Read efik EZEKIEL 39 Bible Online

EZEKIEL 39 - efik bible

EZEKIEL 39

¹AFO eyen owo tiŋ, ndien, prophecy baŋa Gog, nyuŋ dɔhɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye afo Gog, ɔbɔŋ Rosh, Meshech, ye Tubal:

²ndien ami nyekabare fi, nnyuŋ nda fi usuŋ, nnyuŋ nnam fi oto ke ata esit edere, nnyuŋ nda fi nsim ikpɔ obot Israel:

³nyenyuŋ mmia fi utiga ke ubɔk ufien nduɔk, nnyuŋ nnam idaŋ fo eto fi ke nnasia eduɔŋɔ ke isɔŋ.

⁴Afo eyeduɔ ke ikpɔ obot Israel, kpa afo ye ofuri udim fo, ye mbon emi edude ye afo: nyeda fi nnɔ inuen kpukpru oruk mba, ye unam ikɔt, eta.

⁵Afo eyeduɔ ke iso isɔŋ; koro edi ami ndɔhɔ. Uyo Ɔbɔŋ Jehovah edi emi.

⁶Nyenyuŋ ŋkim ikaŋ ke Magog ye ke kpukpru mmɔ emi eduŋde ke mfre-idem ke mme isuo: ndien mmɔ eyefiɔk ete ke ami ndi Jehovah.

⁷Ndien nyenam mmɔ efiɔk edisana enyiŋ mi ke otu ikɔt mi Israel; ndinyuŋ nyakke aba (mmɔ) esabare edisana enyiŋ mi: ndien mme idut eyefiɔk ete ke ami Jehovah ndi edisana Abasi ke Israel.

⁸Ɔbɔŋ Jehovah ɔdɔhɔ ete, Sese, emedi, omonyuŋ odu, emi edi usen oro ŋkɔdɔhɔde.

⁹Ndien mme andiduŋ mme obio Israel eyewɔŋɔ eka ekefɔp, enyuŋ ekim ikaŋ ke ŋkpɔ-ekɔŋ, ye ke ikpɔ ye ŋkpri otu ekɔŋ, ye ke utiga, ye ke idaŋ, ye ke esaŋ ubɔk, ye ke mme eduat: ndien eyefɔp mmɔ ke ikaŋ ke ofuri isua itiaba:

¹⁰ndien mmɔ idibiomke eto ke ikɔt idi, inyuŋ isiakke isio ke mme akai; koro mmɔ eyeda ŋkpɔ-ekɔŋ ebara ikaŋ: enyuŋ ebume mmɔ emi ebumede mmɔ, enyuŋ ewo ŋwo ye mmɔ emi ewode mmɔ. Emi edi uyo Ɔbɔŋ Jehovah.

¹¹Ndien ama ekem ke mme usen oro nyeda ebiet ubuk owo do ke Israel nnɔ Gog, kpa ebedeŋ mmɔ eke esaŋade ebe ke edem inyaŋ emi utin asiahade: enye onyuŋ akpan mmɔ eke esaŋade ebe: ndien do ke mmɔ edibuk Gog ye ofuri otu owo esie; enyuŋ esio enye enyiŋ, Hamon-gog.

¹²Ndien ufɔk Israel eyeda ɔfiɔŋ itiaba ebuk mmɔ, man enam isɔŋ asana.

¹³Ndien kpukpru mbio idut emi eyebuk mmɔ ndien eyewɔrɔ mmɔ etop, kpa usen eke ami ndidade ubɔŋ: Ɔbɔŋ Jehovah ɔdɔhɔ.

¹⁴Ndien mmɔ eyebahare owo enim kpukpru ini, ete, esaŋa ke isɔŋ ebe, man ebuk mme asaŋa ke isɔŋ mbe, kpa mmɔ eke esuhɔde ke iso isɔŋ, man anam enye asana; ke utit ɔfiɔŋ itiaba mmɔ eduŋɔ.

¹⁵Ndien mmɔ eke esaŋade ebe esaŋa ke isɔŋ ebe, ndien ke ini owo okutde ɔkpɔ owo, enye ada eto owuk ɔkpɔ ke ŋkaŋ, tutu mbon ubuk owo emen enye ebuk ke Hamon-gog.

¹⁶Ndien ŋko-ŋko mmɔ esio obio oro enyiŋ Hamonah (akamba otu owo). Ntem ke mmɔ enam isɔŋ emi asana.

¹⁷Ndien afo eyen owo, ntem ke Ɔbɔŋ Jehovah ɔdɔhɔ ete, Dɔhɔ inuen kpukpru oruk mba, ye kpukpru mme unam ikɔt, ete, Mbufo esop idem enyuŋ edi; eto ke ŋkan-ŋkuk ebono ke ebiet uwa eke ami ŋwade nnɔ mbufo, kpa akamba uwa ke enyɔŋ ikpɔ obot Israel, ndien mbufo eyeta unam, enyuŋ eŋwɔŋ iyip.

¹⁸Mbufo eyeta unam mbon uko, enyuŋ eŋwɔŋ iyip mbon ererimbot, eke okukim, ye eke nditɔ-erɔŋ, ye eke okpo ebot, ye eke enaŋ, kpukpru mmɔ ekpon idem enyuŋ eto ke Bashan.

¹⁹Ndien mbufo eyeta ikpɔŋ unam eyuhɔ, enyuŋ eŋwɔŋ iyip ekpa, eke editode ke uwa mi emi ndiwade nnɔ mbufo.

²⁰Ndien mme horse, ye mbon horse, mbon uko, ye kpukpru mbon-ekɔŋ ke okpokoro mi eyeyuhɔ mbufo: Ɔbɔŋ Jehovah ɔdɔhɔ.

²¹Ndien nyenim ubɔŋ mi ke otu mme idut, ndien kpukpru mme idut eyekut ikpe mi emi ndinamde, ye ubɔk mi emi ndade ndori mmɔ ke idem.

²²Ndien ufɔk Israel eyefiɔk ete ke ami Jehovah ndi Abasi mmimɔ, ɔtɔŋɔde ke usen oro ye ke nsinsi.

²³Mme idut eyenyuŋ efiɔk ete ke eketaŋ ufɔk Israel efep ebaŋa mme idiɔk ido mmɔ, koro mmɔ ekeduede mi, ndien ami ndip mmɔ iso mi, nnyuŋ nda mmɔ nsin mme asua mmɔ ke ubɔk: ndien kpukpru mmɔ eduɔŋɔ ke ofut.

²⁴Ŋkanam mmɔ nte ekemde ke ndek mmɔ, ye ke mme idiɔk ido mmɔ, nnyuŋ ndip mmɔ iso mi.

²⁵Mmɔdo ntem ke Ɔbɔŋ Jehovah ɔdɔhɔ ete, Ke emi ke ndida nditɔ Jacob emi eketaŋde efep, mfiak ndi, nnyuŋ ntua ofuri ufɔk Israel mbɔm, nnyuŋ mfibe ufup mbaŋa edisana enyiŋ mi;

²⁶ndien mmɔ eyebiom but mmɔ ye ofuri mme ukwaŋ-ŋkpɔ mmɔ emi enamde ye ami, ke ini mmɔ eduŋde ke isɔŋ mmɔ ke ifure, ndien baba owo kiet eke anamde mmɔ edikhe ididuhe.

²⁷Ke ini ndade mmɔ ke mme idut nnyɔŋ ndi, nnyuŋ ntaŋde mmɔ mfep ke mme obio mme asua mmɔ mbon, enyuŋ enimde mi ke edisana ke otu mmɔ ke enyin ediwak mme idut;

²⁸Ndien mmɔ eyefiɔk ete ke ami ndi Jehovah Abasi mmɔ, koro ŋkayakde etaŋ mmɔ efep enɔ mme idut: ndien mmataŋ mbon ke isɔŋ mmɔ, nnyuŋ ŋkpɔŋke aba owo mmɔ ndomo kiet do.

²⁹Ndien ndidipke aba mmɔ iso mi: koro nduɔkde ufɔk Israel spirit mi ke idem. Uyo Ɔbɔŋ Jehovah edi emi.