Read efik HOSEA 2 Bible Online

HOSEA 2 - efik bible

HOSEA 2

¹MBUFO edɔhɔ nditɔ-ete mbufo, ete, Ikɔt mi; enyuŋ edɔhɔ nditɔ-ete mbufo iban, ete, Ruha-mah (Emetua fi mbɔm).

²Mbufo etɔhɔ ye eka mbufo, etɔhɔ: koro enye midige ŋwan mi, ami nnyuŋ ndige ebe esie: yak enye osio ndien use esiemɔ ke iso esie efep, onyuŋ osio efibe esiemɔ ke ufɔt eba esie efep; mbak ndifuhɔre enye iferi,

³nnyuŋ nnim enye nte usen emi enye akamanade, nnyuŋ nnim enye ke wilderness, nnyuŋ nsin enye edi edisat isɔŋ, nnyuŋ ŋwot enye ke nsat-itɔŋ.

⁴Ndinyuŋ ntuaha nditɔ esie mbɔm: koro mmɔ edide nditɔ use.

⁵Koro eka mmɔ ekenamde use, andiman mmɔ amanam oburobut: koro enye ɔdɔhɔde ete, Nyetiene mmɔ eke emade mi, emi enɔde mi uyo mi ye mmɔŋ mi, ye idet erɔŋ mi ye flax mi, ye aran mi ye se ŋŋwɔŋde.

⁶Mmɔdo, sese ami nyeda ŋkukim nsiri usuŋ fo, nnyuŋ mbɔp ibibene, ndien enye idikwe usuŋ esie.

⁷Ndien enye eyebine mmɔ eke emade enye, edi idisimke mmɔ; eyenyuŋ oyom mmɔ, edi idikwe. Ndien enye eyedɔhɔ, ete, Nyefiak ntiene akpa ebe mi: koro ɔkɔfɔnde ye ami ini oro akan emi.

⁸Ndien enye ikɔfiɔkke, ite ke edi ami ŋkɔnɔ enye ibokpot oro, ye obufa wine, ye aran, ndien mmɔ eda silver oro ŋkanamde awak ɔnɔ enye, ye gold, enam ŋkpɔ enɔ Baal.

⁹Mmɔdo nyefiak nda ibokpot mi ke ekem ini esie, ye obufa wine mi ke ini esie ŋko, nnyuŋ mbɔ idet erɔŋ mi ye flax mi emi okpofukde enye iferi.

¹⁰Ndien ke emi ke ndiyarare but esie ke iso mmɔ emi emade enye, ndien baba owo kiet eke osiode enye ke ubɔk mi efep ididuhe.

¹¹Nyenyuŋ nnam ofuri idaresit esie etre, ye mme usɔrɔ esie, ye mbufa ɔfiɔŋ esie, ye mme sabbath esie, ye kpukpru ikpɔ usen esie.

¹²Nyenyuŋ mbiat vine esie ye eto fig esie, emi enye ɔkɔdɔhɔde abaŋa, ete, “Mme mmɔ emi edi utip mi emi mme andima mi enɔde mi”: ndien nyenam mmɔ ekabare edi akai, ndien mme unam ikɔt eyedia mmɔ.

¹³Nyenyuŋ nnɔ enye ufen, mbaŋa mme usen Baal emi enye ɔkɔfɔpde ŋkpɔ ɔnɔ mmɔ, okonyuŋ abanade idem esie ke mkpanuen ibuo esie, ye ŋkwa itɔŋ esie, ndien ebine mmɔ eke emade enye, onyuŋ efre mi. Uyo Jehovah edi emi.

¹⁴Mmɔdo, sese, ami nyetap enye, nnyuŋ nda enye ndi ke wilderness, nnyuŋ ndɔhɔ mfɔn-mfɔn ye enye.

¹⁵Ndien nyeda iŋwaŋ-vine esie do nnɔ enye, nnyuŋ nnɔ enye itihere Achor ke inua-otop idori-enyin: ndien enye eyekwɔ do, kpa nte ke mme usen uyen esie, ye ke usen oro enye okotode ke isɔŋ Egypt ɔdɔk.

¹⁶Ndien Jehovah ɔdɔhɔ, ete, Ama ekem ke usen oro afo eyekot mi, ete Ishi (Ebe mi) ndien udukotke aba mi, ete, Baali (Ɔbɔŋ mi).

¹⁷Ndien nyesio enye enyiŋ Baalim ke inua mfep, idinyuŋ idaha aba enyiŋ mmɔ iti mmɔ.

¹⁸Ndien ke usen oro ke ndidiomi ediomi ye unam-ikɔt, ye inuen enyɔŋ, ye ɔnyɔni isɔŋ, nnɔ mmɔ; nyenyuŋ mbuŋ utiga ye ofut ye ekɔŋ ke isɔŋ mfep, nnyuŋ nyak mmɔ ena ke isɔŋ ke ifure.

¹⁹Ndien nyebem fi nnim nnɔ idem mi ke nsinsi; ŋkɔm nyebem fi nnim nnɔ idem mi ke edinen ido, ye ke ikpe, ye ke ima, ye ke mfɔn.

²⁰Nyenyuŋ mbem fi nnim nnɔ idem mi ke akpanikɔ: ndien afo eyefiɔk Jehovah.

²¹Jehovah ɔdɔhɔ ete, Ndien ama ekem ke usen oro, nyeyere, nyeyere enyɔŋ, ndien enyɔŋ eyeyere isɔŋ;

²²isɔŋ eyenyuŋ eyere ibokpot ye obufa wine ye aran; ndien mmɔ eyeyere Jezreel.

²³Nyenyuŋ ntɔ enye ke isɔŋ nnɔ idem mi nnyuŋ ntua Lo-ruhamah mbɔm: nnyuŋ ndɔhɔ Lo-ammi, nte, Afo edi ikɔt mi; ndien enye eyedɔhɔ mi, ete, Abasi mi.