Read efik EZEKIEL 7 Bible Online

EZEKIEL 7 - efik bible

EZEKIEL 7

¹EKEM uyo Jehovah osim mi, ete,

²Ndien afo ŋko eyen owo, ntem ke Ɔbɔŋ Jehovah ɔdɔhɔ isɔŋ Israel, ete,

³Utit, ata utit emedi ke edem isɔŋ mbinaŋ. Ke emi utit omosim fi, ndien nyedɔŋ iyaresit mi etiene fi, nnyuŋ ŋkpe ikpe ye afo, nte asaŋade ye ido fo; nnyuŋ mmen kpukpru mbubiam fo ndori fi ke idem.

⁴Ndien enyin mi idituaha fi mbɔm, ndinyuŋ nyakke koro mmende usuŋ fo ndori fi ke idem; mbubiam fo eyenyuŋ odu ke ufɔt fo: ndien mbufo eyefiɔk ete ke ami ndi Jehovah.

⁵Ntem ke ɔbɔŋ Jehovah ɔdɔhɔ, ete,

⁶Idiɔk-ŋkpɔ, idiɔk-ŋkpɔ kierakiet, sese, emedi, utit emedi, utit emedi; emedemere ebet fi, sese, emedi.

⁷Usenubɔk omosim fi, O andiduŋ isɔŋ: ini emedi; usen ndutime emekpere: ndien idige mkpo ikpɔ obot.

⁸Ke emi ndibigike, nyeŋwaŋa fi ifuresit mi ke idem, nnyuŋ mma fi iyaresit mi ke idem; nnyuŋ ŋkpe ikpe ye afo nte asaŋade ye usuŋ fo; nnyuŋ nda ofuri mbubiam fo ndori fi ke idem.

⁹Enyin mi idinyuŋ ituaha fi mbɔm, ndinyuŋ nyakke: nyenɔ fi nte ekemde ye usuŋ fo; ŋkpɔ mbubiam fo eye-nyuŋ edu ke ufɔt fo; ndien mbufo eyefiɔk ete ke edi ami Jehovah mmia.

¹⁰Se usen: sese, emedi: usiere ɔmɔwɔrɔ: eto emesehe: iseri amasiaha ikɔŋ.

¹¹Ŋkanubɔk ɔmɔkɔri edi eto idiɔk ŋkpɔ: baba owo mmɔ kiet iduhe, baba owo otu mmɔ kiet, baba inyene mmɔ, baba mkpo inyuŋ iduhe ke otu mmɔ.

¹²Ini emedi usen emekpere: owo eke edepde ididatke esit; owo eke anyamde idinyuŋ ituaha: koro ifuresit odorode ofuri otu owo esie.

¹³Koro owo eke anyamde ŋkpɔ midifiakke ibɔ se enyamde, okposuk edi nte mmɔ edude ke otu mme odu-uwem: koro ŋkukut abaŋade ofuri otu esie, owo idifiakke; baba owo kiet idinyuŋ isɔŋke itɔŋ uwem esie ke idiɔk ido esie.

¹⁴Mmɔ efuri ukorowo enyuŋ enam kpukpru ŋkpɔ ebeŋe; edi baba owo kiet ikaha ekɔŋ: koro ifuresit mi odorode ofuri otu mmɔ ke idem.

¹⁵Ofut odu ke esien, udɔŋɔ ye biɔŋ enyuŋ edu ke esit ufɔk: owo eke odude ke iŋwaŋ eyekpa ke ofut; biɔŋ ye idiɔk udɔŋɔ eyenyuŋ eta mmɔ eke edude ke obio.

¹⁶Ndien mbon itɔk mmɔ eyebɔhɔ; enyuŋ edu ke ikpɔ obot ebiet mme ibiom itihere; kpukpru mmɔ eseme, owo kiet kiet ke idiɔk ido mmɔ.

¹⁷Kpukpru ubɔk eyemem, kpukpru edɔŋ eyesaŋa nte mmɔŋ.

¹⁸Mmɔ eyebɔbɔ ɔfɔŋ idet ke idem; ndik eyenyuŋ ofuk mmɔ ke idem; but eyenyuŋ ofuk mmɔ kpukpru iso: ibɔ eyenyuŋ odu mmɔ kpukpru ke ibuot.

¹⁹Mmɔ eyemen silver mmɔ eduɔk ke esien; gold mmɔ eyenyuŋ akabare edi ndek: silver mmɔ ye gold mmɔ idikemeke ndinyaŋa mmɔ ke usen ifuresit Jehovah: mmɔ idiyuhɔke ukpɔŋ mmɔ, ŋkpɔ idinyuŋ iyɔhɔke mmɔ ke idibi: koro enye edide ŋkpɔ iduɔ idiɔk ido mmɔ.

²⁰Enye onyuŋ onim ediye mbana esie ke iseri: mmɔ enyuŋ enam mbiet mbubiam ŋkpɔ mmɔ, ye ŋkpɔ ndek mmɔ ke esit: oro esin ami nnim enye ke ndek nnɔ mmɔ.

²¹Mmonyuŋ nda enye nsin ke ubɔk esen owo ke mbume; ke ubɔk mme idiɔk owo ererimbot ke ŋkpɔ ŋwo; ndien mmɔ eyesabare enye.

²²Nyenyuŋ ŋkabare iso mi ŋkpɔŋ mmɔ: ndien mmɔ eyesabare ndibe ebiet mi: mbon afai eyenyuŋ eduk ke esit, enyuŋ esabare enye.

²³Nam ŋkpɔkɔbi: koro ikpe obom ɔyɔhɔde ke isɔŋ, afai onyuŋ ɔyɔhɔ ke obio.

²⁴Ndien nyeda ata mme idiɔk idut ndi: ndien mmɔ eyeda ufɔk mbufo enyene: nyenyuŋ ndop mkpɔsɔŋ owo iseri; ndien eyesabare ndisana ebiet mmɔ.

²⁵Nsobo emedi; ndien mmɔ eyeyom emem, edi iduhe.

²⁶Idiɔk eyetiene idiɔk; etop eyenyuŋ ɔkɔrɔ ke etop; ndien mmɔ eyeyom ŋkukut prophet: ewuhɔ oku eyenyuŋ atak, ye item mbio-owo.

²⁷Edidem eyetua, ɔbɔŋ eyeda mkpa-idem esine, ubɔk eyenyuŋ etimere mbio-obio: nyenam mmɔ nte ekemde ye usuŋ mmɔ, nnyuŋ nda ikpe mmɔ ŋkpe ye mmɔ: ndien mmɔ eyefiɔk ete ke ami ndi Jehovah.