Read efik EZEKIEL 34 Bible Online

EZEKIEL 34 - efik bible

EZEKIEL 34

¹NDIEN uyo Jehovah osim mi, ete, Eyen owo, tiŋ prophecy baŋa mme ɔbɔk-erɔŋ Israel;

²tiŋ prophecy, nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ mme ɔbɔk erɔŋ, ete: Ɔdɔdiɔk ɔnɔ mme ɔbɔk-erɔŋ Israel emi ebɔkde idem mmɔ. Nte mme ɔbɔk ikpebɔkke ufene?

³Mbufo edia mmɔŋ eba enyuŋ esine idet ke idem, ewot mmɔ eke ekponide; edi ibɔkke ufene.

⁴Mbufo isɔŋke mmɔ emi idem emende mmɔ, inyuŋ ikɔkke mmɔ emi edɔŋɔde, inyuŋ ibɔpke mmɔ emi ebuŋɔde, inyuŋ imenke mmɔ emi ebinde efep ifiak idi, inyuŋ iyomke mmɔ eke esopde; edi ekan mmɔ ke nsɔŋ-ubɔk ye ke nnama.

⁵Ndien mmɔ emesuana, koro owo eke ɔbɔkde miduhe: mmɔ enyuŋ ekabare edi udia kpukpru mme unam ikɔt, ndien mmɔ emesuana.

⁶Ufene mi ediyo ke kpukpru ikpɔ obot, ye ke kpukpru edikoŋ obot: ufene mi emenyuŋ esuana ke iso ofuri isɔŋ; ndien baba owo kiet ibineke, baba owo kiet inyuŋ iyomke.

⁷Mbufo mme ɔbɔk-ufene, ekop ndien uyo Jehovah;

⁸Ɔbɔŋ Jehovah ɔdɔhɔ, ete, Ma uwem mi, koro ufene mi ekabarede edi mbume, ufene mi enyuŋ ekabare edi udia kpukpru mme unam ikɔt, koro owo eke ekpemede miduhe, mme ɔbɔk-ufene mi minyuŋ ibineke ufene mi, mme ɔbɔk enyuŋ ebɔk idem mmɔ ndien ibɔkke ufene mi;

⁹mbufo mme ɔbɔk-ufene ekop, ndien, uyo Jehovah,

¹⁰Ntem ke Ɔbɔŋ Jehovah ɔdɔhɔ ete, Sese, ami mmɔŋ nnam ikɔ ye mme ɔbɔk-ufene; nyenyuŋ nyom ufene mi ke ubɔk mmɔ, nnyuŋ nnam mmɔ etre ndibɔk ufene; mme ɔbɔk idinyuŋ ibɔkke aba idem mmɔ; ndien nyesio mmɔ ufene mi ke inua, ndien mmɔ ididige aba udia mmɔ.

¹¹Koro ntem ke Ɔbɔŋ Jehovah ɔdɔhɔ ete; Se mi, ami nyeyom ufene mi, nnyuŋ nduŋɔ mmɔ.

¹²Kpa nte ɔbɔk ufene ɔduŋɔde otu ufene esie ke usen eke enye odude ke otu ufene esie emi esuanade; kpasuk ntre ke ndiduŋɔ ufene mi, nnyuŋ nnyaŋa mmɔ nsio ke kpukpru ebiet emi mmɔ esuanade ke esit ke usen obubit enyɔŋ ye ata ekim.

¹³Ndien nyesio mmɔ ke otu mme idut nnyuŋ ntaŋ mmɔ ke obio mbon, nnyuŋ nda mmɔ ndi ke isɔŋ mmɔ, ndien nyebɔk mmɔ ke ikpɔ obot Israel, ke mben udiɔŋ mmɔŋ, ye ke kpukpru ebiet iduŋ isɔŋ.

¹⁴Nyebɔk mmɔ ke eti mbiet; nna mmɔ eyenyuŋ odu ke ŋkokoŋo obot Israel: ndien eyesuhɔre ena do ke eti nna, eyenyuŋ eta edisehe mbiet ke ikpɔ obot Israel.

¹⁵Ɔbɔŋ Jehovah ɔdɔhɔ, ete, Ami nyebɔk ufene mi, ami nyenyuŋ nnam mmɔ esuhɔre ena.

¹⁶Nyeyom se isopde, nnyuŋ nda se ekebinde efep mfiak ndi, nnyuŋ mbɔp se ibuŋɔde, nnyuŋ nsɔŋ se idem ememde enye: nnyuŋ nsobo se ikponde ye se isɔŋde; nnyuŋ nda ikpe mbɔk mmɔ.

¹⁷Ntem ke Ɔbɔŋ Jehovah onyuŋ ɔdɔhɔ, ete, Ndien mbufo ufene mi, sese, ami nyekpe ikpe ke ufɔt erɔŋ ye erɔŋ, ye ke ufɔt mme okukim ye mme okpo.

¹⁸Nte mbufo enim ke ekpri akan mbufo emi mbufo etade eti mbiet, ndien mbufo eda ukot mbufo edigi mbiet mbufo eke ɔsuhɔde? Mbufo enyuŋ eŋwɔŋ edideŋi mmɔŋ, ndien etimere se isuhɔde ke ukot mbufo.

¹⁹Ndien ama edi ufene mi, mmɔ eta se mbufo edigide ke ukot mbufo, enyuŋ eŋwɔŋ se mbufo etimerede ke ukot mbufo.

²⁰Mmɔdo ntem ke Ɔbɔŋ Jehovah ɔdɔhɔ mmɔ, ete, Se mi, ami nyekpe ikpe ke ufɔt erɔŋ eke esehede ye erɔŋ eke ɔdiɔkde idem.

²¹Koro mbufo edade ŋkaŋ ye afara enuk, enyuŋ edade nduk mbufo ekim kpukpru mmɔ emi idem ememde mmɔ, tutu mbufo esuan mmɔ esin ke esien.

²²Ndien nyenyaŋa ufene mi, mmɔ idinyuŋ idige aba se ebumede: ndien ami nyekpe ikpe ke ufɔt erɔŋ ye erɔŋ.

²³Ndien nyenam ɔbɔk kiet eke edibɔkde mmɔ adaha ada akan mmɔ, kpa owo mi David; enye eyebɔk mmɔ, ndien mmɔ eyenyene enye ke andibɔk.

²⁴Ndien ami Jehovah nyedi Abasi mmɔ, ndien owo mi David eyenyuŋ edi ɔbɔŋ ke otu mmɔ: edi ami Jehovah ndɔhɔ.

²⁵Nyenyuŋ nnam ediomi emem nnɔ mmɔ, nnyuŋ nnam mme idiɔk unam etre ke isɔŋ: ndien mmɔ eyeduŋ ke wilderness ke ifure, enyuŋ ede idap ke akai.

²⁶Ndien nyenam mmɔ ye akamba obot mi emi akande okuk, edi se idiɔŋde (owo): nyenyuŋ nnam edim edep ke ekem ini esie; edim nti ŋkpɔ eyedu.

²⁷Ndien eto ikɔt eyenɔ mfri esie, isɔŋ eyenyuŋ oŋwum ŋkpɔ esie, ndien mmɔ eyedu ke isɔŋ mmɔ ke ifure, eyenyuŋ efiɔk ete ke ami ndi Jehovah, ke ini ndibuŋde eto ɔkpɔnɔ mmɔ, nnyuŋ nsiode mmɔ ke ubɔk mmɔ emi enimde mmɔ ke ifin.

²⁸Ndien mmɔ ididige aba se mme idut ebumede, mme unam ikɔt idinyuŋ itaha aba mmɔ; ndien mmɔ eyeduŋ ke ifure, baba ŋkpɔ kiet idinyuŋ inamke mmɔ ndik.

²⁹Ndien nyenam se etɔde ɔkɔri ɔnɔ mmɔ ɔwɔrɔ etop, ndien mmɔ iditakke aba ke biɔŋ ke isɔŋ, idinyuŋ ibiomke aba esuene mme idut.

³⁰Ndien mmɔ eyefiɔk ete ke ami Jehovah Abasi mmɔ ndu ye mmɔ, mmɔ enyuŋ edi ikɔt mi, ufɔk Israel; uyo Ɔbɔŋ Jehovah edi emi.

³¹Ndien mbufo ufene mi, ufene emi mbɔkde, edi owo; ami nnyuŋ ndi Abasi mbufo. Uyo Ɔbɔŋ Jehovah edi emi.