Read efik DANIEL 8 Bible Online

DANIEL 8 - efik bible

DANIEL 8

¹KE ɔyɔhɔ isua ubɔŋ Belshazzar edidem ita, ami kpa ami Daniel ŋkut ŋkukut, etiene oro ŋkukutde ke eritɔŋɔ.

²Ndien ŋkut ke ŋkukut oro; ndien edikem ke ini ŋkutde, ami ndu ke Shushan ufɔk edidem, emi odude ke esien Elam; ndien ŋkut ke ŋkukut oro, ndien ami ndu ke mben akpa mmɔŋ Ulai.

³Ndien mmenere enyin mi nse, ndien, sese, okukim kiet ke iso akpa oro ada, enye onyuŋ enyene nduk iba: nduk oro enyuŋ ekoŋ; ndien kiet okoŋ akan eken; eke okoŋde onyuŋ etiene enye otibe.

⁴Ŋkut okukim oro ke onuk aka edem usop-utin, ye edere, ye usuk; baba unam kiet eke ekemede ndida enye ke iso inyuŋ iduhe du, baba kiet eke anyaŋade ŋkpɔ osio enye ke ubɔk inyuŋ iduhe; enye onyuŋ anam se enye amade, onyuŋ akabare okpon.

⁵Ami nnyuŋ ntie ŋkere, ndien, sese, okpo ebot kiet oto ke edem usop-utin asaŋa ke ofuri iso isɔŋ, inyuŋ itukke isɔŋ; okpo oro onyuŋ enyene akwa nduk kiet ke ufɔt enyin esie.

⁶Ndien enye edisim okukim oro enyenede nduk emi ŋkokutde ke iso akpa ada: ndien efehe ebine enye ke iyaresit odudu esie.

⁷Ndien ŋkut nte enye osimde ɔtɔ okukim erɔŋ oro, onyuŋ ayat esit ye enye eti-eti, onyuŋ onuk okukim oro obuŋ nduk esie mbiba: okukim oro inyuŋ inyeneke odudu eke adade enye ke iso. Ndien enye onuk enye ɔduɔk ke isɔŋ, onyuŋ edigi enye: baba owo kiet eke anyaŋade okukim osio enye ke ubɔk inyuŋ iduhe.

⁸Ekem okpo ebot oro akabare okpon eti-eti; ndien adaŋemi enye ɔsɔŋɔde, akamba nduk oro ɔbuŋɔ; ndien ikpɔ nduk inaŋ eke esede ofum enyɔŋ mbinaŋ, etibe ke itie esie.

⁹Ndien nduk kiet eke oyomde ndikpri otibe ke mme mmɔ emi kiet, ndien enye ɔkɔri eti-eti, aka usuk, ye edem usiaha-utin, ye edem edinem isɔŋ.

¹⁰Ndien enye akabare okpon tutu osim mme udim enyɔŋ; ndien emen usuk udim enyɔŋ ye usuk ntanta ɔfiɔŋ ɔduɔk ke isɔŋ, enyuŋ edigi mmɔ.

¹¹Enye onyuŋ emenere idem esie tutu osim ɔbɔŋ udim oro, onyuŋ esin esio nsinsi uwa efep, onyuŋ esin ewuri ebiet edisana iduŋ esie.

¹²Ndien eyeyak udim enɔ enye ekɔrɔ ke nsinsi uwa oto ke idiɔk ido: ndien enye eyeduɔk akpan-ikɔ ke isɔŋ, onyuŋ anam ŋkpɔ, onyuŋ okut unen.

¹³Ndien ŋkop nte edisana owo kiet ɔdɔhɔde, ndien edisana owo kiet eken obup enye oro ɔkɔdɔhɔde ete, Adaŋa didie ke ŋkukut onim nsinsi uwa ye uwa idiɔk ido ke se ibiarade, ete enyuŋ edigi edisana ebiet ye udim oro?

¹⁴Ndien enye ɔdɔhɔ mi, ete, tutu ekem ke tɔsin mbubreyo ye usenubɔk iba ye ikie ita; ke ini oro eyenam edisana ebiet asana.

¹⁵Ndien edikem ke adaŋemi ami Daniel ŋkutde ŋkukut oro, nnyuŋ nyomde nditim mfiɔk, sese, se ibietde idem owo ada mi ke iso.

¹⁶Ndien ŋkop uyo owo ke ufɔt Ulai: ndien enye ofiori onyuŋ ɔdɔhɔ, ete, Gabriel, siak ŋkukut emi nɔ owo emi.

¹⁷Ndien enye edi ke ɔtɔ ami ndade: ndien ke ini enye edide, ami ndikhe, nnyuŋ nduɔ ke isɔŋ ŋkubi iso mi; ndien enye ɔdɔhɔ mi, ete, Eyen owo, tim fiɔk ete ke ŋkukut emi aka ekperedem ini.

¹⁸Ndien ke ini enye ɔdɔhɔde ye ami, ami ŋkubi iso mi ke isɔŋ nde ɔkpɔsɔŋ idap; ndien enye otuk mi, onyuŋ eneŋere mi onim ke itie mi.

¹⁹Enye onyuŋ ɔdɔhɔ mi, ete, Sese, ami nyesian fi se idiwɔrɔde ke ukperedem ifuresit: koro utit eyedu ke ini emi edoride.

²⁰Okukim oro afo okokutde enyenede nduk iba oro edi ndidem Media ye Persia.

²¹Odusu okpo ebot ŋko edi edidem Greece: ndien akamba nduk emi odude enye ke ufɔt enyin edi akpa edidem.

²²Ndien emi enye oro ɔkɔbuŋɔde, ndien inaŋ etibede ke itie esie, itie-edidem inaŋ eyewɔrɔ ke ubɔŋ oro edaha eda, edi idinyeneke odudu esie.

²³Ndien ke utit ubɔŋ mmɔ, ke adaŋemi mme anam-idiɔk ema enam ema, edidem kiet eke ɔsɔŋɔde iso onyuŋ ɔfiɔkde ŋkari, eyedaha ada.

²⁴Odudu esie eyenyuŋ ɔsɔŋɔ, edi iditoho ke odudu esiemɔ: enye eyenyuŋ abiat ŋkpɔ ndyɔ-ndyɔ, eyenyuŋ okut unen, onyuŋ anam, onyuŋ abiat mkpɔsɔŋ ye edisana mbio.

²⁵Ndien oto ke ŋkari esie enye eyenam ŋkari aka iso ke ubɔk esie; eyenyuŋ okok idem ke esit esie, onyuŋ abiat ediwak owo ke ndueidem mmɔ; onyuŋ adaha ke enyɔŋ aŋwana ye ɔbɔŋ mbɔŋ; ndien eyebom enye, idige ke ubɔk.

²⁶Ndien ŋkukut uwemeyo ye usenubɔk emi eketiŋde edi akpanikɔ; afo ndien da seal nim ŋkukut emi: koro eyedu ediwak usen.

²⁷Ndien idem akpa mi Daniel, udɔŋɔ onyuŋ anam mi ndusuk ini: edikem ŋkop idem, nnyuŋ nam utom edidem; ŋkukut oro onyuŋ enyene mi ndyɔ: edi baba owo kiet ifiɔkke enye.