Read efik EZEKIEL 31 Bible Online

EZEKIEL 31 - efik bible

EZEKIEL 31

¹EDIKEM ke ɔyɔhɔ isua duopekiet, ke ɔyɔhɔ ɔfiɔŋ ita, ke akpa usen ɔfiɔŋ, uyo Jehovah edisim mi, ete,

²Eyen owo, dɔhɔ Pharaoh edidem Egypt ye akwa otu owo esie, ete,

³Afo ebiet anie ke ubom fo? Sese, Assyria ekedi cedar ke Lebanon eke eyede ke ŋkɔk, onyuŋ enyenede mfuhɔ eke anamde mfut, ndien idaha esie okoŋ; ata nsom esie onyuŋ odu ke otu mbubit enyɔŋ.

⁴Mmɔŋ anam enye okpon, inyaŋ anam enye okoŋ, mme idim esie esaŋa ekan ebiet emi etɔde enye ekuk; enye onyuŋ anam mme owowo esie ewet esim kpukpru eto iŋwaŋ.

⁵Oro esin idaha esie okoŋ akan kpukpru eto iŋwaŋ, ŋkɔk esie enyuŋ ekɔri, ikɔŋ esie onyuŋ asiaha, oto ke ediwak mmɔŋ nte enye anyanarede.

⁶Kpukpru inuen enyɔŋ enam efɔk ke ŋkɔk esie: kpukpru mme unam ikɔt enyuŋ eman nditɔ ke idak ikɔŋ esie, kpukpru ikpɔ mme idut enyuŋ eduŋ ke idak mfut esie.

⁷Ndien enye eye ke ubom esie: koro ŋkɔk esie eniɔŋide: koro oruŋ esie osimde akwa mmɔŋ.

⁸Mme cedar ifukke enye ke iŋwaŋ-esa Abasi: mme cypress ibietke ŋkɔk esie, mme plane ibietke ikɔŋ esie, baba eto kiet ke iŋwaŋ-esa Abasi eke ebietde enye ke uyai, iduhe.

⁹Ŋkanam enye eye ke uwak ŋkɔk esie: ndien kpukpru eto Eden eke edude ke iŋwaŋ-esa Abasi efibe enye ufup.

¹⁰Mmɔdo ntem ke Ɔbɔŋ Jehovah ɔdɔhɔ, ete, Koro afo okoŋde ke idaha: enye onyuŋ esinde nsom esie ke ufɔt mbubit enyɔŋ, onyuŋ emenerede esit esie onim ke enyɔŋ ke idaha esie;

¹¹mmɔdo mmende enye nsin ke ubɔk ɔkpɔsɔŋ edidem mme idut; enye iditreke ndinam enye: mbin enye mfep mbaŋa idiɔk ido esie.

¹²Ndien isen owo, kpa mme idut emi enyenede ndik, emekpi enye, emenyuŋ ekpɔŋ enye: ŋkɔk esie emeduɔŋɔ ke ikpɔ obot, ye ke kpukpru itihere, ikɔŋ esie enyuŋ ebuŋɔ ke mben kpukpru idim idut emi, ndien kpukpru mme idut ererimbot emeto ke mfut esie esuhɔre, enyuŋ ekpɔŋ enye.

¹³Kpukpru inuen enyɔŋ eduŋ ke ŋwure esie, kpukpru mme unam ikɔt enyuŋ edu ke ikɔŋ esie.

¹⁴Man baba eto mmɔŋ kiet okumenere idem ke enyɔŋ abaŋa idaha mmɔ, ekunyuŋ esin nsom mmɔ ke ufɔt mbubit enyɔŋ; man baba mme ɔŋwɔŋ mmɔŋ kiet okudoro ke idem mmɔ abaŋa idaha mmɔ: koro edade kpukpru mmɔ eyak enɔ mkpa, esin ke idak isɔŋ, ke otu nditɔ owo, ye mmɔ eke esuhɔrede ke obube.

¹⁵Ntem ke Ɔbɔŋ Jehovah ɔdɔhɔ ete, Ke usen oro enye ɔkɔsuhɔrede ke obube, ami nsin etua eyet; ŋkofuk inyaŋ mbaŋa enye, nnyuŋ ŋkpaŋ mme akpa mmɔŋ esie, enyuŋ ekɔbi ikpɔ mmɔŋ: nnyuŋ nsin Lebanon eseme enye, kpukpru eto ikɔt enyuŋ ekpa idem ebaŋa enye.

¹⁶Ŋkenyeŋe mme idut ke uyom iduɔ esie, ke nnamde enye ɔsuhɔre ke udi, ye mmɔ emi esuhɔrede eduk ke obube: ndien mmɔ emi edude ke idak isɔŋ ekop ndɔŋesit, kpa kpukpru eto Eden, ata nti ye ndimek eto Lebanon, kpukpru mmɔ eke ekeŋwɔŋde mmɔŋ.

¹⁷Mmɔ ŋko etiene enye esuhɔre ke obio ekpo esim mmɔ emi ekewotde ke ofut; kpa ubɔk esie emi eduŋde ke mfut esie ke otu mme idut.

¹⁸Afo (Egypt) ebiet anie ntem ke otu eto Eden ke ubɔŋ ye ke ubom? Edi eyenam fi etiene eto Eden ɔsuhɔre ke idak isɔŋ: afo eyesuhɔre ana ke otu mbon edut, ye mmɔ eke ekewotde ke ofut. Oro edi Pharaoh ye ofuri otu owo esie. Uyo Ɔbɔŋ Jehovah edi emi.