Read efik AMOS 6 Bible Online

AMOS 6 - efik bible

AMOS 6

¹OSUK ɔdɔdiɔk ɔnɔ mmɔ emi etiede ke ifure ke Zion, enyuŋ ebuɔtde idem mmɔ ke obot Samaria, akpan owo ke otu mme etubom mme idut, emi ufɔk Israel etienede mmɔ!

²Mbufo ebe eka Calneh ekese; enyuŋ eto do eka ke akamba Hamath; ndien esuhɔre ke Gath mme Philistine: nte mmɔ efɔn ekan mme idut emi? Nte adaŋa mmɔ okpon akan adaŋa mbufo?

³Osuk ɔdɔdiɔk ɔnɔ mmɔ eke emende usen idiɔk enim anyan ebiet: edi eda itie afai ekpere;

⁴eke enade ke bed oduk-enin, enyuŋ enyanarede ena ke mkpana mmɔ, enyuŋ etade nditɔ-erɔŋ eke etode ke ŋkpri ufene, ye nditɔ-enaŋ eke etode ke ebiet ŋkuhɔ;

⁵eke ekwɔde harp ebɔ: mmɔ esin ibuot enam ndido idem mmɔ, nte David;

⁶eke eŋwɔŋde bowl wine, enyuŋ eyetde akpan aran ke idem: edi ikereke nditaha Joseph.

⁷Mmɔdo eyetaŋ mmɔ efep ke idahemi ye mbemiso owo eke etaŋde efep: ndien mkpo mmɔ emi enyanarede ena, eyedop.

⁸Ɔbɔŋ Jehovah otomo idem esie, ete, Ntem ke Jehovah Abasi mme udim ɔdɔhɔ, ete, Ami nse iseri Jacob ke mbubiam, nnyuŋ nsua ikpɔ ufɔk esie: ndien nyeda obio ye se iyɔhɔde ke esit nyak nnɔ.

⁹Ndien ama ekem, edieke owo duop esuhɔde ke ufɔk kiet, mmɔ ŋko eyekpaŋa.

¹⁰Ndien ufan esie kpa owo eke ɔfɔpde enye eyemen enye, onyuŋ osio mme ɔkpɔ ke ufɔk efep. Ndien enye eyedɔhɔ owo eke odude ke ata esit ufɔk oro, ete, Nte owo eŋwen osuk odu ye afo? Ndien enye eyedɔhɔ, ete, Omokure. Ndien enye eye-dɔhɔ ŋko, ete, Dop, koro midige nte etiŋde enyiŋ Jehovah.

¹¹Koro, sese, Jehovah owuk, onyuŋ ɔtɔ akwa ufɔk owuri, onyuŋ ɔtɔ ekpri ufɔk asiak.

¹²Nte horse eyefeŋe ke enyɔŋ akwa itiat? Nte owo eyeda enaŋ ofuŋ enye? Koro mbufo ekabarede ikpe esin ke etidot, ekabare mfri edinen ido esin ke wormwood:

¹³emi edatde esit ke se midige ŋkpɔ; edɔhɔ, ete, Nte nnyin idaha odudu nnyin idori nduk ke idem nnyin?

¹⁴Edi Jehovah Abasi mme udim ɔdɔhɔ, ete, Sese, ami mmɔŋ ndemere idut nnɔ mbufo, O ufɔk Israel, ndien mmɔ eyefik mbufo ɔtɔŋɔde ke ebiet emi edukde Hamath tutu osim ke akpa mmɔŋ itihere.