Read efik DANIEL 9 Bible Online

DANIEL 9 - efik bible

DANIEL 9

¹KE akpa isua Darius eyen Ahasuerus, emi okotode ke ubon nditɔ Media, emi ekenimde enye ke edidem mme Chaldean:

²Ke akpa isua ubɔŋ esie, ami Daniel nda ŋwed ntim mfiɔk ibat isua emi uyo Jehovah okosimde Jeremiah prophet abaŋa, ete ke ŋwure Jerusalem eyeyɔhɔ isua ata ye duop.

³Ndien ŋwuk iso mi nse Ɔbɔŋ Abasi, nnyuŋ nyom mkpe-ubɔk, ye eseme, ye utre-udia, ye ɔfɔŋ-ikpo, ye ntɔŋ:

⁴ndien ŋkpe Jehovah Abasi mi ubɔk, nnyuŋ nyarare idiɔk-ŋkpɔ, nnyuŋ ndɔhɔ, nte, Mbɔk, Ɔbɔŋ mi, Akwa Abasi emi enyenede ndik, emi onimde ediomi ye ima ye mmɔ eke emade enye enyuŋ enimde mme ewuhɔ esie.

⁵Nnyin imedue, imonyuŋ inam ukwaŋ-ŋkpɔ, imonyuŋ idiɔk, inyuŋ isɔŋ ibuot, inyuŋ ikabare ikpɔŋ ido fo ye mme item fo:

⁶nnyin ikonyuŋ ikopke uyo ikɔt fo mme prophet, emi eketiŋde ikɔ ke enyiŋ fo, edɔhɔ edidem nnyin, ye mbɔŋ nnyin, ye mme ete nnyin, ye kpukpru mbio-obio.

⁷O Ɔbɔŋ, edinen ido enyene fi, edi but iso enyene nnyin kpa nte mfin emi, enyene mbio Judah, ye mme andiduŋ Jerusalem, ye ofuri Israel mkpet-mkpet ye nsan-nsan, ke kpukpru mme idut eke afo ekebinde mmɔ eka do, ebaŋa mme idiɔk ido emi ekenamde ye afo.

⁸O Ɔbɔŋ, but iso edi eke nnyin, ye eke ndidem nnyin, ye eke mbɔŋ nnyin, ye eke mme ete nnyin, koro nnyin imanam idiɔk ye afo.

⁹Ɔbɔŋ Abasi nnyin emenyene esit mbɔm ye eridahado, koro nnyin isɔŋde ibuot ye enye;

¹⁰nnyin inyuŋ ikopke uyo Jehovah Abasi nnyin; inyuŋ isaŋake ke mbet esie oro enye akadade ubɔk ikɔt esie mme prophet onim nnyin ke iso.

¹¹Ofuri Israel ŋko ema ebiat mbet fo, enyuŋ ekabare ete ikukop uyo fo. Ndien afo aŋwaŋa nnyin isuŋi ke idem, ye uŋwɔŋɔ emi ewetde ke ŋwed mme ewuhɔ Moses owo Abasi, koro nnyin iduede ye enye.

¹²Enye omonyuŋ anam uyo esie oro enye ɔkɔdɔhɔde abaŋa nnyin ye mme ebierikpe nnyin emi ekekpede ikpe nnyin, ɔsɔŋɔ ada: onyuŋ ada akwa idiɔk ŋkpɔ etiene nnyin: koro owo akanam minamke baba ke idak ofuri ikpa enyɔŋ, nte emi ekenamde ke Jerusalem:

¹³kpa nte emi ekewetde ke ŋwed mbet Moses, ofuri idiɔk-ŋkpɔ emi omosim nnyin. Edi nnyin ikekpehe Jehovah Abasi nnyin ubɔk, inyuŋ ikpɔŋke mme idiɔk ido nnyin ifiak edem, inyuŋ itimke ifiɔk akpanikɔ fo.

¹⁴Ndien Jehovah etie ekpeme idiɔk-ŋkpɔ oro, onyuŋ ada enye etiene nnyin: koro Jehovah Abasi nnyin enende ke kpukpru erinam emi enye anamde: ndien nnyin ikokopke uyo esie.

¹⁵Ke emi ndien, O Ɔbɔŋ Abasi nnyin, emi akadade ɔkpɔsɔŋ ubɔk osio ikɔt fo ke isɔŋ Egypt efep, okonyuŋ ɔwɔrɔde etop, kpa nte mfin emi; nnyin imɔdiɔk, imanam idiɔk.

¹⁶O Obɔŋ, kpa nte ofuri eti ido fo asaŋade, mbɔk, yak iyaresit fo ye ikpahesit fo ekabare ekpɔŋ obio fo Jerusalem, edisana obot fo: koro mme idiɔk ido nnyin ye mme ukwaŋ-ŋkpɔ mme ete nnyin esinde Jerusalem ye ikɔt fo ekabare edi ŋkpɔ esuene kpukpru mmɔ eke ekande nnyin ekuk.

¹⁷Ke emi, ndien, O Abasi nnyin, kop mkpe-ubɔk owo fo ye eseme esie, nyuŋ yak iso fo ayama ɔnɔ edisana ebiet fo emi abiarade, ke abaŋa Ɔbɔŋ.

¹⁸O Abasi mi, kpaŋ utɔŋ fo, nyuŋ kop; tat enyin fo, nyuŋ se ŋwure nnyin, ye obio emi ekerede enyiŋ fo: koro nnyin minimke mkpe-ubɔk nnyin ke iso fo, ibaŋa nti ido idem nnyin, edi ibaŋa ediwak mbɔm fo.

¹⁹O Ɔbɔŋ, kop; O Ɔbɔŋ, dahado; O Ɔbɔŋ, kpaŋ utɔŋ, nyuŋ nam; kubigi, baŋa idem fo, O Abasi mi: koro obio fo ye ikɔt fo ekerede enyiŋ fo.

²⁰Ndien ke adaŋemi ami nsuk ndɔhɔde ikɔ, nnyuŋ mbɔŋ akam, nnyuŋ ntiŋ idiɔk ido mi, ye mme idiɔk ido oruk mi Israel, nnyuŋ nnim mkpe-ubɔk mi ke iso Jehovah Abasi mi, mbaŋa edisana obot Abasi mi:

²¹ke ini ami nsuk ndɔhɔde ke akam mi, Gabriel owo oro ŋkokutde ke ŋkukut mi ke eritɔŋɔ, ɔsɔp efe edi edituk mi ke ini uwa mbubreyo.

²²Ndien enye asian mi, onyuŋ eneme nneme ye ami, onyuŋ ɔdɔhɔ ete, O Daniel, ke emi ke ŋwɔrɔ ndi ndinam fi otim ɔfiɔk ŋkpɔ.

²³Uyo ɔwɔrɔ ke ini eritɔŋɔ mkpe-ubɔk fo, ndien ami ndi nditiŋ nnɔ fi: koro afo enemde Abasi esit: tim fiɔk ndien ŋkpɔ, nyuŋ tim kere ŋkukut.

²⁴Edori urua ata ye duop ebaŋa oruk fo, ye edisana obio fo, eke edinamde ndudue okure, edinyuŋ emade idiɔk ido, enyuŋ esiode isop ukwaŋ-ŋkpɔ efep, eke enyuŋ edade nsinsi edinen iso eduk, enyuŋ enimde seal ke ŋkukut ye prophecy, enyuŋ eyetde Ata Edisana ke aran.

²⁵Fiɔk, ndien, nyuŋ tim nim ke ibuot, ete, ke ɔtɔŋɔde ke ini emi uyo ɔwɔrɔde, ete etɔŋɔ ntak ediɔŋ enyuŋ ebɔp Jerusalem, tutu osim ke ini Messiah Ɔbɔŋ, eyedi urua itiaba ye urua ata ye iba: eyetɔŋɔ ntak ediɔŋ aŋwa ye ukpe, kpa ke ini nnanenyin.

²⁶Ndien adaŋemi urua ata ye iba ekurede, eyesibe Messiah efep, edi ibaŋake idem esie; ndien ikɔt ɔbɔŋ emi edidide eyebiat obio ye edisana ebiet; ndien utit esie eyedi ke mmɔŋ ukwɔ; ndien ewuk ete nsobo odu tutu osim ke utit ekɔŋ.

²⁷Enye eyenyuŋ ɔsɔŋɔ onim ediomi ɔnɔ ediwak owo ke urua kiet; ndien ke ufɔt urua enye eyenam uwa ye inuak-udia etre: ndien andisobo eyedoro ke ibuot ŋkpɔ mbubiam: tutu enyuŋ eda se enamde ema enyuŋ ewukde, eŋwaŋa andisobo ke idem.