Read efik DANIEL 2 Bible Online

DANIEL 2 - efik bible

DANIEL 2

¹EKEM ke udiana-akpa isua ubɔŋ Nebuchadnezzar, Nebuchadnezzar adaba ndap, ndien esit etimere enye, idap esie onyuŋ atiam enye.

²Ndien edidem ɔnɔ uyo, ete ekot mbon-ŋwed ye mbia-idiɔŋ, ye mbia-mfa, ye mme Chaldean edi edisian edidem ndap esie. Ndien mmɔ edi edida ke iso edidem.

³Ndien edidem ɔdɔhɔ mmɔ, ete, Mmadaba ndap, ndien esit etimere mi oyom ndifiɔk ndap oro.

⁴Ndien mme Chaldean edɔhɔ edidem ke usem Syria, ete, O edidem, itɔŋ uwem akpakam ɔsɔŋ fi ke nsinsi: tiŋ ndap oro nɔ nnyin ikɔt fo, ndien nnyin iyesiak nte enye asaŋade.

⁵Edidem ɔbɔrɔ onyuŋ ɔdɔhɔ mme Chaldean, ete, Ŋkpɔ emi amadaha ɔkpɔŋ mi: mbufo miyarakede ndap oro inɔ mi, minyuŋ isiakke enye, eyekpok mbufo mbak-mbak, enyuŋ enim mme ufɔk mbufo ke ekwe.

⁶Edi mbufo ema ewut ndap oro, enyuŋ esiak enye, mbufo eyebɔ mi enɔ, ye utip, ye akwa ukpono eke otode mi: mbufo etiŋ ndien ndap, enyuŋ esiak enye.

⁷Mmɔ etɔŋɔ ntak ebɔrɔ enyuŋ edɔhɔ ete, Yak edidem akam etiŋ ndap emi ɔnɔ nnyin ikɔt esie, ndien nnyin iyesiak enye.

⁸Edidem ɔbɔrɔ onyuŋ ɔdɔhɔ, ete, Mmɔfiɔk kakpan nte ke mbufo eyom ndida ini: koro mbufo ekutde ete ke ŋkpɔ emi emebe ɔkpɔŋ mi.

⁹Edi edieke mbufo miyarakede ndap oro, uduak mbufo edi kiet, mbufo enyuŋ etibi nsu-nsu ye idiɔk ikɔ eke ekpetiŋde ke iso mi, tutu ini ɔkpuhɔre: mbufo etiŋ ndien ndap oro enɔ mi, man mfiɔk nte mbufo eyekeme ndisiak enye nnɔ mi.

¹⁰Mme Chaldean ebɔrɔ ke iso edidem enyuŋ edɔhɔ, ete, Baba owo eke ekemede ndisiak ŋkpɔ edidem kiet iduhe ke ererimbot: mmɔdo baba akamba ye ɔkpɔsɔŋ edidem kiet akanam ibupke baba owo ŋwed ye abia-idiɔŋ ye Chaldean kiet utɔ ikɔ emi.

¹¹Ndien ikɔ emi edidem obupde ɔsɔŋ, owo eŋwen baba kiet eke ekemede ndisiak enye nnɔ edidem inyuŋ iduhe, ke mibɔhɔke mme abasi emi iduŋ mmɔ miduhe ye obukidem.

¹²Oro esin edidem ayat esit onyuŋ ofut esit eti-eti; enye onyuŋ ɔnɔ uyo, ete esobo kpukpru mme ɔfiɔk ŋkpɔ owo Babylon.

¹³Ndien etaŋa ewuhɔ, ete ewot mme ɔfiɔkŋkpɔ owo oro: ndien mmɔ eyom Daniel ye mme nsaŋa esie, ete iwot mmɔ.

¹⁴Ndien Daniel ada ikike ye ɔniɔŋ ɔdɔhɔ Arioch etubom mbon uwot owo oro edidem enyenede, emi ɔkɔwɔrɔde aka ndiwot mme ɔfiɔk ŋkpɔ owo Babylon:

¹⁵enye ɔbɔrɔ onyuŋ ɔdɔhɔ Arioch adidaha owo edidem, ete, Nsinam ewuhɔ emi otode ke iso edidem ɔsɔpde ntem? Ndien Arioch asian ŋkpɔ oro ɔnɔ Daniel.

¹⁶Ndien Daniel oduk ekebeŋe edidem, ete ɔnɔ imɔ ifet, ndien imɔ iyesiak nte enye (ndap) asaŋade inɔ edidem.

¹⁷Ndien Daniel aka ke ufɔk esie eketiŋ ikɔ oro ɔnɔ Hananiah ye Mishael ye Azariah, mme nsaŋa esie: ete,

¹⁸Yak mmɔ ebeŋe Abasi enyɔŋ mbɔm ebaŋa ndibe ŋkpɔ emi, man ekusobo Daniel ye mme nsaŋa esie ke otu mme ɔfiɔk ŋkpɔ owo Babylon efen.

¹⁹Ndien eyarade ndibe ŋkpɔ emi enɔ Daniel ke ndap ke okoneyo.

²⁰Ndien Daniel ɔkɔm Abasi enyɔŋ. Daniel ɔbɔrɔ ete, Yak ekɔm enyiŋ Abasi ke nsinsi nsinsi: koro ifiɔk ye odudu enyenede enye:

²¹enye onyuŋ ɔkpuhɔre ini ye mme isua, ke emen ndidem efep, onyuŋ onim ndidem ke itie: ke ɔnɔ mbon-ɔniɔŋ eti ibuot, onyuŋ ɔnɔ mme asian ifiɔk.

²²Enye ayarare ndituŋɔ ye ndibe-ndibe ŋkpɔ, ke ɔfiɔk se idude ke ekim, uŋwana onyuŋ oduŋ ye enye.

²³O Abasi mme ete mi, ami mmotoro mmonyuŋ ŋkɔm fi, emi ɔnɔde mi ifiɔk ye odudu, ndien ke emi ke afo asian mi se nnyin ibeŋede fi; koro afo amasian ikɔ edidem ɔnɔ nnyin.

²⁴Oto oro Daniel oduk ke ɔtɔ Arioch, koro edidem okowukde enye, ete enye osobo mme ɔfiɔk-ŋkpɔ owo Babylon: Daniel aka ɔkɔdɔhɔ enye ntem, ete, Kusobo mme ɔfiɔkŋkpɔ owo Babylon: da mi duk ke iso edidem, ndien nyeyarare nte ndap asaŋade nnɔ edidem.

²⁵Ndien Arioch awara ada Daniel oduk ke iso edidem, onyuŋ ɔdɔhɔ enye ntem, ete, Mmokut owo kiet ke otu nditɔ Judah emi eketaŋde edi ken, eke ekemede ndisian edidem nte ndap oro asaŋade.

²⁶Edidem ɔbɔrɔ onyuŋ ɔdɔhɔ Daniel emi enyiŋ esie ekerede Belteshazzar, ete, Nte afo emekeme ndisian mi ndap oro ŋkokutde, ndinyuŋ nsiak nte enye asaŋade?

²⁷Ndien Daniel ɔbɔrɔ ke iso edidem, onyuŋ ɔdɔhɔ, ete, Mme ɔfiɔk ŋkpɔ owo ye mbia-idiɔŋ, ye mbon-ŋwed, ye mbia-mfa ikemeke ndiyarare ndibe ŋkpɔ emi edidem obupde;

²⁸edi Abasi emi ayararede ndibe ŋkpɔ odu ke enyɔŋ, ndien edi enye asian edidem Nebuchadnezzar se ididide ke ukperedem usen. Ndap fo ye ŋkukut ibuot fo ke bed fo ekedi mme mmɔ emi;

²⁹ama edi afo, O edidem, ekikere fo ɔkɔdɔk ke bed fo, ete, Nsidi ŋkpɔ eke edidide ke ini iso: ndien enye emi ayararede ndibe-ndibe ŋkpɔ asian fi se ididide.

³⁰Ndien ama edi ami, idige ɔniɔŋ eke odude mi ke idem akan kpukpru mme odu-uwem, esin eyarare ndibe ŋkpɔ emi enɔ mi, edi man esian edidem nte asaŋade, man afo onyuŋ ɔfiɔk ekikere esit fo.

³¹Afo, O edidem, okokut, ndien, sese, akwa mbiet owo kiet. Mbiet emi okpon, uyama esie onyuŋ akaha; enye akada fi ke iso, ndien idem esie enyene ndik.

³²Ibuot mbiet oro edi eti gold, ikpanesit esie ye ubɔk esie edi silver; idibi esie ye ifuhi esie enyuŋ edi okpoho;

³³idibi ukot esie edi ukwak, ikpat ukot esie edi ubak ukwak ye ubak mbat-eso.

³⁴Ndien afo okut tutu esiak itiat esio, midige ke ubɔk owo, ndien enye oyibi mbiet oro ke ukot ukwak ye mbat-eso, onyuŋ anuak mmɔ mbak-mbak.

³⁵Ndien ukwak oro, ye mbat-eso, ye okpoho, ye silver, ye gold enuaha mbak-mbak, enyuŋ ekabare ebiet mbio emi otode ke ɔtɔ ubek-ibokpot ke nda-eyo, ndien ofum ɔkpɔri mmɔ efep, ndien ikwe aba ebiet eke mmɔ edude. Ndien itiat oro akanuakde mbiet akabare edi akamba obot, onyuŋ ɔyɔhɔ ke ofuri isɔŋ.

³⁶Emi edi ndap oro: ndien nnyin iyesian edidem nte enye asaŋade.

³⁷Afo, O edidem, edi edidem ndidem: koro Abasi enyɔŋ ɔmɔnɔ fi ubɔŋ, ye odudu, ye nsɔŋidem, ye ukpono.

³⁸Ndien ke kpukpru ebiet emi nditɔ owo eduŋde, ye mme unam ikɔt ye inuen enyɔŋ, enye amada mmɔ esin fi ke ubɔk, onyuŋ onim fi ke ɔbɔŋ mmɔ kpukpru. Afo edi ibuot o-gold oro.

³⁹Ndien ɔbɔŋ eŋwen eke mikponke nte afo, eyetiene fi adaha ada, ye ɔyɔhɔ ubɔŋ ita efen, eke okpoho, emi edikarade ofuri ererimbot.

⁴⁰Ndien ɔyɔhɔ ubɔŋ inaŋ eyedu, eke ɔsɔŋɔde nte ukwak: koro ukwak obomde kpukpru ŋkpɔ, onyuŋ anuakde mmɔ emem: ndien kpa nte ukwak anuakde kpukpru ŋkpɔ emi, enye eyebom onyuŋ anuak.

⁴¹Ndien emi afo okokutde ikpat-ukot ye nnuen-ukot, ubak mbat obot-eso, ye ubak ukwak, eyebahare ubɔŋ oro: ndien odudu ukwak eyedu ke esit: koro afo okokutde ukwak abuahade ye mbat-eso.

⁴²Ndien nte emi nnuenukot edide ubak ukwak ye ubak mbat-eso, (kpa ntre) ke ubɔŋ oro eyesɔŋɔ ke edem kiet, onyuŋ ɔbuŋɔ ke edem eken.

⁴³Ndien koro afo okokutde ukwak abuahade ye mbat-eso, mmɔ eyebuaha ye ubon owo, edi kiet ididianake ye eken, kpa nte ukwak mibuahake ye mbat-eso.

⁴⁴Ndien ke eyo ndidem oro, Abasi enyɔŋ eyenam ubɔŋ eke midisoboke ke nsinsi, adaha ada: ndien idikpɔŋke ubɔŋ emi inɔ mbio efen: enye eyenuak onyuŋ ama kpukpru mme idut emi, ndien enye eyeda ke nsinsi:

⁴⁵koro afo okokutde ete ke esiak itiat ke akamba obot esio, edi idige ubɔk owo anam, ndien enye anuak ukwak, ye okpoho, ye mbat-eso, ye silver, ye gold, Akwa Abasi asian edidem se ididide ke ini iso: ndien ndap oro enyene iwuk, idinyuŋ itreke ndiwɔrɔ ntem.

⁴⁶Ndien edidem Nebuchadnezzar ɔduɔ ke isɔŋ okubi iso esie, onyuŋ atuak ibuot ɔnɔ Daniel, onyuŋ ɔnɔ uyo, ete eda enɔ ye incense esɔk enye.

⁴⁷Edidem ɔbɔrɔ Daniel onyuŋ ɔdɔhɔ, ete, Ke akpanikɔ Abasi mbufo edi Abasi mme abasi ye Ɔbɔŋ ndidem: edi enye ayarare ndibe-ndibe ŋkpɔ, koro afo ekemede ndiyarare ndibe ŋkpɔ emi.

⁴⁸Ndien edidem ofori Daniel, onyuŋ ɔnɔ enye ediwak ikpɔ enɔ, onyuŋ onim enye ke etubom ofuri esien Babylon, ye etubom kpukpru mme ɔfiɔk ŋkpɔ owo Babylon.

⁴⁹Ndien Daniel ekpe edidem ubɔk, ndien enye onim Shadrach ye Meshach ye Abednego, ete esaŋa ŋkpɔ esien Babylon. Ndien Daniel etie ke inua-otop edidem.