Read efik HOSEA 4 Bible Online

HOSEA 4 - efik bible

HOSEA 4

¹MBUFO nditɔ Israel ekop uyo Jehovah: koro Jehovah ɔtɔhɔde utɔk ye mme andiduŋ isɔŋ, koro baba akpanikɔ ye ima ye ifiɔk Abasi miduhe ke isɔŋ.

²Isuŋi ye nsu ye afai ye inɔ ye efibe ebumere, iyip onyuŋ ɔkɔrɔ ke iyip.

³Mmɔdo isɔŋ eyetua eyet, kpukpru mmɔ eke eduŋde ke esit eyenyuŋ eyemere, ye mme unam ikɔt, ye mme inuen enyɔŋ; ndien eyenyuŋ emen iyak ke inyaŋ efep.

⁴Edi owo okutɔhɔ, okunyuŋ asua ɔnɔ owo: koro oruk fo ebietde mmɔ eke etɔhɔde ye oku.

⁵Ndien afo eyeduɔ ke uwemeyo, phophet eyenyuŋ ɔduɔ ye afo ŋko ke okoneyo, nyenyuŋ nsobo uka.

⁶Unana ifiɔk (Abasi) omosobo ikɔt mi: koro afo ɔduɔkde ifiɔk, ami ŋko nyeduɔk fi, nte okudi oku ɔnɔ mi: koro afo onyuŋ efrede mbet Abasi fo, ami ŋko nyefre nditɔ fo.

⁷Adaŋa nte mmɔ ewakde, kpa ntre ke mmɔ enam idiɔk ye ami: ami nyeda but ŋkpuhɔ ubɔŋ mmɔ.

⁸Mmɔ edia idiɔk ido ikɔt mi, enyuŋ esin esit mmɔ ke mme ukwaŋ-ŋkpɔ mmɔ.

⁹Ndien mbio-obio ye oku eyetie ubɔk ŋkpɔ kiet: ndien ami nyenɔ mmɔ ufen usuŋ mmɔ, nnyuŋ nnɔ mmɔ usiene ido mmɔ.

¹⁰Ndien mmɔ eyedia, edi idiyuhɔke: mmɔ eyenam use, edi iditɔtke: koro mmɔ etrede ndikere Jehovah.

¹¹Use ye wine ye obufa wine eda (mmɔ) esit.

¹²Ikɔt mi ke ebup eto mmɔ item, yak esaŋ mmɔ ndien ɔbɔrɔ mmɔ: koro spirit use esinde mmɔ ediyo, ndien mmɔ ekpɔŋ Abasi mmɔ enam use.

¹³Mmɔ ewa uwa ke enyɔŋ ikpɔ obot, enyuŋ efɔp incense ke enyɔŋ ŋkpri, ke idak ofriyo ye poplat ye terebinth, koro mfut mmɔ ɔfɔnde: mmɔdo nditɔ-iban mbufo eyenam use, iban nditɔ mbufo eyenyuŋ esin efibe.

¹⁴Ndinɔŋɔ nditɔ-iban mbufo ufen, koro mmɔ enamde use, ndinyuŋ nnɔŋɔ iban mbufo ufen, koro mmɔ esinde efibe: koro mmɔ ke idem-mmɔ ewahade etiene mme akpara, enyuŋ ewade uwa ye iban use: ndien mbio emi enanade ibuot eyetak.

¹⁵Edieke afo Israel edide akpara, Judah okukam edue; mbufo ekunyuŋ edi ke Gilgal, ekunyuŋ edɔk eka ke Beth-aven, ekunyuŋ etomo, ete, Ma uwem Jehovah.

¹⁶Koro Israel ɔsɔŋde ibuot nte ɔsɔŋ-ibuot abak-enaŋ: kemi Jehovah eyebɔk mmɔ nte eyen erɔŋ ke ntaŋwaŋ ebiet.

¹⁷Ephraim emeyire ye ndem; yak enye kpɔŋ.

¹⁸Eritie ke itie wine omokure: mmɔ eka ekenam use: mme andikpeme enye esɔŋ ema but eti-eti.

¹⁹Ofum ɔmɔbɔp enye ke mba esie; ndien mme uwa mmɔ eyenyene mmɔ but.