Read efik EZEKIEL 6 Bible Online

EZEKIEL 6 - efik bible

EZEKIEL 6

¹EKEM uyo Jehovah osim mi, ete, Eyen owo, kabare iso fo se ikpɔ obot Israel,

²nyuŋ tiŋ prophecy baŋa mmɔ.

³Nyuŋ dɔhɔ ete, Mbufo ikpɔ obot Israel ekop uyo Ɔbɔŋ Jehovah, ete, Ntem ke Ɔbɔŋ Jehovah ɔdɔhɔ ikpɔ obot ye ŋkpri, ye mme idim mmɔŋ, ye mme itihere; ete, Sese, ami kpa ami, mmɔŋ nda ofut ntiene mbufo nnyuŋ nsobo ŋkokoŋo ebiet mbufo.

⁴Mme itie-uwa mbufo eyenyuŋ esobo, mbiet mbufo eyenyuŋ enuaha, nyenyuŋ mmen owo mbufo eke ekpaŋade afai nduɔk ke iso mme ibɔk mbufo.

⁵Nyenyuŋ nda mme okpo nditɔ Israel nnim ke iso mme ibɔk mmɔ: nnyuŋ nsuan mme ɔkpɔ mbufo ŋkan mme itie-uwa mbufo ŋkuk.

⁶Mme obio eyewure ke kpukpru ebiet iduŋ mbufo, ŋkokoŋo ebiet eyenyuŋ ebiara, man mme itie-uwa mbufo ekpesobo, enyuŋ edi ndon, mme ibɔk mbufo enyuŋ enuaha enyuŋ ekure, man mbiet ŋkpɔ mbufo esiaha, man enyuŋ esɔhi utom mbufo efep.

⁷Ndien mmɔ eke ekpaŋade afai eyeduɔŋɔ ke otu mbufo, ndien mbufo eyefiɔk ete ke ami ndi Jehovah.

⁸Ndien nyesuhɔ ndusuk; koro ndusuk eke ebɔhɔde ofut eyenyene mbufo ke otu mme idut, ke ini mbufo esuanade ke otu mme obio.

⁹Ndien mmɔ eke ebɔhɔde ke otu mbufo eyeti mi ke otu mme idut eke editaŋde mmɔ efep eka do: koro ami nyenuak mmɔ esit use, emi ɔwɔŋɔrede ɔkpɔŋ mi, nyenuak enyin mmɔ emi esede use ebine mme ibɔk mmɔ: ndien mmɔ eyese idem mmɔ ke ndek ebaŋa mme idiɔk ido emi mmɔ enamde ke kpukpru mbubiam mmɔ.

¹⁰Ndien mmɔ eyefiɔk ete ke ami ndi Jehovah, idige ke ikpikpu ke ndɔhɔ nte ke ndinam mmɔ idiɔk ŋkpɔ emi.

¹¹Ntem ke Ɔbɔŋ Jehovah ɔdɔhɔ ete, Da ubɔk fo tuak, nyuŋ digi ke ukot fo, nyuŋ dɔhɔ, ete, Ah, baŋa kpukpru mme idiɔk mbubiam ufɔk Israel, emi ediduɔŋɔde ke ofut ye ke biɔŋ, ye ke idiɔk udɔŋɔ;

¹²owo eke oyomde usuŋ eyekpa ke idiɔk udɔŋɔ; owo eke ekperede eyenyuŋ ɔduɔ ke ofut: ndien owo eke ɔsuhɔde, eke owo enyuŋ ekande enye ekuk, eyekpa biɔŋ: ntem ke ami ndima iyaresit mi ke idem mmɔ.

¹³Ndien mbufo eyefiɔk ete ke ami ndi Jehovah, ke adaŋemi owo mmɔ emi ekpaŋade enade ke ufɔt mme ibɔk mmɔ, ekan mme itie-uwa mmɔ ekuk, ke enyɔŋ kpukpru ŋkokoŋo obot, ke ibuot kpukpru ikpɔ obot, ye ke idak kpukpru awawa eto, ye ke idak kpukpru edibaŋ ofriyo, ebiet emi mmɔ ekefɔpde edinem incense do enɔ kpukpru mme ibɔk mmɔ.

¹⁴Ndien ami nyenyanare ubɔk mi ntuk mmɔ, nnyuŋ nnim isɔŋ ke nsobo, ye ke ndon ŋkan wilderness emi esede Diblah, ke kpukpru ebiet-iduŋ mmɔ; ndien mmɔ eyefiɔk ete ke ami ndi Jehovah.