Read efik DANIEL 7 Bible Online

DANIEL 7 - efik bible

DANIEL 7

¹KE akpa isua Belshazzar edidem Babylon, Daniel okut ndap kiet ye ŋkukut ibuot esie ke bed esie. Ndien enye ewet ndap oro, onyuŋ obuk ofuri ikɔ oro.

²Daniel ɔbɔrɔ onyuŋ ɔdɔhɔ, ete, Ŋkut ke ŋkukut mi ke okoneyo, ndien, sese, mme ofum ikpaenyɔŋ mbinaŋ ebumere ewɔrɔ ke akwa inyaŋ.

³Ndien unam inaŋ eto ke inyaŋ edɔk, kiet etie isio ye kiet.

⁴Akpa ebiet lion, onyuŋ enyene mba ntrukpom. Ŋkut tutu edibere enye mba, enyuŋ emenere enye ekpɔŋ isɔŋ, enyuŋ emenere enye ewuk ke ukot esie nte owo, enyuŋ enɔ enye esit owo.

⁵Ndien, sese, utɔŋɔ ntak unam eŋwen ebiet bear; enye onyuŋ emenere idem esie edem kiet; ɔkpɔ ŋkaŋ ita enyuŋ edu enye ke inua ke ufɔt edet esie: ndien ntem ke mmɔ edɔhɔ enye, ete, Daha ke enyɔŋ ta ediwak unam.

⁶Ke emi ama ekebe, ŋkut, ndien, sese, unam efen ebiet ekpe; enye onyuŋ enyene mba inaŋ ke edem esie: unam oro onyuŋ enyene mbuot inaŋ; ndien enɔ enye ubɔŋ.

⁷Ke emi ama ekebe, ami ŋkut ke ŋkukut okoneyo, ndien, sese, ɔyɔhɔ unam inaŋ enyene ndik ye odudu ye nsɔŋidem eti-eti; onyuŋ enyene ikpɔ edet ukwak; enye ata onyuŋ anuak mbai-mbai, onyuŋ ada ukot esie edigi se isuhɔde: enye onyuŋ edi isio ye kpukpru unam oro ekebemde enye iso; enye onyuŋ enyene nduk duop.

⁸Ntie nse nduk oro, ndien, sese, ekpri nduk eŋwen otibe ke otu mmɔ oro: ndien enye odibere ita ke nduk oro ekebemde enye iso; ndien, sese, enyin eke ebietde enyin owo odu ke nduk emi, ye inua ŋko eke etiŋde ikpɔ ŋkpɔ.

⁹Ŋkut tutu ebekpo ediɔhɔ, andisɔŋɔ usen onyuŋ etie, edisine-ŋkpɔ esie edi afia nte snow, idet ibuot esie onyuŋ ebiet edisana idet erɔŋ: ebekpo esie ebiet edemikaŋ, mme wheel esie edi ikaŋ eke asakde.

¹⁰Ikaŋ oto enye ke iso ewet nte akpa mmɔŋ: tɔsin tɔsin ke itie tɔsin enam ŋkpɔ enɔ enye; tɔsin duop ke itie tɔsin duop enyuŋ eda enye ke iso: enim ikpe, enyuŋ ekubɔre ŋwed.

¹¹Ami ntie nse ke ini oro mbaŋa uyo ikpɔ ikɔ emi nduk oro etiŋde: ntie ŋkut tutu ewot unam oro, enyuŋ esobo okpo esie, eda esin ke ikaŋ eke asakde.

¹²Mmɔ ebɔ mme unam oro esuhɔde ubɔŋ mmɔ, edi eyak uwem mmɔ ebigi ke ini ye ke isua.

¹³Ŋkut ke ŋkukut okoneyo, ndien, sese, owo eke ebietde eyen owo asaŋa ke obubit enyɔŋ edi, enye osim Andisɔŋɔ usen, enyuŋ eda enye edi enye ke iso.

¹⁴Ndien enɔ enye ubɔŋ, ye ukpono, ye itie-edidem, ete kpukpru mme idut ye obio ye usem enam ŋkpɔ enɔ enye: ubɔŋ esie edi nsinsi ubɔŋ eke midikureke, itie-edidem esie idinyuŋ ibiarake.

¹⁵Ndien esit ayat mi Daniel ke esit idem mi, ŋkukut ibuot mi enyuŋ etimere mi.

¹⁶Nsaŋa ŋkpere owo mmɔ kiet emi edade do, nnyuŋ mbup enye akpanikɔ ofuri ŋkpɔ emi. Ndien enye etiŋ ɔnɔ mi, onyuŋ asian mi nte ŋkpɔ emi ediwɔrɔde.

¹⁷Ikpɔ mme unam emi edide inaŋ edi ndidem inaŋ emi editode ke isɔŋ edaha ke enyɔŋ.

¹⁸Ndien edisana ikɔt Ata Edikoŋ eyeda ubɔŋ, enyuŋ enyene ubɔŋ ke nsinsi ye ke nsinsi-nsinsi.

¹⁹Ndien nyom ndifiɔk akpanikɔ ɔyɔhɔ unam inaŋ emi edide isio ye mmɔ eken kpukpru, enyene ndik eti-eti, emi ndet esie edide ukwak, mbara esie onyuŋ edide okpoho, emi atade, onyuŋ anuakde, onyuŋ adade ukot esie edigi se isuhɔde;

²⁰ye akpanikɔ nduk duop oro edude enye ke ibuot, ye eke eken oro okotibede, ndien esin ita eduɔŋɔ; ye nduk oro enyene enyin, ye inua oro etiŋde ikpɔ ŋkpɔ, ndien iso esie ɔsɔŋ akan eke mme nsaŋa esie.

²¹Ntie nse, ndien nduk oro aŋwana ekɔŋ ye ikɔt Abasi, onyuŋ akan mmɔ; tutu Andisɔŋɔ usen edi,

²²ndien eda ikpe enɔ edisana ikɔt Ata Edikoŋ: ndien ini edi, ndien ikɔt Abasi eda ubɔŋ.

²³Ntem ke enye ɔdɔhɔ ete, Ɔyɔhɔ unam inaŋ emi eyedi ɔyɔhɔ edidem inaŋ ke ererimbot, emi edidide isio ye kpukpru itie ubɔŋ, onyuŋ adia ofuri isɔŋ, onyuŋ edigi enye, onyuŋ anuak enye mbai-mbai.

²⁴Ndien ama edi nduk duop oro,ndidem duop eyedaha eda ke kpasuk ubɔŋ oro: eŋwen eyenyuŋ etiene mmɔ adaha ada; ndien enye eyedi isio ye mmɔ oro ekebemde enye iso, eyenyuŋ akan ndidem ita.

²⁵Ndien enye eyetiŋ ikɔ abaŋa Ata Edikoŋ, onyuŋ osobo edisana ikɔt Ata Edikoŋ; onyuŋ ekere ndikpuhɔre ini ye mme ewuhɔ: ndien eyeda mmɔ esin enye ke ubɔk tutu ekem ke ini ye ini iba ye ubak ini.

²⁶Ndien mmɔ eyenim ikpe, enyuŋ ebɔ enye ubɔŋ esie, enyuŋ esobo enye, enyuŋ ebiat enye tutu osim akpatre.

²⁷Ndien mmɔ eda itie edidem, ye ubɔŋ, ye ukpono itie-edidem ke idak ofuri enyɔŋ enɔ edisana ikɔt Ata Edikoŋ; ubɔŋ esie edi nsinsi ubɔŋ, kpukpru mbɔŋ eyenyuŋ enam ŋkpɔ esie, enyuŋ ekop uyo esie.

²⁸Utit ikɔ osim emi. Ama edi ami Daniel, ekikere mi etimere mi eti-eti, iso onyuŋ ɔkpuhɔre mi, edi nnim ŋkpɔ oro ke esit mi.