Read efik EZEKIEL 33 Bible Online

EZEKIEL 33 - efik bible

EZEKIEL 33

¹EDIKEM uyo Jehovah osim mi, ete, Eyen owo, neme ye nditɔ oruk fo, nyuŋ dɔhɔ mmɔ, ete,

²Ke ndade ofut ntiene obio, ndien ke mbio-obio oro edade owo kiet ke adaŋa mmɔ, enyuŋ enim enye, ete ekpeme ɔnɔ mmimɔ:

³ndien enye ama okut ofut edide ke obio, ndien ofuri ukorowo, onyuŋ asian mbio-obio;

⁴ndien andikop uyo ukorowo oro ama okop, ndien mikereke item, ndien ofut ama edi edida enye efep, iyip esie eyedoro enye ke ibuot.

⁵Enye okop uyo ukorowo, ndien ikereke item; iyip esie ɔsɔp idemesie. Ndien enye ama okop item, enye anyaŋa ukpɔŋ esiemɔ.

⁶Edi edieke andikpeme okutde ofut edide, ndien mifurike ukorowo, minyuŋ isianke mbio-obio; ndien ofut ama edi edida owo ke otu mmɔ efep, eda enye ke idiɔk ido esie efep; ndien nyebup iyip esie ke ubɔk andikpeme oro.

⁷Ke ntre, eyen owo, mmonim fi ke owo eke ekpemede, nnɔ ufɔk Israel; kop ndien ikɔ eke otode mi ke inua, nyuŋ sian mmɔ nɔ mi.

⁸Ke ini ndidɔhɔde idiɔk owo, nte, Idiɔk owo, afo udutreke ndikpa; ndien afo mutiŋke unɔ enye, man asian idiɔk owo oro, ete enye ɔkpɔŋ usuŋ esie, enye idiɔk owo ama akpa ke idiɔk ido esie; ndien nyebup iyip esie ke ubɔk fo.

⁹Edi edieke afo asiande idiɔk owo abaŋa idiɔk ido esie, ete akabare ɔkpɔŋ enye, ndien enye mikabakede ikpɔŋ usuŋ esie, enye eyekpa ke idiɔk ido esie, edi afo amanyaŋa ukpɔŋ fo.

¹⁰Afo eyen owo dɔhɔ ndien ufɔk Israel, ete, Ntem ke mbufo edɔhɔ ete, Edieke mme ukwaŋ-ŋkpɔ nnyin ye mme idiɔk ido nnyin edorode nnyin ke idem, nnyin inyuŋ iyemere ke esit, idinam didie ndien idu uwem?

¹¹Dɔhɔ mmɔ, ete, Ɔbɔŋ Jehovah ɔdɔhɔ, ete, Ma uwem mi, mkpa idiɔk owo inemke mi esit, edi idiɔk owo akam akabare ɔkpɔŋ usuŋ esie, ndien odu uwem: mbufo, O ufɔk Israel, ekabare, ekabare; koro nsinam mbufo ekpekpaŋa?

¹²Afo eyen owo, dɔhɔ ndien nditɔ oruk fo, ete, Eti ido eti owo idinyaŋake enye ke usen eke enye eduede: ama edi idiɔk ido owo, enye ididuɔhɔ ke esit ke usen eke enye akabarede ɔkpɔŋ idiɔk ido esie; ndien eti owo idikemeke ndidu uwem ke eti ido esie ke usen eke enye eduede.

¹³Ke ini ndɔhɔde eti owo, nte, “Enye eyedu uwem”; ndien enye ɔbuɔt idem ke edinen ido esie, onyuŋ anam se ikwaŋade, iditihi edinen ido esie baba; enye eyekpa ke ukwaŋ-ŋkpɔ esie eke enye akanamde.

¹⁴Ndien ŋko ke ndɔhɔde idiɔk owo, nte, “Afo udutreke ndikpa”; ndien enye akabare ɔkpɔŋ mme idiɔk ido esie, onyuŋ anam edinen ido ye eti ido;

¹⁵idiɔk owo ama ayak ŋkpɔ ubiɔŋ, ayak se enye adade ke ŋwo, asaŋa ke mme ewuhɔ uwem, minyuŋ inamke mme ukwaŋ-ŋkpɔ; enye iditreke ndidu uwem, idikpaha kpa.

¹⁶Iditihi idiɔk ido esie emi enye akanamde baba kiet inɔ enye: enye ama anam edinen ido ye eti ido; iditreke ndidu uwem.

¹⁷Edi nditɔ oruk fo edɔhɔ, ete, Usuŋ Ɔbɔŋ inenke. Ndien ama edi mmɔ, usuŋ mmɔ inenke.

¹⁸Ke ini edinen owo ɔkpɔŋde edinen ido esie onyuŋ anamde ukwaŋ-ŋkpɔ, enye eyekpa ke esit.

¹⁹Ndien ke idiɔk owo ɔkpɔŋde idiɔk ido esie, onyuŋ anamde edinen ido ye eti ido, enye eyedu uwem ke esit.

²⁰Ndien mbufo edɔhɔ ete, “Usuŋ Ɔbɔŋ inenke.” Nyekpe ikpe ye mbufo kpukpru nte ekemde ke ido mbufo, O ufɔk Israel.

²¹Edikem ke ɔyɔhɔ isua duopeba nte eketaŋ nnyin efep, ke ɔyɔhɔ ɔfiɔŋ duop, ke ɔyɔhɔ usen ɔfiɔŋ ition, owo emi okotode ke Jerusalem ɔbɔhɔ osim mi, ete, Emesuan obio.

²²Ndien ubɔk Jehovah edidoro mi ke idem ke mbubreyo, ke andibɔhɔ oro mikaidige kaŋa; onyuŋ atat mi inua, tutu enye osim mi ke usenubɔk; ntem ke inua mi atara, ndien ndige aba imum.

²³Ndien uyo Jehovah osim mi, ete,

²⁴Eyen owo, mme andiduŋ ndon emi ke isɔŋ Israel edɔhɔ ete, Abraham ekedi kierakiet, ndien ada isɔŋ emi; ndien nnyin idi ediwak; emeda isɔŋ enɔ nnyin inyene.

²⁵Dɔhɔ mmɔ ndien, ete, Ntiem ke Ɔbɔŋ Jehovah ɔdɔhɔ, ete, Mbufo ke eta unam ekɔrɔ ke iyip, enyuŋ emenere enyin mbufo, ese ibɔk mbufo, enyuŋ eduɔk iyip: nte mbufo ndien edida isɔŋ enyene?

²⁶Mbufo ebere edem ke ofut mbufo; mbufo (iban) enam mbubiam; kpukpru mbufo enyuŋ esabare iban mbɔhiduŋ mbufo; nte mbufo edida ndien isɔŋ enyene?

²⁷Dɔhɔ mmɔ ntem, ete, Ntem ke Ɔbɔŋ Jehovah ɔdɔhɔ ete, Ma uwem mi, mme mmɔ emi edude ke ndon eyeduɔŋɔ ke ofut, ndien nyeda mmɔ eke edude ke iso isɔŋ nnɔ mme unam ikɔt eta, ndien mmɔ eke edude ke mkpɔsɔŋ ebiet ye ke aba itiat eyekpaŋa ke idiɔk udɔŋɔ.

²⁸Ndien mmɔŋ nnam isɔŋ edi ndon ye nditaha, nnyuŋ nnam iseri odudu esie etre; ndien ikpɔ obot Israel eyena ikpikpu, baba owo kiet idinyuŋ isaŋake ibe.

²⁹Ndien mmɔ eyefiɔk ete ke ami ndi Jehovah, ke ini nnamde isɔŋ edi ndon ye nditaha, mbaŋa kpukpru mbubiam mmɔ emi enamde.

³⁰Afo ŋko, eyen owo, nditɔ obio mbufo ke eneme nneme ebaŋa fi ke edem ibibene, ye ke mme inuaotop ufɔk, kiet onyuŋ ɔdɔhɔ kiet, kpukpru owo ye eyen-ete mmɔ, ete, Mbɔk, mbufo edi, nnyin ika ikokop ikɔ emi otode Jehovah;

³¹ndien mmɔ edi ke ɔtɔ fo, kpa nte mbio-obio edide, enyuŋ etie ke iso fo, kpa nte ikɔt mi etiede, mmɔ enyuŋ ekop ikɔ fo; edi inamke mmɔ: koro mmɔ enamde nte mbon-ima ke mkpɔk-inua mmɔ, edi esit mmɔ ebine udori mmɔ.

³²Ndien mmɔ ese fi ke ikwɔ mbonima, eke owo edinem uyo, ɔfiɔk nditim mbre ndido: ndien mmɔ ekop ikɔ fo, edi inamke mmɔ baba:

³³ndien ke ini enye edide (sese, ke edi) mmɔ eyefiɔk, ndien, ete ke prophet kiet okodu ke otu mmɔ.