Read efik AMOS 5 Bible Online

AMOS 5 - efik bible

AMOS 5

¹MBUFO ekop uyo emi ami mmende ntiŋ mbaŋa mbufo, kpa ikwɔ eseme, O ufɔk Israel.

²Adiaha Israel ɔmɔduɔ, idinyuŋ idahake aba ke enyɔŋ: eduɔk enye ke isɔŋ esie; baba owo kiet eke emenerede enye ke enyɔŋ iduhe.

³Koro ntem ke Ɔbɔŋ Jehovah ɔdɔhɔ, ete, Obio eke tɔsin owo ekewɔŋɔde eyesuhɔ ikie, ndien obio eke owo ikie ewɔŋɔde eyesuhɔ duop, ɔnɔ ufɔk Israel.

⁴Koro ntem ke Jehovah ɔdɔhɔ ufɔk Israel, ete, Mbufo etiene mi, enyuŋ edu uwem:

⁵ndien mbufo ekuyom Bethel, ekunyuŋ eka ke Gilgal, ekunyuŋ ebe ekesim Beer-sheba: koro miditreke nditaŋ Gilgal nnyɔŋ, Bethel eyenyuŋ akabare edi ikpikpu.

⁶Mbufo eyom Jehovah, enyuŋ edu uwem, mbak enye edibumere nte ikaŋ ke ufɔk Joseph, onyuŋ ata enye, ndien baba owo kiet eke onimede enye iduhe ke Bethel.

⁷Mbufo emi ekabarede ikpe edi etidot, enyuŋ emen se inende eduɔk ke isɔŋ;

⁸enye akanam Pleiades ye Orion, onyuŋ akabare mfut mkpa edi usenubɔk, anam uwemeyo ebire nte okoneyo: okot mmɔŋ inyaŋ edi, onyuŋ aŋwaŋa enye ke iso isɔŋ: Jehovah edi enyiŋ esie.

⁹Emi esinde nsobo abuat ɔkpɔsɔŋ owo nte usiere, nsobo onyuŋ osim ɔkpɔsɔŋ ebiet.

¹⁰Mmɔ esua owo eke aduaride owo ke inua-otop, enyuŋ eda owo eke ɔdɔhɔde edinen, ese ke mbubiam.

¹¹Mmɔdo, koro mbufo edigide mbon unana, enyuŋ ebɔde mmɔ utomo ibokpot: mbufo ebɔp ufɔk ke ndisɔi itiat, edi ididuŋke ke esit; enyuŋ etɔ edifɔn iŋwaŋ-vine, edi idiŋwɔŋke wine mmɔ.

¹²Koro mmɔfiɔk ediwak mme idiɔk ido mbufo, ye mkpɔsɔŋ ukwaŋ-ŋkpɔ mbufo: ke etuk nti owo, ke ebɔ utip, enyuŋ enuk mme ubuene efep ke inua-otop.

¹³Mmɔdo owo eke edide ɔniɔŋ ke ini oro eyedop inua: koro edide idiɔk ini.

¹⁴Mbufo eyom eti ŋkpɔ, ekuyom idiɔk, man edu uwem: ndien ntem ke Jehovah Abasi mme udim edidu ye mbufo, kpa nte mbufo ekedɔhɔde.

¹⁵Mbufo esua idiɔk, enyuŋ ema eti, enyuŋ ewuk edinen ikpe ke inua-otop: mme Jehovah Abasi mme udim eyetua nsuhɔ Joseph mbɔm.

¹⁶Mmɔdo ntem ke Jehovah Abasi mme udim, Ɔbɔŋ, ɔdɔhɔ, ete, Ntuaŋa odu ke kpukpru mme aŋwa; mmɔ enyuŋ edɔhɔ, ete, “Mbɔm! mbɔm!” ke kpukpru efak; mbufo ekot mbio iŋwaŋ edi eseme, enyuŋ ekot mmɔ eke efiɔkde ikwɔ edi ntuaŋa.

¹⁷Ntuaŋa onyuŋ odu ke kpukpru iŋwaŋ-vine: koro nyesaŋa ke ufɔt fo mbe; Jehovah ɔdɔhɔ.

¹⁸Ɔdɔdiɔk ɔnɔ mbufo emi eyomde usen Jehovah ke idem mbufo! mbufo esaŋa nso ye usen Jehovah? Enye edi ekim, idige uŋwana.

¹⁹Kpa nte owo efehede ɔbɔhɔ lion, ndien bear osim enye: ye nte owo odukde ke ufɔk akadian ubɔk ke ibibene, ndien urukikɔt odom enye.

²⁰Nte usen Jehovah idige ekim? Nkɔm idige uŋwana. Nte idige ɔkposɔŋ ekim? Ŋkɔm uyama iduhe ke esit.

²¹Nsua, nsin ikpɔ usen mbufo ke ndek, ndinyuŋ ŋŋwuneke mme usɔrɔ mbufo.

²²Edieke mbufo ediwade ndifɔp uwa ye inuak-udia mbufo enɔ mi, ndibɔhɔ mmɔ: ndinyuŋ nsehe uwa emem eke etode ke ndisehe unam mbufo.

²³Men uyom ikwɔ fo fep kpɔŋ mi; ndien nyomke ndikop ikwɔ ndido fo.

²⁴Edi yak ikpe ɔfiɔrɔ nte mmɔŋ, ye edinen ido nte nsinsi akpa.

²⁵O ufɔk Israel, nte mbufo ekeda uwa emem ye inuak-udia esɔk mi ke wilderness ke isua aba?

²⁶Edi mbufo ekebiom ataya edidem mbufo, ye Chiun mbiet-ŋkpɔ mbufo, ntantafiɔŋ abasi mbufo, emi mbufo ekenamde ke idem-mbufo.

²⁷Ndien nyetaŋ mbufo mfep nnim ke edem Damascus oko; Jehovah, emi enyiŋ esie edide Abasi mme udim, ɔdɔhɔ ntre.