo: afo eyeduɔ ke iso isɔŋ; iditaŋke fi, idinyuŋ imenke fi ibon: nyeda fi nnɔ mme unam ikɔt ye mme inuen enyɔŋ eta.

⁶Ndien kpukpru mme andiduŋ Egypt eyefiɔk ete ke ami ndi Jehovah, koro mmɔ edide esaŋ nnyanyaŋa ufɔk Israel.

⁷Ke adaŋemi mmɔ emumde fi ke ubɔk, afo ɔbuŋɔ onyuŋ asiak mmɔ ofuri afara: ndien ke ini mmɔ eberede idem ye afo, afo ɔbuŋɔ onyuŋ ayak ofuri isin mmɔ ada.

⁸Mmɔdo ntem ke Ɔbɔŋ Jehovah ɔdɔhɔ ete, Sese, mmɔŋ nda ofut ntiene fi, nyenyuŋ nsibe fi owo ye ufene mfep.

⁹Ndien isɔŋ Egypt eyekabare edi ndon ye ŋwure, ndien mmɔ eyefiɔk ete ke ami ndi Jehovah; koro enye ɔdɔhɔde, ete, Akpa edi okimmɔ, ami ŋkonyuŋ nnam.

¹⁰Mmɔdo, sese, ami nyenam ikɔ ye afo ye akpa mmɔŋ fo; nyenyuŋ nnim isɔŋ Egypt ke ata ŋwure ye ndon, ɔtɔŋɔde ke Migdol tutu osim ke Syene: tutu onyuŋ osim ke adaŋa Kush.

¹¹Ndien ukot owo idisaŋake ke esit ibe, ukot enaŋ idinyuŋ isaŋake ke esit ibe, owo idinyuŋ iduŋke enye ke ofuri isua aba.

¹²Ndien nyenim isɔŋ Egypt ke nsobo ke ufɔt mme idut emi esobode, nnyuŋ nnim mme obio esie ke ŋwure ke ufɔt mme obio eke ewurede. Mmɔ eyesobo ke ofuri isua aba: nyenyuŋ nsuan Egypt ke otu mme idut, nnyuŋ ŋwari mmɔ ke otu mme obio.

¹³Koro ntem ke Ɔbɔŋ Jehovah ɔdɔhɔ, ete, Ke utit isua aba ke nditaŋ Egypt ke mme idut emi mmɔ esuanade ke esit, mfep mbon:

¹⁴ndien nyeda mbon ntaŋ-mfep Egypt mfiak; nnyuŋ nda mmɔ nnyɔŋ ke isɔŋ Pathros, ke isɔŋ emana mmɔ; ndien do ke mmɔ edidi obukpo idut.

¹⁵Enye eyedi obukpo akan mme idut efen, idinyuŋ imenke aba idem ikan mme idut.

¹⁶Ndien mmɔ ididige aba iberedem ufɔk Israel, ke enam mmɔ eti idiɔk ido mmɔ, koro mmɔ ekabarede ebine mmɔ: ndien mmɔ eyefiɔk ete ke ami ndi Ɔbɔŋ Jehovah.

¹⁷Edikem ke ɔyɔhɔ isua edip ye itiaba, ke akpa ɔfiɔŋ, ke akpa usen ɔfiɔŋ, uyo Jehovah osim mi, ete,

¹⁸Eyen owo, Nebuchadrezzar edidem Babylon ekesin mbon-ekɔŋ esie enam akwa utom ebaŋa Tyre: kpukpru ibuot ekabare edi ibɔ, kpukpru afara enyuŋ eyaŋade: ndien enye ye mbon-ekɔŋ esie ikwe ŋkpɔ-eyen-utom ke Tyre, nte ekemde ye utom oro enye akanamde abaŋa enye:

¹⁹mmɔdo ntem ke Ɔbɔŋ Jehovah ɔdɔhɔ, ete, Sese, mmɔŋ nda isɔŋ Egypt nnɔ Nebuchadrezzar edidem Babylon; ndien enye eyemen ŋkpɔ emi enye okonimde efep, onyuŋ obume enye, onyuŋ ataŋ ŋkpɔ esie ke ŋkan-ubɔk; ndien oro eyedi ŋkpɔ-eyen-utom mbon-ekɔŋ esie.

²⁰Mmada isɔŋ Egypt nnɔ enye ke utip esie, emi enye aŋwanade ke esit, koro mmɔ ekenamde utom enɔ mi: uyo Ɔbɔŋ Jehovah edi emi.

²¹Ke usen oro nyenam nduk otibe ɔnɔ ufɔk Israel nnyuŋ nyak fi aŋwaŋade inua ke otu mmɔ: ndien mmɔ eyefiɔk ete ke ami ndi Jehovah.