Read efik EZEKIEL 35 Bible Online

EZEKIEL 35 - efik bible

EZEKIEL 35

¹NDIEN uyo Jehovah osim mi, ete, Eyen owo, wuk iso fo se obot Seir,

²nyuŋ tiŋ prophecy baŋa enye;

³nyuŋ dɔhɔ enye, ete, Ntem ke Ɔbɔŋ Jehovah ɔdɔhɔ, ete, Sese, mmɔŋ nnam ikɔ ye afo, obot Seir, nyenyuŋ nnyanare ubɔk mi ndori fi ke idem, nnyuŋ nnim fi ke nsobo ye ŋwure.

⁴Nyenam mme obio fo ekabare edi ndon, ndien afo eyedi nsobo; ndien afo eyefiɔk ete ke ami ndi Jehovah.

⁵Koro afo enyenede nsinsi udu, onyuŋ emende nditɔ Israel ɔnɔ ke ubɔk ofut ke ini ŋkpɔ anamde mmɔ, ke ini akpatre idiɔk ido.

⁶Mmɔdo Ɔbɔŋ Jehovah ɔdɔhɔde ete, Ma uwem mi, ŋkɔm nyetim fi nnim nnɔ iyip, ndien iyip eyebine fi: ŋkɔm afo asua iyip, ndien iyip eyebine fi.

⁷Nyenyuŋ nnam obot Seir edi ata idiɔk nsobo, nnyuŋ nsibe owo eke asaŋade ebe ye owo eke afiakde edi, mfep ke esit.

⁸Nyenyuŋ nda owo esie eke ekpaŋade afai, nyɔhɔ ke ikpɔ obot esie: ama edi ŋkpri obot fo, ye mme ebedeŋ fo, ye kpukpru itihere fo, mmɔ eke owo ewotde ke ofut eyeduɔŋɔ ke esit.

⁹Nyenam fi edi nsinsi nsobo, idinyuŋ iduŋke mme obio mbufo: ndien mbufo eyefiɔk ete ke ami ndi Jehovah.

¹⁰Koro afo ɔdɔhɔde ete, Mme idut iba emi, ye obio iba emi eyenyene mi, nnyin inyuŋ ida enye inyene; ndien Jehovah okodu ke esit:

¹¹mmɔdo Ɔbɔŋ Jehovah ɔdɔhɔde, ete, Ma uwem mi, nyenyuŋ nnam nte ekemde ke iyaresit fo, ye ke ufup fo emi afo okofibede ke usua fo emi afo asuade mmɔ; ndien nyeyak mmɔ efiɔk mi ke otu mmɔ, ke adaŋemi ndikpede ikpe ye afo.

¹²Ndien afo eyefiɔk ete ke ami Jehovah ŋkokop kpukpru isuŋi emi afo ɔkɔdɔhɔde abaŋa ikpɔ obot Israel, ete, Emebiara; eda mmɔ enɔ nnyin idia.

¹³Ntre ke mbufo ebre mbre enɔ mi ke inua mbufo, enyuŋ ewak nditiŋ ikɔ mbufo mbaŋa mi: ami mmokop.

¹⁴Ntem ke Ɔbɔŋ Jehovah ɔdɔhɔ, ete, Kpa nte emi ofuri isɔŋ (Edom) edatde esit, nyenam fi edi nsobo:

¹⁵kpa nte afo akadatde esit abaŋa udeme ufɔk Israel, koro esobode enye; kpasuk ntre ke ndinam nnɔ fi: obot Seir, afo eyena ke nsobo; kpa ofuri Edom, ofuri esie. Ndien mmɔ eyefiɔk ete ke ami ndi Jehovah.