Read efik DANIEL 4 Bible Online

DANIEL 4 - efik bible

DANIEL 4

¹NEBUCHADNEZZAR edidem ɔkɔm kpukpru mme idut ye obio, ye usem, emi eduŋde ke ofuri ererimbot, ete, Yak emem mbufo okpon.

²Etie mi nte ɔfɔn ndibuk mme utibe ŋkpɔ ye ŋkpɔ ndyɔ emi Abasi Ibom akanamde ye ami.

³Mme utibe ŋkpɔ esie ewak didie! ŋkpɔ ndyɔ esie enyuŋ esɔŋɔ didie! ubɔŋ esie edi nsinsi ubɔŋ; enye onyuŋ akara ke ofuri emana.

⁴Ami Nebuchadnezzar ŋkodu ke ufɔk mi, nnyuŋ mforo ke akwa ufɔk mi:

⁵ŋkut ndap, ndien enye esin mi ndikhe; ekikere ke bed mi ye ŋkukut ibuot mi enyuŋ enam mi ndik.

⁶Ndien ami ŋwuk ewuhɔ, nte eda kpukpru mme ɔfiɔk ŋkpɔ owo Babylon edi ke iso mi man mmɔ esian mi nte ndap oro ediwɔrɔde.

⁷Ndien mbon-ŋwed, ye mbia-idiɔŋ, ye mme Chaldean, ye mbia-mfa eduk edi: ndien ami ntiŋ ndap oro ke iso mmɔ: edi mmɔ isianke mi nte ediwɔrɔde.

⁸Edikem ke ukpere edem, Daniel, emi enyiŋ esie ekerede Belteshazzar, nte enyiŋ abasi mi asaŋade, emi spirit edisana Abasi onyuŋ odude enye ke idem, oduk edi ke iso mi; ndien ntiŋ ndap oro ke iso esie, nte,

⁹O Belteshazzar, etubom mbon-ŋwed, emi ami mfiɔkde nte ke spirit edisana Abasi odu fi ke idem, baba ndibe ŋkpɔ kiet inyuŋ iyaŋake fi, dɔhɔ mi ŋkukut ndap mi emi ŋkokutde, ye nte enye ediwɔrɔde.

¹⁰Ŋkukut ibuot mi ke bed mi etie ntem: ami ŋkut, ndien, sese, eto kiet odu ke ufɔt isɔŋ, ndien idaha esie okoŋ.

¹¹Eto oro ɔkɔri onyuŋ ɔsɔŋɔ, idaha esie onyuŋ osim ke enyɔŋ, ndise esie onyuŋ osim utit ofuri ererimbot: ikɔŋ esie eye,

¹²mfri esie onyuŋ awak: udia kpukpru onyuŋ odu ke esit: mme unam ikɔt eduk ke mfut esie, mme inuen enyɔŋ enyuŋ eduŋ ke ŋkɔk esie, kpukpru obukidem onyuŋ adia ŋkpɔ ke esit.

¹³Ami ŋkut ke ŋkukut ibuot mi ke bed mi, ndien, sese, andikpeme kiet emi edide edisana oto ke enyɔŋ ɔshuɔre;

¹⁴enye ofiori ɔkpɔsɔŋ, onyuŋ ɔdɔhɔ ntem, ete, Mbufo ekpi eto emi, enyuŋ ekpok ŋkɔk esie, ekeŋ ikɔŋ esie, enyuŋ eduɔŋɔ mfri esie: yak mme unam edaŋa ekpɔŋ mfut esie, yak mme inuen enyuŋ ekpɔŋ ŋkɔk esie:

¹⁵edi mbufo esuhɔ etak oruŋ esie ke isɔŋ, kpa ke ubɔp-ŋkpɔ ukwak ye eke okpoho, ke nsek mbiet iŋwaŋ: yak mbara enyɔŋ onyuŋ ebit enye, yak udeme esie onyuŋ odu ye mme unam ke mbiet iŋwaŋ:

¹⁶yak ekpuhɔre enye esit, okudi aba eke owo, ndien yak enɔ enye esit unam; yak isua itiaba enyuŋ ebe enye.

¹⁷Ŋkpɔ emi oto ke ewuhɔ mme andikpeme, ikɔ emi onyuŋ oto ke uyo me edisana (angel); man mmɔ eke edude uwem efiɔk ete ke Ata Edikoŋ edi etubom ke ubɔŋ ererimbot, onyuŋ ada enye ɔnɔ owo eke enye amade, onyuŋ emen ata ŋkpri owo odori, ete edi etubom ke esit.

¹⁸Ami edidem Nebuchadnezzar ŋkokut ndap emi. Afo, O Belteshazzar, siak ndien nte ediwɔrɔde: koro baba ɔfiɔk ŋkpɔ owo kiet eke ekemede ndisian mi nte enye ediwɔrɔde, iduhe ke obio mi: edi afo emekeme; koro spirit edisana Abasi odude fi ke idem.

¹⁹Ndien idem akpa Daniel emi ekerede Belteshazzar idaha kiet, ekikere enyuŋ etimere enye. Edidem ɔbɔrɔ onyuŋ ɔdɔhɔ, ete, Belteshazzar, kuyak ndap emi ye se enye ediwɔrɔde akpa fi idem. Belteshazzar ɔbɔrɔ, ete, Ɔbɔŋ mi, yak ndap emi enyene mmɔ eke esuade fi, yak ŋkpɔ emi enye ediwɔrɔde onyuŋ osim mbon-utɔk fo.

²⁰Eto emi afo okokutde, emi okponde onyuŋ ɔsɔŋde, emi idaha esie osimde ikpa-enyɔŋ, ndise esie onyuŋ osimde utit ofuri ererimbot:

²¹emi ikɔŋ esie onyuŋ eyede, mfri esie onyuŋ awakde, ndien udia kpukpru ŋkpɔ odude enye ke idem, emi mme unam ikɔt edaŋde ke mfut esie, mme inuen enyɔŋ enyuŋ enamde efɔk ke ŋkɔk esie: edi afo,

²²O edidem, edi enye emi oforode onyuŋ ɔsɔŋɔde, uforo fo onyuŋ ɔdɔdiɔŋ aka iso tutu osim ikpaenyɔŋ, ubɔŋ fo onyuŋ osim utit ererimbot.

²³Ndien emi edidem okokutde edisana andikpeme kiet oto ke enyɔŋ ɔsuhɔre, onyuŋ ɔdɔhɔ, ete, Mbufo ekpeŋe eto emi, enyuŋ ebiat enye; edi ekpɔŋ etak oruŋ esie ke isɔŋ, kpa ke ubɔp-ŋkpɔ ukwak ye okpoho, ke edisehe mbiet iŋwaŋ, yak mbara enyɔŋ ebit enye, yak udeme esie onyuŋ odu ye mme unam ikɔt, tutu isua itiaba ebe enye:

²⁴ntem ke enye ediwɔrɔ. O edidem, enye onyuŋ edi uduak Ata Edikoŋ Abasi emi osimde ɔbɔŋ mi edidem:

²⁵ndien mmɔ eyebin fi ke otu owo efep, iduŋ fo eyenyuŋ odu ye mme unam ikɔt, eyenyuŋ ebɔk fi ke mbiet nte enaŋ; enyuŋ eda mbara enyɔŋ ebit fi; isua itiaba eyenyuŋ ebe fi, tutu afo ɔfiɔk ete ke Ata Edikoŋ akara ke ubɔŋ ererimbot, onyuŋ ada enye ɔnɔ owo ekededi eke enye amade.

²⁶Ndien emi mmɔ ekedɔhɔde, ete ekpɔŋ etak oruŋ eto oro, ubɔŋ fo eyena ɔnɔ fi, adaŋemi afo edifiɔkde ete ke heaven ada ubɔŋ.

²⁷Yak item mi, ndien, O edidem, ɔfɔn ke iso fo; da eti ido kibi mme idiɔk ido fo fep, kibi mme ukwaŋ-ŋkpɔ fo fep ke eritua mme ubuene mbɔm; mme oro eyenam ifure fo ebigi.

²⁸Ofuri ŋkpɔ emi edisim Nebuchadnezzar edidem.

²⁹Ke utit ɔfiɔŋ duopeba enye asaŋa ke enyɔŋ akwa ufɔk ubɔŋ esie emi odude ke Babylon.

³⁰Edikem ɔbɔrɔ onyuŋ ɔdɔhɔ, ete, Nte idige emi edi akamba Babylon emi ndade akwa odudu mi mbɔp nnim ke ufɔk ubɔŋ mi, ye ke eke uyai ubɔŋ mi?

³¹Adaŋemi uyo emi osuk ododu edidem ke inua, uyo oto ke enyɔŋ ɔduɔ, ete, O edidem Nebuchadnezzar, ke edɔhɔ fi, ete,

³²Ubɔŋ amadaha ɔkpɔŋ fi; ndien mmɔ eyebin fi ke otu owo efep, iduŋ fo eyenyuŋ odu ye mme unam ikɔt; eyebɔk fi ke mbiet nte enaŋ; ndien isua itiaba eyebe fi, tutu afo edifiɔk ete ke Ata Edikoŋ akara ke ubɔŋ ererimbot, onyuŋ ada enye ɔnɔ owo ekededi eke enye amade.

³³Ke ndo-ndo oro ikɔ oro osu ye Nebuchadnezzar, ndien ebin enye ke ɔtɔ owo efep, enye onyuŋ ata mbiet nte enaŋ, mbara enyɔŋ onyuŋ ebit enye idem: tutu idet esie ɔkɔri nte eke ntrukpom, mbara esie enyuŋ ekɔri nte eke inuen.

³⁴Ekem ke utit ini oro, ami Nebuchadnezzar mmenere enyin mi nse enyɔŋ, ndien ibuot mi ɔtɔŋ ntak ɔfɔn; ndien ami ŋkɔm Ata Edikoŋ, nnyuŋ ntoro, nnyuŋ ŋkpono enye emi odude uwem ke nsinsi, emi akarade ke nsinsi, emi ubɔŋ esie onyuŋ ebigide ke ofuri emana:

³⁵ndien ebat kpukpru mme andiduŋ isɔŋ ke ikpikpu: enye onyuŋ anam kpa nte enye amade ke otu mme udim enyɔŋ ye ke otu mme andiduŋ isɔŋ: ndien baba owo kiet eke edituakde enye ubɔk, onyuŋ ɔdɔhɔde enye, ete, Afo amanam nso? iduhe.

³⁶Ke ndo-ndo oro ibuot mi akabare ɔfɔn; ndien ukpono ubɔŋ mi esin uyai mi ye uyama mi efiak etiene mi: mmɔ eke enɔde mi item enyuŋ ebine mi: ami nnyuŋ nsɔŋɔ nda ke ubɔŋ mi; akwa ukpono mi onyuŋ adiana ɔnɔ mi.

³⁷Ke emi ami Nebuchadnezzar ŋkɔm nnyuŋ ntoro nnyuŋ ŋkpono Edidem enyɔŋ, emi kpukpru se enye anamde edide akpanikɔ; mme usuŋ esie enyuŋ edi ikpe: ndien enye emekeme ndisuhɔre mmɔ eke esaŋade ke iseri.