Read efik EZEKIEL 30 Bible Online

EZEKIEL 30 - efik bible

EZEKIEL 30

¹NDIEN uyo Jehovah osim mi, ete, Eyen owo, tiŋ prophecy, nyuŋ dɔhɔ ete,

²Ntem ke Ɔbɔŋ Jehovah ɔdɔhɔ ete, Mbufo eseme, ete, Mbɔm usen emi!

³Koro usen emekpere, usen Jehovah omonyuŋ ekpere, usen idiɔk enyɔŋ; enye eyedi ini mme idut.

⁴Ndien ofut osim Egypt, akwa ndik onyuŋ odu ke Ethiopia, ke ini mme akpaŋa afai eduɔŋɔde ke Egypt, ndien mmɔ eyeda ŋkpɔ emi enye okonimde, enyuŋ ebiat ɔtɔ emi ibibene esie edade.

⁵Ethiopia, ye Put, ye Lud, ye ofuri mbuaha owo, ye Cub, ye nditɔ obio ediomi ŋko eyeduɔŋɔ ke ofut.

⁶Ntem ke Jehovah ɔdɔhɔ, ete, Mmɔ eke emumde Egypt ekama eyeduɔŋɔ ŋko; iseri odudu esie eyenyuŋ ɔsuhɔre; ɔtɔŋɔde ke Migdol tutu osim ke Syene, ke mmɔ ediduɔŋɔ ke esit ke ofut, Uyo Jehovah edi emi.

⁷Ndien eyesobo mmɔ ke otu mme obio eke esobode, mme obio esie eyenyuŋ edu ke otu mme obio eke ebiarade.

⁸Ndien mmɔ eyefiɔk ete ke ami ndi Jehovah, ke ŋkimde ikaŋ ke Egypt, ndien kpukpru mmɔ eke eŋwamde enye eyebuŋɔ.

⁹Ke usen oro mme isuŋ-utom eyeto ke iso mi ediere ke ubom, eka ndinam nditɔ Ethiopia ndue-idem edikhe, ndien akwa ndik eyenam mmɔ, kpa nte eke usen Egypt: koro, sese, ke edi.

¹⁰Ntem ke Ɔbɔŋ Jehovah ɔdɔhɔ, ete, Nyenyuŋ nda ubɔk Nebuchadrezzar edidem Babylon nnam akwa otu owo Egypt ekure.

¹¹Eyeda enye ye ikɔt esie ŋko, kpa mme idut emi enyenede ndik, edi ndisobo idut oro. Mmɔ eyesioŋo ofut mmɔ eda enam Egypt enyuŋ eda mmɔ emi eduɔŋɔde afai eyɔhɔ ke idut oro.

¹²Nyenyuŋ nnam mme akpa mmɔŋ esat ŋko, nnyuŋ nnyam idut oro nsin mme idiɔk owo ke ubɔk, nnyuŋ nda isɔŋ ye se iyɔhɔde ke esit nsin ke ubɔk isen owo esobo. Edi ami Jehovah ndɔhɔ.

¹³Ntem ke Ɔbɔŋ Jehovah ɔdɔhɔ ete, Nyenyuŋ nsobo ibɔk, nnyuŋ nnam mbukpo ibɔk mmɔ etre ke Noph; ndien Ɔbɔŋ isɔŋ Egypt ididuhe aba; nyenyuŋ nda ndik ndori isɔŋ Egypt.

¹⁴Nyenyuŋ nsobo Pathros, nnyuŋ ŋkim ikaŋ ke Zoan, nnyuŋ nnam ikpe ke No.

¹⁵Ndien nyeŋwaŋa ifuresit mi ke Sin, odudu Egypt; nnyuŋ nsibe akwa otu owo No mfep.

¹⁶Ndien nyekim ikaŋ ke Egypt: Sin eyenyuŋ okop ubiak eti-eti; No eyenyuŋ edi se mmɔ ediwaide mbai-mbai; Noph eyenyuŋ okut ukut kpukpru ini.

¹⁷Mkparawa Aven ye eke Pibeseth eyeduɔŋɔ ke ofut: ndien mme obio emi eyenyɔŋɔ ke ntaŋ-mfep.

¹⁸Usen eyekim ke Tehaphnehes ŋko, ke ini mbuŋde ɔkpɔnɔ Egypt do: ndien iseri odudu esie eyetre ke esit: ama edi enye, idiɔk enyɔŋ eyefuk enye, eyenyuŋ etaŋ nditɔ-iban esie enyɔŋɔ.

¹⁹Ndien nyenam ikpe ke Egypt: ndien mmɔ eyefiɔk ete ke ami ndi Jehovah.

²⁰Edikem ke ɔyɔhɔ isua duopekiet, ke akpa ɔfiɔŋ, ke ɔyɔhɔ usen ɔfiɔŋ itiaba, uyo Jehovah osim mi, ete,

²¹Eyen owo, mmobuŋ Pharaoh edidem Egypt ubɔk; ndien, sese, ibɔpke enye, isinke ibɔk, inyuŋ idianke ɔfɔŋ, man ebɔp enye enyuŋ esɔŋ enye man omum ofut.

²²Mmɔdo ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye Pharaoh edidem Egypt, ndien nyebuŋ enye ubɔk emi ɔsɔŋɔde onyuŋ ɔbuŋɔde; ndien nyenam ofut oto enye ubɔk ɔduɔ ke isɔŋ.

²³Ndien nyesuan Egypt ke otu mme idut, nnyuŋ ŋwari mmɔ ke otu mme obio.

²⁴Nyenyuŋ nsɔŋ edidem Babylon ubɔk, nnyuŋ nda ofut mi nsin enye ke ubɔk: ndien nyebuŋ Pharaoh ubɔk, ndien enye eyemum mmum owo eke akpade afai ke iso esie.

²⁵Nyenyuŋ nsɔŋ edidem Babylon ubɔk, ndien ubɔk Pharaoh eyeduɔŋɔ; ndien mmɔ eyefiɔk ete ke ami ndi Jehovah, ke ini ndidade ofut mi nsin edidem Babylon ke ubɔk, nnyuŋ nnyanarede enye ndori ke isɔŋ Egypt.

²⁶Nyesuan Egypt ke otu mme idut ŋko-ŋko; nnyuŋ ŋwari mmɔ ke otu mme obio; ndien mmɔ eyefiɔk ete ke ami ndi Jehovah.