Read efik EZEKIEL 47 Bible Online

EZEKIEL 47 - efik bible

EZEKIEL 47

¹NDIEN enye ɔtɔŋɔ ntak ada mi aka ke inua-otop ufɔk; ndien, sese, mmɔŋ oto ke idak asaŋudɔk ufɔk ese edem usiaha-utin: koro iso ufɔk esede edem usiaha-utin; mmɔŋ oro onyuŋ oto ke ŋkaŋ ufɔk nnasia ke edem usuk itie-uwa, ɔsuhɔre.

²Ndien enye ada mi ɔwɔrɔ ke usuŋ inua-otop edem edere, onyuŋ ada mi akanade edem-edem usuŋ okosim inua-otop ke esien emi esede edem usiaha-utin; ndien, sese, mmɔŋ oto ke ŋkaŋ nnasia ewet.

³Ndien ke adaŋemi owo oro ɔwɔrɔde ke edem usiaha-utin ye uruk ke ubɔk, enye odomo tɔsin ibio-idomo-okuk, ndien anam mi nsaŋa ke mmɔŋ ikpat ukot mbe.

⁴Ndien enye odomo tɔsin eŋwen, onyuŋ anam mi nsaŋa ke mmɔŋ mbe; mmɔŋ osim edɔŋ: ndien enye odomo tɔsin efen, onyuŋ anam mi nsaŋa mbe; mmɔŋ osim isin.

⁵Ndien enye odomo tɔsin eŋwen ŋko; akpa eke mme ŋkemeke ndisaŋa mbe: koro mmɔŋ oro ɔtuŋɔde, edi mmɔŋ ewɔk, akpa mmɔŋ eke owo mikemeke ndisaŋa mbe.

⁶Ndien enye ɔdɔhɔ mi, ete, Eyen owo, nte afo omokut? Ndien enye ada mi afiak okosim mben akpa oro.

⁷Ndien ke adaŋemi enye akadade mi afiak, sese, ata ediwak eto edu ke mben akpa ke edem mbiba.

⁸Ndien enye ɔdɔhɔ mi, ete, Mmɔŋ emi ɔwɔrɔ ke adaŋa edem usiaha-utin, onyuŋ ɔsuhɔre ke itihere Jordan, okosim ke inyaŋ. Enye ɔwɔrɔ ke inyaŋ, ndien mmɔŋ (inyaŋ) akabare ɔfɔn.

⁹Ndien ama ekem, kpukpru mme odu-uwem eke edinyɔkde ke ebiet ekededi eke akpa osimde do, eyedu uwem: iyak eyenyuŋ awak eti-eti, koro mmɔŋ emi osimde ko; koro mmɔŋ eyekabare ɔfɔn; ndien kpukpru oruk ŋkpɔ eke akpa mmɔŋ oro edisimde eyedu uwem.

¹⁰Ndien ama ekem, mme ɔkɔ-iyak eyeda ke mben esie, ɔtɔŋɔde ke En-gedi tutu osim ke En-eglaim: eyedi ebiet eke etatde iyire ekɔbi: iyak mmɔ edidi ke oruk ke oruk, ata ediwak eti-eti, nte iyak akwa inyaŋ.

¹¹Edi edep-edep ebiet esie ye mbat-mbat ebiet esie idikabakede ifɔn: eyeyak mmɔ enɔ inuŋ.

¹²Ndien kpukpru oruk eto udia eyekɔri ke mben akpa ke edem mbiba; ikɔŋ esie idikeŋeke, mfri esie idinyuŋ ikurede: eyeŋwum obufa ke ekem ɔfiɔŋ esie; koro mmɔŋ esie editode ke edisana ebiet. Ndien mfri esie eyedi udia, ikɔŋ esie eyenyuŋ edi ibɔk.

¹³Ntem ke Ɔbɔŋ Jehovah ɔdɔhɔ, ete, Emi edi adaŋa eke mbufo edidade edeme isɔŋ emi enɔ mme esien Israel duopeba. Yak Joseph ada ubak iba.

¹⁴Ndien mbufo edeme enye eda, kpukpru owo ukem-ukem, isɔŋ emi ŋkemenerede ubɔk mi, nte ke nyeda enye nnɔ mme ete mbufo; ndien isɔŋ emi eyeduɔ ɔnɔ mbufo ke udeme.

¹⁵Ndien emi edidi adaŋa isɔŋ: ke edem edere-edere, ɔtɔŋɔde ke akwa mmɔŋ aka usuŋ Hethlon, okosim ke Zedad;

¹⁶ye Hamath, ye Berothah, ye Sibraim, emi odude ke ufɔt adaŋa Damascus ye adaŋa Hamath; ye Hazer-hatticon, emi odude ke adaŋa Hauran.

¹⁷Ndien adaŋa emi ɔtɔŋɔde ke inyaŋ edidi Hazar-enon, ye adaŋa Damascus, ye edere ese edem edere, ye adaŋa Hamath. Ndien enye edidi adaŋa edem edere-edere.

¹⁸Ndien edem usiaha-utin eyena ke ufɔt Hauran ye Damascus, ye ke ufɔt Gilead ye isɔŋ Israel, ke mben Jordan, mbufo etɔŋɔ ke adaŋ edomo tutu osim inyaŋ edem usiaha-utin. Ndien emi edidi adaŋa edem emi utin asiahade.

¹⁹Ndien edem usuk ese usuk ɔtɔŋɔ ke Tamar aka ke mmɔŋ Meriboth-kadesh, oto aka ke akpa Egypt tutu osim ke akwa inyaŋ. Ndien emi edi adaŋa edem usuk ese usuk.

²⁰Ndien akwa inyaŋ edidi adaŋa edem usop-utin tutu osim ekem ye ɔtɔ emi owo odukde Hamath. Emi edi adaŋa edem usop-utin.

²¹Ntem ke mbufo edideme isɔŋ emi ke idem mbufo enɔ mme esien Israel.

²²Ndien ama ekem mbufo esin afia ebahare enye enɔ idem-mbufo ke udeme, ye isen owo eke eduŋde ke otu mbufo, eke ebonde nditɔ ke otu mbufo: mbufo ebat mmɔ nte mme amana ke otu nditɔ Israel: yak mmɔ eda udeme ke afia ye mbufo ke otu mme esien Israel.

²³Ndien ama ekem, ke esien eke esen owo oro oduŋde ke esit, do ke mbufo edinɔ enye udeme esie: uyo Ɔbɔŋ Jehovah edi emi.