Read efik EZEKIEL 36 Bible Online

EZEKIEL 36 - efik bible

EZEKIEL 36

¹NDIEN afo eyen owo tiŋ prophecy nɔ ikpɔ obot Israel, nyuŋ dɔhɔ ete, Ikpɔ obot Israel, mbufo ekop uyo Jehovah:

²Ntem ke Ɔbɔŋ Jehovah ɔdɔhɔ ete, Koro usua ɔdɔhɔde abaŋa mbufo, ete, Aha! nsinsi ŋkokoŋo ebiet emekabare ndien edi udeme nnyin:

³tiŋ ndien prophecy, nyuŋ dɔhɔ, Ntem ke Ɔbɔŋ Jehovah ɔdɔhɔ, ete, Koro, kpa koro mme mmɔ emi ekande ekuk ebiatde enyuŋ eŋwunede mbufo, ete mbufo edi se mme idut emi esuhɔde edade enyene; ndien mme ababara etoho mbufo ufiet, mbufo enyuŋ edi se kpukpru owo esuenede:

⁴ikpo obot Israel, mbufo ekop ndien uyo Ɔbɔŋ Jehovah, ete, Ntem ke Ɔbɔŋ Jehovah ɔdɔhɔ ye ikpɔ obot ye ŋkpri, ye mme udiɔŋ mmɔŋ, ye mme ebedeŋ, ye mme ikpikpu ndon, ye mme obio emi ekekpɔŋde, emi ekedide se mme idut emi esuhɔde ekan ekuk, ebumede enyuŋ esakde.

⁵Mmɔdo ntem ke Ɔbɔŋ Jehovah ɔdɔhɔ, ete, Nditreke ndida ikaŋ ufup mi ndɔhɔ ikɔ mbaŋa mme idut emi esuhɔde, nnyuŋ mbaŋa ofuri Edom, emi ekenimde isɔŋ mi enɔ idem mmɔ, ete ida enye inyene, ofuri esit adat mmɔ, ukpɔŋ mmɔ onyuŋ ese ke ndek, man mben isɔŋ esie edi ŋkpɔ mbume.

⁶Tiŋ ndien prophecy baŋa isɔŋ Israel, nyuŋ dɔhɔ ikpɔ ye ŋkpri obot, ye mme udiɔŋ mmɔŋ, ye mme ebedeŋ, ete, Ntem ke Ɔbɔŋ Jehovah ɔdɔhɔ, ete, Sese, ami mmada ufup mi ye ifuresit mi ndɔhɔ: koro mbufo ekebiomde esuene mme idut:

⁷mmɔdo ntem ke Ɔbɔŋ Jehovah ɔdɔhɔ ete; Ami mmen ubɔk mi, nte, Ama edi mme idut emi ekande mbufo ekuk, mmɔ eyebiom esuene mmɔ.

⁸Edi mbufo, ikpɔ obot Israel, eyesiaha ŋkɔk mbufo, enyuŋ eŋwum mfri mbufo enɔ ikɔt mi Israel: koro mmɔ esaŋade ekpere.

⁹Koro, sese, ami mmɔŋ ntiene mbufo, nnyuŋ ŋkabare nse mbufo, ndien eyefuŋ mbufo,

¹⁰enyuŋ etɔ mbufo ke isɔŋ: nyenyuŋ nnam owo ewak ke enyɔŋ mbufo, kpa ofuri ufɔk Israel kpukpru: owo eyenyuŋ eduŋ ke mme obio; enyuŋ ediɔŋ mme ŋwure:

¹¹nyenyuŋ nnam owo ye ufene ewak ke enyɔŋ mbufo; ndien mmɔ eyewak enyuŋ etɔt: nnyuŋ nyak mbufo edaŋ kpa nte ke eyo oko, nnyuŋ mfɔn ido ye mbufo ŋkan nte ŋkɔfɔnde ke eritɔŋɔ mbufo: ndien mbufo eyefiɔk ete ke ami ndi Jehovah.

¹²Nyenyuŋ nnam owo, kpa ikɔt mi Israel, esaŋa mbufo ke enyɔŋ; ndien mmɔ eyenyene fi, afo eye-nyuŋ edi udeme mmɔ, ndien afo uduyakke aba mmɔ enana owo.

¹³Ntem ke Ɔbɔŋ Jehovah ɔdɔhɔ, ete, Koro edɔhɔde mbufo, ete, Afo ekedi andidia owo,

¹⁴onyuŋ anam idut fo anana owo; mmɔdo, Ɔbɔŋ Jehovah ɔdɔhɔ, ete, Afo ududiaha aba owo, udunyuŋ unamke aba mbio fo eduɔŋɔ.

¹⁵Ndinyuŋ nyakke aba fi okop esuene mme idut, udunyuŋ ubiomke aba isuŋi mme obio; mbio fo idinyuŋ iduɔhɔ aba. Uyo Ɔbɔŋ Jehovah edi emi.

¹⁶Edikem uyo Jehovah osim mi, ete,

¹⁷Eyen owo, ufɔk Israel ekeduŋ ke isɔŋ mmɔ, enyuŋ esabare enye ke usuŋ mmɔ ye ke ido mmɔ: mmese usuŋ mmɔ ke ndek aŋwan emi odude ke esien.

¹⁸Ami nnyuŋ nduɔk mmɔ ifuresit mi ke idem mbaŋa iyip emi mmɔ ekeduɔkde ke isɔŋ; koro mmɔ enyuŋ edade ibɔk mmɔ esabare enye:

¹⁹ndien nsuan mmɔ ke otu mme idut, enyuŋ ewari mmɔ ke otu mme obio: ami nnam ikpe ye mmɔ nte ekemde ke usuŋ mmɔ.

²⁰Ndien adaŋemi mmɔ esimde mme idut emi mmɔ ekade do, mmɔ ebiat edisana enyiŋ mi, koro edɔhɔde ebaŋa mmɔ, ete, Mme mmɔ emi edi ikɔt Jehovah, enyuŋ eto ke isɔŋ esie edi.

²¹Ndien edisana enyiŋ mi emi ufɔk Israel esabarede ke otu mme idut emi mmɔ ekade do, enyene mi mbɔm.

²²Dɔhɔ ndien ufɔk Israel, ete, Ntem ke Ɔbɔŋ Jehovah ɔdɔhɔ, ete, Ami nnamke ntem mbaŋa mbufo, ufɔk Israel, edi mbaŋa edisana enyiŋ mi emi mbufo esabarede ke otu mme idut emi mbufo ekade do.

²³Ɔbɔŋ Jehovah onyuŋ ɔdɔhɔ ete, Ndien nyemen edisana enyiŋ mi emi esabarede ke otu mme idut, emi mbufo esabarede enye ke ufɔt mmɔ, nnim ke edisana; ndien mme idut eyefiɔk ete ke ami ndi Jehovah, ke ini enimde mi ke edisana ke otu mbufo ke enyin mbufo.

²⁴Nyenyuŋ mmen mbufo mfep ke mme idut, nnyuŋ ntaŋ mbufo ke kpukpru mme obio; ndien nda mbufo ndi ke isɔŋ mbufo

²⁵Ndien nyesime mbufo edisana mmɔŋ ke idem, ndien mbufo eyedi edisana: nyesio mbufo kpukpru ndek mbufo ye kpukpru ibɔk mbufo ke idem mfep nnam esana.

²⁶Nyenyuŋ nnɔ mbufo obufa esit, nnyuŋ nda obufa spirit nsin mbufo ke idem, nnyuŋ nsio mbufo esit enyene itiat ke obuk mfep, nnyuŋ nnɔ mbufo esit enyene obuk.

²⁷Nyenyuŋ nda spirit mi nsin mbufo ke idem, nnyuŋ nnam mbufo esaŋa ke mme ewuhɔ mi, enyuŋ ekpeme ikpe mi enyuŋ enam.

²⁸Ndien mbufo eyeduŋ ke isɔŋ emi ŋkɔnɔde mme ete mbufo, ndien mbufo eyedi ikɔt mi; ami nyenyuŋ ndi Abasi mbufo.

²⁹Ndien nyenyaŋa mbufo nsio kpukpru ndek mbufo mfep: nyenyuŋ ŋkot ibokpot edi, nnyuŋ nnam enye awak, ndinyuŋ ndorike mbufo akaŋ.

³⁰Nyenyuŋ nnam mfri eto ye mbuŋwum isɔŋ ewak: man mbufo ekukut aba but akaŋ ke otu mme idut.

³¹Ndien mbufo eyeti mme idiɔk usuŋ mbufo, ye ido mbufo eke midige nti, ndien esua idem mbufo ke iso idem mbufo ebaŋa mme idiɔk ido mbufo ye mbubiam mbufo.

³²Ɔbɔŋ Jehovah ɔdɔhɔ, ete, Mbufo efiɔk ete ke ami nnamke ntem mbaŋa mbufo: mbufo eda but ye esuene ebaŋa usuŋ mbufo, O ufɔk Israel.

³³Ntem ke Ɔbɔŋ Jehovah ɔdɔhɔ, ete, Ke usen eke ndisiode mbufo kpukpru mme idiɔk ido mbufo ke idem mfep nnam esana, nnyenyuŋ nnam mbufo eduŋ ke mme obio oro, ndien eyediɔŋ mme ŋwure.

³⁴Ndien eyefuŋ isɔŋ emi abiarade, emi enye akam anade ke nsobo ke enyin kpukpru owo eke esaŋade ebe.

³⁵Ndien mmɔ eyedɔhɔ, ete, Isɔŋ emi akabiarade akabare ebiet iŋwaŋ Eden; ndien mme obio ŋko emi ekesobode enyuŋ ebiarade, enyuŋ ewurede, emekabare enyene ibibene, owo enyuŋ eduŋ mmɔ.

³⁶Ndien mme idut emi esuhɔde ekan mbufo ekuk eyefiɔk ete ke ami Jehovah ndiɔŋ se ikewurede, ntɔ se ibiarade. Edi ami Jehovah ndɔhɔ, nnyuŋ nnam.

³⁷Ntem ke Ɔbɔŋ Jehovah ɔdɔhɔ ete, Eyesuk ebeŋe mi ŋkpɔ emi enɔ ufɔk Israel, ete nnam nnɔ mmɔ. Nyenam mmɔ ewak owo nte otu ufene.

³⁸Nte otu edisana ufene, kpa nte otu ufene Jerusalem ke mme usɔrɔ esie; kpasuk ntre ke mme obio emi ekewurede editie, otu owo eyeyɔhɔ ke esit, Ndien mmɔ eyefiɔk ete ke ami ndi Jehovah.